Harmony in Verse

• F. Vanlalrochana
  (A ziaktu thu leh hla dang chhiar duh tan a hmingah click rawh)

Saphovin music tia an sawi mai, rimawi kan han tih hi a fiah em em mai a. Chu rimawi chu, ri (sound)-ah te, hla, a thluk nei leh nei lo, a chhiar, chham, hrilah te hian a awm vek mai. Rimawi tirimawitu ber chu, ‘harmony’ kan tih hi a ni a. Rimawi han tum rik leh han zai a, ri inchawih mawi leh rual tak, part hrang hrang filawr bik awm loa an rik mawi mam nalh em emna hi Harmony chu a ni a.  Eagles band te hi an zai leh an music hrim hrim hi, an harmony a tha em em mai. An aia tha hi a awm lo ang. Southern Gospel group The Booth Brothers te pawh hi harmony an nei tha em em mai. Hetiang harmony hi poetry-ah a awm ve bawk a. Chu chu kan sawi tum a ni lo a. Poetry-ah hian hian, poetic technique chi khat, Poetic Harmony tih hi a awm leh bawk a. Hei hi sawi a chakawm a, kan mamawh tak ni te pawhin a lang a. Mahse, hei pawh kan sawi tur a ni lo.

Kan sawi tak,  hlaa rimawi kan hmuhah chuan nun hi a chawl thin a. Mi pakhatin thil dang nen inremna a lo nei a. Hah a dam a, khawvel lungkham buaina lak ata min la hrang thin. Inrem lote min inremtir a, buaina leh harsatna lak ata min la kiangin, inpumkhatna te min thlen thin. Chu lam chu kan sawi tur a ni.

‘Poetry-in harmony a thlen’ chungchang hi kan sawi dawn a. Harmony awmzia hi music technique lam ni lo, mihring nun kaihnawiha kan sawi dawn chuan, inrem taka awm, inhne rem, inpumkhat tihna te pawh a ni thei ang a. Kawng thumin, poetry vanga harmony lo awm dan chu a khaikhawm theih awm e:

1. Poetry-ah hian, hla phuahtuin khawvel leh ama thlarau nen inremin a awm a. Muanna a hmu thin.
2. Poetry-ah hian ngaithlatu, chhiartuin, khawvel leh ama thlarau nen bakah, mi dangte nen pawhinremin, inpumkhatna a nei.
3. Poetry avangin chi leh chi, hnam leh hnam inremna a awm a, inpumkhatna a thleng.

Nobel Prize in Literature-te pawh an pek hial, Bob Dylan-a hi Jimmy Carter-a’n a campaign-naah zai turin a sawm a. A lo hnar a. A hnarna tawngkam chu, “Kei leh ka thiante tana ka hlate hi phuah ka ni, chutianga zaina atana phuah ka ni lo,” a ti. Bob Dylan-a khan a hla phuahin a hahchawl a. Chung a hlateah chuan a thiante nen an chawl bawk tihna a nih chu.  Mihring chuan a thinlung indona ramah chuan chawlhna zawngin ‘hla’ a bel a. Hla hmangin a nun bun ruakin a inpaih thawl a. A nun a lo chauh changin chung hlaah te chuan a kir leh thin a ni.

American politician ropui, Robert F. Kennedy khan a ngaisang khawp a, poetry hi. A u John F. Kennedy-a a thih a, a lusun khawhar hnemtu ber pawh kha Poetry a ni, a chhiar thin. Greek poetry bu khat chu a u nupui Jackie Kennedy pawh kha a pe ve nghe nghe. 1968 US President thlan dawn hnaih khan President nih tumin a bei a. CIl Right leader Martin Luther King-a a lo kha kah hlum a han nih kha, Indianapolis khuaa mipui pungkhawm hmaah, Dr. King-a thih thu puangin, hmasang Greek Poet pakhat Aeschylus-a poem

Even in our sleep, pain which cannot forget
falls drop by drop upon the heart,
until, in our own despair,    
against our will,
comes wisdom
through the awful grace of God.

tih kha a chham chhuak a ni. Khami zan khan a thusawina khua Indianapolis-ah chuan buaina a chhuak lo a. Hmun dangah chuan buaina a chhuak niin an sawi. Mi hang leh mi ngo inkarah inpumkhatna a thleng a. Chu chu poetry chham paha thu a sawina avang a ni.  Heta a zualko thu hi chipchiarin THINGSERH bu-ah khan ka ziak a ni.

Hla hi a phuahtu inpuan chhuahna a ni a. Chu an inpuan chhuahnaah chuan, an rilru tawt lutuk te a tithawl a. Mi rilru tawt lutukin an lo chhiarin an rilru a thawl phah bawk a. Music a ni emaw, Poetry a ni emaw, therapy a tling.  Lal Saula’n a tih buai reng mai, lei do nei reng, a fate nena buai, Davida kha Pathianin a hruai thin a. Chumi a puan chhuah nan hla a hmang a. ‘Ka nunna hi mi siamthat thin a, Chawlhna Tuikamah te mi hruai thin,’ a ti a nih kha! Alexander Ropuia khan khawvel ram hrang hneh a, awp a tuma a kal kualnaah khan, Homer Poetry kha a keng thin a. A lukham hnuaiah a dah zel mai a ni. Indo mi, nun chawl lo khan Hla chu nun chawlh hahdamna atan a hmang thin a ni. Hla chuan nun a hruai a. Homer poetry te kha, greek sipaite fuih phurtu a ni a. Ral beihna hmunah leh mahni in hlata hla taka an kalnaah pawh phuar khawmtu a ni a, an inremna leh inpumkhatna siamtu a ni.

