‘Angel leh Mihring’ thlirlawkna

By Lalzarzova

“Ka kuta min kai tlattu/hawrawp lâm an chawl si lo” titu Lalvensangi lehkhabu ‘Angel leh Mihring’ hi Poetry bu niin, thupui 116 hmanga mihring nun thlirna hla rem khawmna bu a ni. He lehkhabu hi phek 150-a chhah a ni a, a man hi ₹ 100/- niin, Mizoram Publication Board nen tangkawpa he lehkhabu ziaktu hian a chhuah a ni. Han en mai pawha a kawm atanga mit la tak mai he lehkhabu hi arsi chanchin emaw, vantirhkoh chanchin emaw ziahna ni lovin mihring nun thlirna lehkhabu a ni.

Thawnthu kan phuah emaw, lemchan kan ziak a ni emaw, hla pawh phuah ila, a hmanrua atan khuarel te, artui leh hmawlhte chanchin emaw, chawngzawng ke pen chungchangte pawh ziak thin mahila literature-ah chuan mihring nun hlimthla bawk a lo lang leh thin a, chu tho chu he lehkhabuah pawh hian kan hmu a ni.

He lehkhabua hla 166-ah hian hla thu harsa leh thu un pui pui hmuh tur a awm lo va, he lehkhabu ziaktu hian Mizo tawng a hmang thiamin a sawi duh chu fiah takin a sawi zel thei a ni. Hla phuah hi thil awlsam a ni lo va, Classical Criticism-ah khan hla phuahtu chu talent dawng bik, mi dangte neih ve loh thiamna nei bika ngaih an lo ni thin a, he lehkhabu ziaktu Lalvensangi pawh hian poetry phuah turin theihna a nei a, talent a dawng a ni tiin sawi ila kan sawi uar a ni bik lo vang. Horace-a khan, technical deuh deuha hla phuah a, metrical verse form emaw, rhyme scheme emaw hman uar chiam ringawt kha poet tha tehna atan a tawk lo a lo ti tawh a, mihring nun chhungril thatna pho chhuah kha hla phuahtu chuan a tum tel tur a ni tih a lo sawi daih tawh a ni. ‘Hringnun Zinkawng’ tih hlaah hian :

Harsatnain a tihchak tur mihring i ni a,
Hmangaih hlawh ringawt tur ni lovin
Huatna pawh hmachhawn thei tura
Chakna nei mihring i ni si a

tiin mihring ropuina leh theihna thûk tak kha a rawn phawrh chhuak a ni.

Kei zawng, kawng tawp ka thlen pawhin,
Boruaka ka thâm ral hun pawhin,
Beidawnna hming ka hawh lo vang

han tih te hian mihring chhungril chakna kha a kai tho a, mi dangte tan chakna a pe a, mihring nih hi awmze neiah a chhuah a ni. He lehkhabu ziaktu hi a la naupang viau e ti lovin mihring nun zinkawng thui tak zawh tawh ang maiin thu awmze nei min hrilh a ni. Siamkima Khawlhring khan, “Hla tling kan tihte hi mihring rilru leh nun huapzo, a dikna leh a thuchah ken pawh ni leh thla leh kum ten an tih hlui theih lohte hi a ni thin,” a lo ti a. He lehkhabua hla thenkhat chuan he Siamkima thusawi hi an tidik ve theiin a lang.

A tir lama kan sawi tawh ang khan he lehkhabu ziaktu hian hla thu han chheh kual vel a thiam khawp mai a, uar si lo, a sawi tum fiah tho si hian awlsam si, nalh deuh deuh hian thumal a remkhawm leh tlat zel. Structuralism theory duang chhuaktua an ngaih Ferdinand de Saussure-a chuan, “Tawng hi mihring nun laimu a ni a. Inbiak pawh nan leh rilrua awmte sawichhuahna mai a ni lova; mihringin awm lo ata kan chher chhuah chawp a ni hek lo. Kan ni tin nuna mihringte kan inlaichinna (social relations) leh kan chhehvel khawvel kan hriat thiamna atanga lo chawr chhuak a nih avangin mihring nuna pawimawh ber a ni,” a titawp mai a. Tawng kan tih chu thumal rem khawm kha a ni a, thumal rem khawm thiamna hian poet tha leh tha lo tehnaah thui takin kawngro a lo su dawn a ni tih a fiah thei awm e. Practical Criticism duang chhuaktu IA Richards-a pawhin Poet chuan mi dangte biakpawhna’n hla a ziak a, chu inbiakpawhna atan chuan tawng hi a hmang a ni. Language chu thumal hrang hrang atanga siam a ni a, chuvang chuan art awmzia hre tur chuan thumal hrang hrangte hriatthiam a ngai a lo tibawk a. Thumal rem khawm thiam hi a bikin Poetry-ah hian a lo pawimawh hle a ni tih a chiang viau mai. “Chatuanah chuan i pêm tawh a / I awm ve lohna hmun chu” han tih te, “Kan naktuk a inthurual hma hian / Nimin sang tam kan hmachhawn tawh a” tih te, “Thli leh ruah inher vel kârah / Mittui bumin ka nui lui thin” tih te, “Boruaka ka thâmral hun pawhin / Beidawnna hming ka hawh lo vang” tih te, “Chhimbal lei indawh ka ring a” han tih mai te, “Thlarau sang tel an liam pawhin ? Piallei hi a ngawi reng a” tih te, “Thu-ah ka inthukru a / Hlain a ni ka insak thin” han tih ang chite hi a rem khawm fuhin, a mawi hle a, he lehkhabu ziaktu themthiamna pakhat a ni. Hengte hian poetry chu a cheimawiin a vawrh dang thin a ni.

