‘Fardawn’ thlirlawkna
Zirtei Mangpa hian kum 2013-ah a thu ziak a dah khawmna Dithlifarfem a lo tichhuak tawh a, tunah a hla phuah a dah khawmna Fardawn a tichhuak leh tur hi a lawmawm hle. Poetry lama tuite hi chuan tu nge a nih kan hre theuhvin a rinawm a, tun hmaa Sabereka Khuangkaih vela thu ziak thin, tun hnua hla lama luangliam chho ta a ni a, mi tam zawkin amah kan hriat zuina pawh poetry tho a ni.
A kawm mawi tak mai, mit la leh poetry bu tih hriat tak mai siamtu hi Aba Hmar a ni a, Arhmul lem ni awm tak mai hi rin varin a kualkhung a, arhmul hi poetry chhinchhiahna atana khawvelina a hman a ni ve reng reng a, rin var kualkhung erawh a thlirtu azirin hrilhfiahna a dang thei ang. Tin, a layout hi TS Khupchong-in a siamsak a ni a, a mâwlin a mawi a (!), a print a tha bawk a, a bu hmelhmang hrim hrimah chuan sawisel tur ka hre lo. A lan dan hi a changkangin a zahpuiawm loh hle. A chhung thu pawh chhut sual hmuh tur a vang khawp, Mafaa’na “Thim zinga zawhte dum awm lo zawn ang a ni” a tih ang deuh kha a ni awm e.
Tun hma atang tawhin Zirtei poetry hian danglam bikna a nei a. A chhiartute hi a hla hmangin a kawm a, a be melh melh thin hi a ni. Ka Ngaih Loh Che Ring Suh tih hi hla hi panga ngawt mai a dah a, heng hlaah te hian Zirtei a lo lang chiang leh zual a. Ih e tih te, Ih maw tih te, Mate han tih mai te hi mi dang poetry-ah kan hmuh zen zen loh, Zirtei poetry-a kan hmuh thin chu a ni. Ka Ngaih Loh Che Ring Suh-IV-ah chuan Ka bulah, ka kiangah ding la / Ka thil hmuh leh hriat te chu / Nangmah ngeiin i hmuh dan / Min hrilh leh la ka ti asin aw a tih te; a hla tawpah thil dang a han sawi char char a, a tawp khar nana Chuan e Mate, Ka ngaih loh che ring suh a rawn ti leh hram mai te hi tlema tlangval rilru thianghlim deuh (keini ang) tan chuan chhiar laiin a laih pût pût theih a ni.
Tin, Zirtei poetry reng reng hi a no va, a nêm a, a nû thin. A hla hrang hrangah hian Ti raw tih te, Ih maw tih te, Ih E tih te, ang che aw tih te, e khai, ka rei, awi maw, kei zawng tih te, a reh ka ti han tih ngawt mai te hi hmuh tur a tam a, hmeichhe kutchhuak a nihna hi a hlaah hmuh tur a awm deuh zel a ni. Hengte hian a hlate hi chhiar a tihahdam a, Zirtei signature pakhat tih loh rual a ni lo. Nakinah tih hla tlar hmasa ber hi Ih E tiin a intan nghal pang mai a, a chang tawpna pawh Chutiang hunah chuan e Mate / Min rawn hre chhuak thin ang ti raw / Chuan maw Mate / “A tan kha chuan ka hlu asin maw le” / Rawn ti ang che aw – i rilruin tih a ni hnâp mai. A no ber mai a no ber mai tih te pawh mi a tihre chhuak a, no nû leh nêm tak a ni a, mipa tana han phuah rual a ni lo. Mipa phuah chu ni sela, tenawm ka ti ang a, ka chhiar hauh lo vang, mahse, hmeichhe phuaha inhmeh tak, hmeichhe nihna leh nihphung phawrh chhuaktu pawimawh tak a ni lawi si a, a phuahtu mizia hre sa tan phei chuan a inhmeh ngawih ngawih. Mi dangina hetianga va phuahpui chi a ni mawlh lo.
