‘Hla leh Hnai’ thlirlawkna

• Dr. H. Laldinmawia

Hla pakhat hi a awm a, hla pawh a ni leh chiah lo, thu ziak a ni zawk. Hla chang rem dan (stanza forms) engmah a nei lova, thu ziah dan pangngai anga ziah vek a ni. Mahse a thuziak tlang dinglam chu a in rual (justify) loh a ni a, chu chuan tlemin hla a ti ang ve deuh. Chu thil chu thuziak pangngai emaw ka tih laiin, a thuziak kalhmang inzawm loh dan aṭang chuan hla ni deuh bawk siin ka hria a –

Chu hlaah chuan van sang taka Thlawhtheihna thlawk avang chuan lei chu a fiah loh thu leh, lei aṭang pawhin van sanga thlawhtheihna chu ‘tin ther tia’ chauh a nih thu sawiin ‘Hla tak aṭang chuan engmah hi a lo fiah zo tak tak lo a lo nih dawn hi’ a ti zui. Tichuan, a thawnthu chu a sawi zawm a – Van aṭangin tlak muanna (parachute) hmangin mipakhat hi a rawn uai thla a, chu chu puitling leh naupang ten an lo thlir a, a mawi an ti a, TV-a mi ang mai niin an hria a, an haw haw dur dur mai. Chu mi chu a lo hnai zel a, thingbuk bulah chuan a rawn ṭum ta dawt mai a, amah hmuh chaka an tleh phei dual dual laiin ‘Hmelma sipai’ a lo ni leh si. Nu pakhat chu a au ṭe chul a, patling rual chu lungtum leh tiang nen an tleh phei a. A thlirtu leh he hla ziaktu hian ‘naupang mai kan ni si a, kan chiaiin kan mangang hle a’ a ti. A hmun an va thlen ve chuan, thi hnuangin an va hmu a, biak tur a awm tawh lo. ‘Min han tihhlim hman vei nen, min bei turin maw i rawn thlawk zawk’ an ti a, an hmai te chu a sen awn awn a a tih hnuah, heti hian a sawi zui a –

“Engtiang takin nge maw hmun hla leh hmun hnai hi a lo danglam theih le? Nichin maia kan lawm em em, hmuhnawm kan tih em em kha, tunah chuan hmelma a lo ni leh ta reng mai si a” ka ti rilrua’ a ti. Tichuan he thawnthu hla hi he lehkhabu hming chawi chhan hla pahnihna ‘Hla leh Hnai II’ -a a thil sawi a ni a. He hla aṭanga ngaihtuah chuan, he lehkhabu hming hi ‘Hla’ (far) leh ‘Hnai’ (near) tihna niin ka hria a, ka ngaihtuah zui a, lehkhabu hming (title) mawi tak niin ka hria.

Chutiang ngaihtuahna ka neih mek lai chuan, a lehkhabu kawmah hian ‘Hla leh Hnai’ (Poems and Aphorism) tih a ni thung a. A subtitle aṭang hian ka buai deuh ṭan nghal. ‘poems’ chu ‘Hla’ a ni a, a dik mai a. ‘Aphorism’ hi ‘thufing/thu ril’ tihna nia ka hriat laiin ‘Hnai’ tiin a dah leh daih lawi a. Zo Ṭawng Dictionary chuan ‘Hnai’ chu ‘tuihnang/tui sawr’ tiin a sawifiah a. “Aphorism’ nen hian a intluk chiah em ka hre lo. Pu Buanga dictionary chuan ‘exudation’ a ti bawk a. Engpawh nise, hla hi rilru leh suangtuahna aṭanga lo hnam chhuak, ‘rilru hnai’ chu a ni ve mai em? tih pawh ngaihtuah theih a ni. James Dokhuma ngei pawh khan a hla te kha ‘Ka rilru farchhuak’ a ti ve tho mai. ‘Hla leh Hnai’ hi hla pahnih a awm a, a pakhatna chu –

I hriat reng thil ai chuan
i nghilh tak thilte khan
an hnaih fe zawk e
i tana an nihna dik tak chu, tih zawng a ni. He hla aṭang erawh chuan ‘Hla’ (far) leh ‘Hnai’ (near) a kawk leh chiah lo thung maithei/ ‘Hmanlai’ (thil hla) leh ‘tunlai’ (thil hnai) ti zawng pawhin a sawi rem leh theih tho bawk. Buaithlak tak, ril ru riau, mawi danglam tak kan hmu a, ‘postmodernism’ hla ziarang kan hmu.

Postmodern post langsar Edgar Allan Poe te Emily Dickinson te leh Indian postmodern post Nissim Ezekiel, Kamala Das, A.K. Ramanujan leh Jayanta Mahapatra te ang deuhin Dustin-a hian a hla tawi te te-ah hian ngaihtuah zui ngai thu thup tam tak a puang chhuak a. Mizo zinga postmodern poetry ziaranga hla phuah zingah Lalzuahliana te nen huang khata dah chi an nih hmel.