Tunlai thangthar hla phuahtute hian he lehkhabu ziaktu ang hian thihna chungchang hi an sawi ve em aw tih ngaihtuah a awl hle. Thihna hi mihringte pumpelh theih miah loh thil a ni a, mahse tun hnaia hla chhuak tam takah hian thihna chungchang hi he lehkhabua kan hmuh ang hian kan hmu tam lo ang em aw ka ti. “Thawnthu ziaktu chu a au a…./ A tel ve lohna khawvel chu / Chhuahsan tumin a tlan chiam a” han tih te, “Eng tikah nge natnate hi a dam ang a / Eng tikah nge Vanah khian kan kal ve ang” han tih te, “Aw thihna / Na lovin min la bo la” han tih angte hi a awm nual mai a, hei hian he lehkhabu hi eng emaw ti takin mihring nuna thil thleng ngei ngei a tar lan phah a, ‘true to life’ ngaipawimawh thin tan chuan a hlutna tak pawh a ni awm e. Encyclopaedia of Death and Dying-in, “Hmeichhiate hian thihna hi an ngai thupui hle a, ngaihtuahna pawh an seng nasa a, mahse mipate pawh thil thlengah chuan an cham reng a, an chhungrilah an pai thung a ni,” a tih te kha min ngaihtuah tir rum rum a ni. Thih hnu piah lam a tar lan dan te pawh hi poetry bu danga kan hmuh tam loh tak niin a lang a, pian nawn lehna te, van chhawng tam tak te, mitthi chawlh lawkna khua chungchang thlengin kan hmu a, a philosophy ang zawng pawhin a ngaihnawm a, ngaihtuah zui vang vang tur suangtuahna min pe a ni.

He lehkhabuah hian langsar angreng taka hmuh theih thil pakhat a awm bawk a. Hla phuahtu inthlahrung, inkiltawih tak mai kan hmu a ni. A lehkhabu hming put chhan ‘Angel leh Mihring’ tihah pawh hian a tawp a kharna chu, “Mahse, mihringin an hual che a / Angel chu a rawn inlan ngam ta lo va” tih a ni a, he mi hla bikah hi chuan inlan ngam loh hrim hrim kha a sawi tum chu a ni kher lovin a lang a, mahse inlan ngam loh thu hian a hla dang tam takah pawh hian hla phuahtu inkiltawih tak hlimthla min hmuh tir a ni. “Eng tikah mah danglam tawh ngai lo tur pawha / Dam ngam hi a lo ngai a” han tih ang chi hi hmuh tur a awm nual bawk a ni. Thuziak a ni emaw, hla phuah pawh ni se, a ziaktu hi khawi laiah emaw chuan hmuh tur a lo awm ngei ngei thin a, he lehkhabu atang hi chuan a ziaktu hi mi ti thawt thawt lo, mi dangte ngaichânga nung thin niin a lang a ni.

He lehkhabua hla zawng zawngah hian hla pahnih tih loh chu a thupuiah Mizo tawng hman vek a ni a, hla thupui pahnih erawh chu saptawng hman a ni. ‘Soulmate’ tih leh ‘Anxiety’ tih a awm a, hei hian thalaite khawvel eng emaw chen a tar lang a tih theih awm e. Tin, mahni inthat (suicide) kan tih maite thlavang hauhna hmuh tur a awm bawk a, a ziah chhuah dan hian rilru a khawih em em bawk a ni. Hmangaihna chungchangte pawh hmuh tur a awm a, he lehkhabuah hian satire kan hmu tel a, society hlimthla a lang a, Pathian kan hmu a, thih hnu khawvel suangtuahna tar lan a ni bawk a, mihring nun hlimthla a lang chikim hle a ni. Longinus-a khan thuziak aiin a ziaktua themthiamna leh theihna sang tak awm kha a dah pawimawh hmasa a, mahse chu thiamna chu a peipung tur a ni a, a chher hriam zel a pawimawh a ni a lo ti a, he lehkhabu ziaktu pawh hi lehkhabu dang la ziak zel tura intuai hriam a, vawiina a lehkhabu hi a bul tanna chauh niin lehkhabu dang pawh la tichhuak leh zel turin duhsakna ka hlan a ni.

(He thu hi Lalvensangi Chawngthu lehkhabu ‘Angel leh Mihring’ tih tlangzarhna, April ni 2, 2022-a Aizawl Press Club-a Pu Lalzarzova thlirlawkna a ni. Lehkhabu hi Dr. H. Laldinmawia, Asst. Professor, Pachhunga University chuan a tlangzarh a ni).