Zirtei poetry-a kan hmuh ngai zen zen loh, he lehkhabua kan hmuh taka chu, a Christian Poetry han tih theih tur hla eng emaw zat a rawn dah hi a ni. Pathian fakna leh rinna lam hawi hi a hla hlawm khatnaah rawn dahin, hla paruk a awm a. A hla hmasa ber Natna Chaihtu hi a themthiamzia tilangtu pakhat a ni. A tlar tin tawp theuh thumal kha ri inzulin a rawn siam vek a. Tin, a tlar tawp berah chuan Natna neitu mittui leh thisen kraws-ah an luang hmun tih a awm bawk a, thil (noun) hrang pahnih kha thiltih (verb) pakhatah remchang takin a rawn bilh lut a; keinin hetiang lam hawiin han phuah ve ngawt dawn ila, awlsam takin Ka mittui leh ruah a sur kan han ti puat emaw a ni ang a, a ho vek dawn. Ani erawh chuan a sawi tum chiang tak siin, a end rhyme bo si lovin a rawn sawi chhuak thiam bik tlat a ni. Eng pawh chu ni se, ka rilrua lo awm chu, kan khawvel hi a hmawr ta tak tak tawh a ni ang, Zirtei te ngial pawhin Pathian chungchang an phuah tak hi! He hlaah lo pawh thumal chaih kual (wordplay) mawi tak tak hmuh dahna hla a awm nual a, thil inkalh anga lang, hman kawpa hmeh bel lah chu a thiam na laileng. A Reh Ka Ti tih hlaah hian perhkhuang tingtang nena mi an zai thup thupna hmun chu “a reh ka ti” a ti tlat nia! Reh tih chhan a nei a, sawi chiang lawk duh lova a chang dang thleng pawha thu a chaih kual hmasa phawt mai hi poetry ziaa tel ve chawk a ni reng a. Tunlai zai thiam lar tak K. Hminga’n “nang leh kei erawh hrang tura duan” tih sawi uarna atana thil inkawp rem hrang hrang a sawi hmasa teuh ang khan, Zirtei pawhin thil bengchhengte, hmun bengchhengte kha reh a tihzia uar takin a sawi hmasa a, a tawpa a sawi tum kha a rawn tifiah zual a; darthlalang bal hi tuiin kan han theh a, a phe ruai a; pawnchhe rovin kan han hru leh a, a lo fiah fim kak ang deuh a ni. Heng hlate mistiri thiam takin kuthnu mam leh mawi tak a siam chhuak ang deuh hi a ni a, mi themthiam takin hla mawi tak a phuah tih a hmuh theih.
Khawvel mawina kengtu ber chu khuarel (nature) hi a ni a, Albert Einstein-a’n, “Ngun takin khuarel hi thlir la, engkim chiang lehzualin i hre thiam ang,” a lo tih nghe nghe kha. Mizote hi kan awmna hmunin a zir kher em bawk a, kan thu leh hlaah te hian khuarel hmuh tur a tam em em mai a, kan hla phuahtu hmasate phei chuan khuarel hmangin Pathian an fak a, khuarel hmangin mihring hmangaihna thu an hril bawk thin. Rokunga te, Damhauhva te hi an hla pahnih khat avang chauh pawha nature poet tia sawi theih tur an ni a. Zun phur thingtin par leh khawtlang lii liai han tih ringawt mai te hi ngaihtuah tithui leh thûk tak mai a ni. Chutiang chuan Mizote zingah khuarel leh poetry hi a kal kawp tlat emaw tih mai turin eng lam hawi poetry-ah pawh hian khuarel hi a serh zinga a mei ang mai hian hmuh tur a lo inzep tel ve zel a. Zirtei poetry-ah pawh a bang bik lo.
A poetry tam takah khuarel hmuh tur a awm a, a zawng zawng rawn thur chhuak lovin Chul Tura Vul tiha chang hnih khat lek chu han chhiar chhuak ila:
Sawi nin theih loh Saron rawn vul lehin,
Sikni êngah nihawi an vul leh ang;
Zing daifimin reh ri rawn aupuiin,
Chuai tur chuailo par pawh an vul leh ang.
Zamzo parin bukthlam rawn mawi lehin,
Luidung mawiin tiauchhum a cham leh ang;
Sikpui hriltu tlangsam rawn vul lehin,
Derhken hnahsin tlaizawng an vul leh ang.