S. Africa ramah mi hang leh mi ngo inthliarna a nasa em a. Apartheid Policy hmangin a tlem zawk daih mi ngoho khan an let fea tam mi hangho kha an awp bet a. Chung hun laia mi hangte tana beitu ropui tak chu Nelson Mandela a ni. Kum 27 tan inah an khung. A rei vang vang hle a ni. Khang tanin hrehawm tuar chhuahtir theitu chu Poetry a ni. WE Henley-a hla Invictus kha ni tin chhamin kum hrehawm kum 27 kha a tuar chhuak a ni. Apartheid Policy thiatin S. Africa President a han ni a. An hnam pahnih, inrem lote suihzawm leh an ram tihdamna hna a thawk ta a ni.

A chhama chham chi mai ni lo, a saka sak chi pawh a ni vek. Hringnun chawlhna a tling. Lal Davida bawk kha ramhuaiin a tihbuai Lal Saula tan a zai a. Lal Saula rilru kha a chawl hahdam thei a nih kha.  Hla tam tak chanchin hi han chhui i la. A phuahtute bik hulna leh an inhumhimna, an refuge a ni a. Tah chuan an thla a muang thin a. Keini chhhiartu, ngaithlatuten lungmuanna kan lo chang ve thin a ni. Mi dangte nen inremin min siam a. Khawtlang a tipumkhat a. Kan thlarau leh kan taksa hmun khatah a suih fin a; hlain finna min pek te, muanna min pek, hahdamna min pekte hi a man pek dawn a ralah chuan a to fing fing khawp ang. Mana lei rual a ni lo.

Berampute khan Lal Isua pian thu hrilh an nih khan van zaipawlin hla hmangin an rawn chhilh a. Chutah chuan rem lenna thu an rawn puang a nih kha. Remna leh hla hi a inhmeh bik a ni. Kan thinlung no a luh chilh pha a. Lei leh van inpumkhatna siamtu leh puangtu leh puan nana an hman pakhat chu hla a ni.

Capt. LZ Sailo-a hla, ‘Insuihkhawm leh zai I rel ang u,’ tihin, Mizo hnam hrang hrangte inpumkhatna leh inremna leh insuihkhawmna kawnga nghawng a neih dan hi a zir a, zir tham a ni awm e. Chutiang bawkin Tiau lui chhak leh thlanga Zofate inkar siam thatna kawng sialtu, inremna thlentu hmahruai chu T. Zorampela hla, “Chhaktiang kawlrawnah leng mah ila,” tih hi a ni. Sawi zau tur tam tak a awm a, M. Phil topic tham a niin ka hria.

Bankim Chandra Chatterjee-a Poem, ‘Vande Mataram’-in India zalenna sualtu, India hnamte inpumkhatna a thlen dante leh a tihphur dante hi a ngaihnawm. Indian national movement-a poetry nghawng nei thuk ber a tling hial maithei. Vantlang hriata hemi poetry chham (recite) te pawh hi an khap hial a ni. He poetry hi, Anadmath Novel atanga lak chhuak a ni a. ‘Ode to Motherland’ tiin a sawi thei ang.

Rokunga a sawi loh theih loh a. Mizo Poetry Society pawh Rokunga birthday hisap rana din a ni a. Upa Rokunga hlate khan Mizo khawtlang a phuar khawp a. A hun lai khan kohhran a fir em em hun lai a ni a, love song sak a rem em em lo a, kaihlek hla te an siam a. A bikin thalaite khan chep hlein an inhre thin. Khatih hun lai khan kohhran huat theih hauh loin ram ngaihhla kan tih angte a rawn phuah a, thalaite tuihalna nasa takin a chhawk a. Kohhran lak ata an hla lutuk tur a veng a, khawtlang a inremtir a, nu leh pa leh an fate a suihzawm a. YLA lo ding chho nen, Mizo hnam inpumkhatna a siam a. Mizo khawtlang a thui khawm mawi em em a. Harmony in verse kan sawi hian, Rokunga leh a hlaten Mizo hnam leh khawtlang a nghawng dan hi kan sawi hmaih thiang lo a ni.

Hlaah hian mihring leh van a inzawm a, mihring leh lei an inrem a, mihring leh mihring an inrem a, mihringin amah leh amah a inrem a, chutiang dinhmun a thlen chuan, a nun buai, tlan, tlu leh kham leh suara tluk leh tlak fawma a damchhung ni chhiar thin khan chawlhna a hmu thin a, muanna a chhar thin a ni. Inrem loten inremna an nei thin a, inpumkhat lote an lo inpumkhat thin a ni.

Ka lawm e.

(He thupui ‘Harmony in Verse’ tih hi Mizo Poetry Society (MiPOTY) in February ni 20, 2021-a Foundation Day-a kan lawm tuma F. Vanlalrochana sawi a ni a, ani hi Mipoty Executive Member a ni).