Postmodernism/ postmodern poetry hi 1960 chho vel aṭanga inṭana ngaih a ni a. Modernism huangah kha chuan ziak miten anmahni chungchang te, an chhungril nun te, suangtuahna lam thil te an tuipui laiin, postmodern hi chuan pawn lam thil te, a chhiartu lam chan te, ngaihtuah zui ngai te, thudika innghat te, thu ril leh hriatthiam har tak tak, hrilhfiahna (interpretation) tam tak awm thei chi te an tuipui thung a. Chutiang ziarang chu Dustin-a hlaah hian kan hmu.

Postmodern thu hi a rilin a fing (intellectual) a, a mawiin ngaihno a bei (artistic) lawi a. Mihring nun hi kawng dang daihin an thlir a, an thlirna ang ṭawmpui thiam harsa deuh te, mi thlir loh lam daih tea thlir te an ching a. An thu chhakchhuah chu hriatthiam mai har ta, hriatthiam hnua dik leh ril deuh nia kan hriat, mahse kan hriat dan leh pawm dan in ang chiah chuang si lo te hi an phuhchhuak thiam a. ‘Abstract painting’ nen an tehkhin hi a dik viau mai. Thumal pakhat pawh hian awmze dang daih a lo nei chawk. Chutiang ziarang chu Dustin-a hlaah hian kan hmu.

He lehkhabu-ah hian hla tawi te te 82 a awm a, phek 96-a chhah a ni. Chang khat hla hi 67 vel a ni. Vel ka tih chhan pawh hla thenkhat hi chu a sei deuh a, a karah full stop awm zi lovin space a awm a, chang khat hla a nih leh nih lo ka chiang ngam lo. Thu rem dan mak deuh deuha hla phuah a awm nual.

Heng hla 82 zingah hian ‘Leilawn chelhtu’ leh ‘Leilawn chelhtu -II’ hi a ṭha riau ka ti. Leilawn chelhtu chuan –
I lawn san tawh tehlul nen,
eng vanga leilawn chlehtu chu
hnualsuat ta mai nge maw i nih le? tih leh ‘Leilawn chelhtu II’-a
I la lawn hniam tehlul nen,
eng vanga leilawn chelhtu chu
hmu pha ta lo nge maw i nih le? tih a ni. A thu hi a tawi viau na a, mihring nun chhungril hi a phawrh tlatin ka hria. Mihring hi tun dinhmun kan thlen theihna tura min dawmkangtute hai der a, mahni theih tak emaw ti ta mai chi kan awm fo. Chutih rualin eng teh ual kan la nih loh tehlul nen, min dawm chhoh tum tute ngaithei lo leh theihnghil ta mai chi kan awm thei bawk. He hla chang thlan hmang hian ‘sermon’ tawi thlak theih niin ka hria.

Lalzuahliana kha kan sawi zawk a. Lalzuahliana khan hla tawi te te, hriatthiam har tak, hriatthiam deuh hnua ril riaua hriat theih tur hla kha a phuah nual a. He lehkhabua hlate pawh hi chutiang chu a ni. Mafaa ṭawngkau chheh han hawh ta ila, ‘A hla te hi a mal te te a mal malh malh’ tham a awm a. Tun ṭumah hian kan mal seng lo. Ka mal theih chin pawh hi a then ka hrethiam a, a then chu ka hrethiam nge hrethiam lo tih pawh tih ka hrethiam rih chiah lo!

He lehkhabuah hian a thu nena inmil deuh mai lemziak tereuh te a awm hlawm a, hei hian a thu a ṭanpui a, a tifiahin chhiar a tinuam sawtin ka hria. A kawm chhungah hian ‘illustration – Dustin Lalkulhpuia’ tih a inziah avangin heng milem zawng zawng hi a ziaktu pa ziah vek hi niin ka ngai a. Lemziak pawh a lo thiam khawp mai. Lalzuahliana ‘Saruak Hlimthla’ lehkhabua lemziak ngawt ai chuan hriatthiam a awlin mi a hip zawk bawk!

A kawm pawh hi a ziaktu design tho a ni a, thla latu hi Johny Ngurthansanga a ni. A kawmah hian lawngpu pakhatin a lawng tlawm takah mi pahnih, bungrua engmah nei lo a phur lai lem a awm a. Chung lam aṭanga lak a ni a, an hmel a hmuh theih loh thung. A chung aṭanga hnai taka lak a ni a, mahse a lawnga chuang te hi chuan hla tak pan an la tum niin a lang a, a chhan chu a li hi a dum kuk mai a, vau kam an la hnaih lo tlatin a lang. Chuvang chuan a lehkhabu hming ‘Hla’ leh ‘Hnai’ tih nen pawh a in rem viau em te ka ti.

A hla mal te te hi chhiara chip zui zel a chakawm. A hla kan hriatfiah leh leh kan hrilhfiah duh dan a in ang lo maithei. Chu ngaihdan in ang lo hmanga inhnial nak nak pawh a chakawm. Amah ngei pawh hian a thuhmahruai-ah ‘keimaha a fiah ang hian nangmahah a fiah ve kher ang em, ka hre lo. Kan thil tawn a zira thlir dan hrang hrang nei kan ni miau si a le….’ a ti hial reng a ni..

(19th October, 2024 at Zarkawt Recreation Centre)