Liandala Zoram Pangpar, Mizo pangpar hrang hrang 21 lai mai a rawn lam chhuahna hla te lam lam kha ngaihtuahnaah a rawn lut hial mai. American ziaktu pakhat Laura Ingalls Wilder-i’n, “Khuarel hi i ngaina takzet a nih chuan khawi hmunah pawh thil mawi i hmu ang,” a tih kha he hla hian a rawn tar lang chiang em em a, a phuahtu hian zingah, thlasikah, luidungah, pangpar leh thlamah te thil mawi a hmu chiai chuai mai a ni. Tin, Khuanuleng Chawia Vul tih hlaah phei chuan chungchuang takin khuarel a vultir a; lei mite tana ninawm, hnawk leh hlauhawm — vangvat, thosi leh vaihmite te chu thil vul mawi sawina remchangah a rawn hmang hlauh va, rem a hriain hla châk lakna a nei tha hle. Zirtei hian he hla a phuah hi chu a la inchhir lo telh telhin ka ring.
Heng kan hla tar lan takte bakah hian Ka Ngaih Loh Che Ring Suh te hi hmangaihna hla (love poem) a ni chungin khuarel (nature) a bilh tel teuh va; a subject ber ni lo mah se, tu emaw a ngaihzia sawi nan khuarel mawina a rawn hmang a. Reginald Holmes-a’n a poetry pakhat The Magic of Sound chang tawpnaah chuan, “Lei hian a ngaithlatu tan rimawi a chhuah” tiin a sawi a. A dik thei viau ang. Khawvel hian a hrethiam duh tan leh a zawngtute tan rimawi chu a lo chhuah ngei mai a, Zirtei pawh chîk leh chiang taka lei rimawi ngaithla thintu a nihzia hi heng a poetry hrang hrang atang hian a hriat theih a; Ka Ngaih Loh Che Ring Suh-IV-ah phei chuan Lunglen nachang hre lo / Khuarel mawina pawhin / A tihlunglen loh chu / Chhaw chi khatin an chhaw a rawn ti hial reng a ni. Zirtei hi khuarel mawina pho chhuahna kawngah tan han lain han tãl na leh deuh sela, thangthar Romani a nih theih lohna chhan tur a awm lo vang. Romani hla tlar Thal awiin leltepa’n lenbuang a nghak tih leh Zirtei hla tlar Turni thangvan zawlah a her luai a / Sangpar mawi leng tinten tual an chai e tih hla tlarte hi an sawi chhuah dan a hrang na a, a mawina leh thinlunga hna a thawh dan hi a inang deuh reng a ni.
He lehkhabu hian hringnun thu thukphum (philosophy) a rawn hai hawng tha hle mai a. Mihring nun hlimna leh hahdamna hi khawiah emaw, engah emaw zawn chiama hmuh mai chi nih lohzia leh, hahdamna chu keimahniah, kan ban phak maia awm a nihzia te pawh chiang takin Hahdamna tih hlaah a dah a. A poetry-tehi kan chhiar nge aman min chhiar zawk tih hriatthiam harsa khawpa keimahni nun theuhva dik, kan lo amen-pui thlap thlap theih thu dik awm sa, sawi chhuah leh puan chhuah nachang kan lo hriat si lohte kha ani chuan a rawn sawi chhuak zat zat a ni ber a. Tar Hri tih te, Zawhna tih te, Thurawn leh I La Dam Asin tih te hi mahni inbunruahna hla a ni satliah lo. Hla thupui fun tak, thukphum tha tak nei a ni. Prof. RL Thanmawia chuan, “Poetry chu romei ang deuh hi a ni, a fiah lo riai a, chu chu a duhawmna leh a mawina a ni,” a ti a. Zirtei hla tam tak pawh chutiang deuh chu a ni. A hla thenkhat chu a sawi tum ber ngaihtuah chet chet ngai te a ni a, thenkhat chu a sawi tum, a theme ai mahin a sawi chhuahna hmanrua, a structure kha a pawimawh zawk niin a lang bawk. Thenkhatah chuan a sawi tum sawi lawk lovin a vehthlem hmasa a, a pehhel kual tê tê a, Nakinah tih hla chang khatnaah chuan Ih e / Eng tikah emaw / Nakin lawkah pawh a ni maithei / Nakkumah pawh a ni mahna/ I tar hunah daih pawh a ni thei ang tiin a rawn sawi lawk hmasa tê tê a, a chhunzawmna châng dangah a sawi tum a rawn sawi ta chauh a ni. Hei hi prose chu ni sela emaw, tu emawin khawiah emaw a thu sawi chu ni sela, ninawm a chang hman maithei. Mahse, poetry-ah chuan tuamtu thuam mawi tak ang a ni a, poetry danglam nihtirtu, a hlutna tizualtu a ni zawk hlauh thung.
Hmeichhia zawng zawng inanna chu, ‘Kei chu hmeichhe dang ang ka ni lo’ an ti vek hi a ni. Hmeichhe dang aia luhlul zawk ni awm tak hian, ‘kei chu ka luhlul a nia’ te hi an han ti thlazen a. Hmeichhe nihna te hi anmahni vek hian an tuipui em em a, Zirtei pawh hi a bang chuang lo. Hmeichhia tih hlaah hian hmeichhe zia leh nihphung a rawn tar lang thliai thliai a, Hmeichhia chu / Duat la, i rawng a bawl ang tih vel a ni. Hengte hi a nihna takah chuan duat an phût vang mai mai te pawh a ni thei; Chawm la, pa nuamsaah a siam ang che tih te pawh chawm an duh vang zawk a ni, chawm ngaiin pa nuamsaah min siam hauh lo vang, tih theih tur a ni a. Mahse, a phenah thil tangkai tak a hmuh tur a awm tel. Mi tam takin an ngai neih khuarelah thil mawi a hmu ang hian, he a hlaa thil mawi hmutu chu tlangval zei tak a ni thei dawnin a lang. He hlaah zeina kawng shortcut min kawhhmuh a, keini a zei sa tan erawh a tangkai lutuk lo maithei. Chutih rual chuan mipate chona, mipate tlakhniamna, tan lak a tulna a rawn tar lang a, a hla tawp ber Ka Rum Vawng Vawng A tihah pawh mipate tan lak ngaihna tur thil tho a rawn tar lang tel a ni.
Hmangaihna (mipa leh hmeichhe inhmangaihna) hian tleirawl tê atanga tu mawng beng tawhte thleng hian a lo thliar hauh lo, ang khatin a dêng na reng tih tilangtu pakhat chu he lehkhabu hi a ni. Duhtak Horatio tih chuanna hla hi pariat (8) ngawt zuk awm tehreng a! PB Shelley-a’n “Inhmangaihte hmuiah thlarau an intawk,” a lo ti a. Hei hi Zirtei Ni Khat Tal Chu tih hian a rawn tar lang chiang. Ani chuan minute tinin thlarau pahnih intawhtir a duh a ni! Hei hi chu sawi chhunzawm thui lo vang. Hei lo pawh hi rau dang hmuh tur a awm bawk. Theih Se tih hi a hla hming atang eng rau nge tih a rin zawn theih, hmui rau nge hnuai rau tih chu chhiartuten an chhiar huna an ngaihtuah chhunzawm turin dah ang. APJ Abdul Kalam chuan, “Hlimna vawrtawp leh lungngaihna thuk ber atangin poetry a lo chhuak thin,” a ti a. Zirtei hian hei hi a rawn nemnghet a. Tuna kan sawi tak bakah a pa a sunna hla te, a nu a sunna hla lungrun leh lungkuai tak tak te hmuh tur a awm a, hlimna vawrtawpin a hrin ni awm tak Mi Dang A Dip Loh Chuan tih te hmuh tur a lo awm bawk, Duhtak Horatio kaltlangin.
Dylan Thomas chuan, “Poetry tha hi thil pek ropui tak a ni. Poetry tha a pian chhung chuan khawvel hi a ngai reng dawn lo. Khawvel hmelhmang a thlak danglam a, mihringte chu mahni inhre chiang tur leh kan chhehvel khawvel hre zau turin a tanpui a ni,” tiin a sawi a. Poetry tangkaizia chu a tar lang chiang hle. Dylan Thomas sawi ang deuh hian Fardawn bu hian poetry tha tam tak a rawn chhawp chhuak a, mihringten beiseina kan neih tlatna tur thil a rawn dah chhuak teuh va, finthuril tam tak hmuh tur a awm a, mi dangte fuih phurna thil te, khawvel mawina te, mahni leh kan chhehvel thil hriat chian lehzualna turte, hmangaihna hnathawh leh thil tihte hmuh tur a awm fur. Chuvangin Fardawn hi lehkhabu tha, poetry tha chilh khawmna bu a ni.
