Hla Ngainatu Kamchhuak

• Dr. Lalbiakdiki
  (Asst. Prof, Mizoram Christian College)
  Fin. Secy, Mizo Poetry Society

Khawvela hnam hrang hrang zia phochhuaktu pakhat chu thu leh hla (literature) hi a ni. Eng hun pawh ni se, hman aṭanga tun thlengin, hnam ropui leh ropui lo tehna chu an thu leh hla a ni fo. Khawvel history kan thlir chuan, hnam ropui kan tih te hi thu leh hla a hausa hmasa te an ni chawk. Literature rau rauah pawh hian, hla hian chhiar leh hlut a hlawh zual emaw tihtur a ni, hnam dang, ram dang thu leh hla zir chianna ah pawh hla chu a ram mipuite lairil luahtu lian ber a ni zel. Mizo te pawh zai ngaina hnam kan ni a, kan hlim leh lawm, lungngaih leh mangan nikhuaa kan inhnemna pui ber chu hla a ni. Hla hi kan suangtuahna chhungril ber ber kan phawrhchhuahna, ram chanchin leh a chhunga chengte nihna (identity) nena inzawm tlat a nih vang hian thuziak dang zawng aiin zûn a nei emaw tih mai tur a ni.

Hla (Poetry) kan tih hian hrilhfiahna hrang hrang a nei a, ṭhenkhatin thluk nei, a sak a sak chi chauh hi hla an tih rualin, a ṭhen chuan ziaka awm leh chham chi an huam tel tir a, ṭhenkhatin ziak leh chhiar kan thiam hma oral tradition pawh a huam tel e an ti. Hla phuah hian ken tel hrang hrang – poetry zeṭhuang (genre), ruangam leh ruhrel (structure), poetic techniques hrang hrang (figure of speech) leh adangte a nei a, chutiang nei kherlo ‘free verse’ kan tih te pawh a awm bawk. Engpawhnise, Mizo Poet hriat hlawh berte zinga mi leh Mizo Poetry-a doctorate degreenei hmasa ber R. L. Thanmawia chuan “Poetry tih hian a thluk nei huam thei tho mah se, a thlûk nei lo a ni tlangpui a…” (History of Mizo Literature, 67) tiin poetry a hrilhfiah. Mafaa Hauhnar chuan, “Hla hian tluk a neih leh neih lohin poetry a nih leh nih loh a hril ber lo va, a hla khan poetic quality a neih leh neih lovah a innghat zawk,” (Thlaler Aurawl, 131) tiin a ziak bawk. Hei hian hla (poetry) kan tih hian a huam zau zia a tarlang awm e. 

Poetry hi khawvelin kan hmelhriatna a rei tawh hle a, mihringin ziak leh chhiar a thiam hma hauhin poetry hi an lo phuah tawh ṭhin a ni. Kan Mizo history kan en chuan, kan pi pute hunlai daih tawh khan hla chham mi kan lo nei ṭeuh tawh a. Chung hlate chu kan pipute nungphung, an tawnhriat leh huntawn hriatpuina leh zirchhianna hmawraw pawimawh tak a ni chho ta zel a ni. Chu mai bakah, kan ram leilung leh a mawina, khuanu thilsiam leh khawtlang lunglen kan hril chhuahna chu hla a ni fo ṭhin. Mizo hlakungpui zinga mi Vankhama chuan Mizoram hi ‘Rimawi Ram’ (the land of Sweet Sound) a ni e a lo ti hial. A ni taka, kan ram leilung, lentupui leh romei zam chiai te hian lung a kuai bik tlat hian a hriat ṭhin. Hla phuahtu te pawh hian an chhehvel khuanu mawina an chham chhuak fo reng a.

Mizote hi hla phuah kawngah kan duai lo hle. Mizo Poetry tihausatu tamtak zingah hmeichhe phuahtute han thailang hram ila. Mizo hmeichhiate zinga hla phuahtu kan hriat hmasak zinga mi chu Pi Hmuaki kha a ni mai awm e. Pi Hmuaki khan hla a phuah hnem hle a, a phuah hnem thawkhat viau aniang an khaw mi ten an ngaimawh ta a, “Ṭhangtharte hla phuah tur zawng zawng a phuah khalh dawn e” tiin tihhlum zai an rel a, tichuan Pi Hmuaki chu a nung chungin an phum a, “Nauva-te u, nau haia-te u, ṭha te te khan min han chhilh rawh u,” tiin a hnukchah dawn thlengin hla a la phuah. Pi Hmuaki hnualam kum zabi 18 & 19 vel, British hovin min awp hma hmeichhe hla phuahtu kan hriat lar te chu, Darmani, Darpawngi, Laltheri, Lianchhiari, Aikhiangi leh Saikuti te an ni. Kum zabi 20 na ah Romani leh Nuchhungi an lo lang ve leh a, kum 2000 hnulam ah phei chuan, hmeichhe hla phuah mi an awm ta nuk mai, hmasawna ropui tak a ni. Jawaharlal Nehru, India Prime Minister hmasaber pawh khan, “Hnam dinhmun hriat nan an hmeichhe dinhmun en rawh” a ti a, hmeichhiate Mizo poetry huanga hmasawnna kan hmuh hi thil ropui tak zawng a ni ngei ang.

Hun a lo kal zel a, Mizo poetry pawh a zira zir tham (research work) kan lo nei ta. Literature genre hrang hrang zingah hla (poetry) leh hla phuahtu (poet) kan pung zel a. Kum 2000 hnu lamah phei chuan Mizo hla phuah mi an lo chhuak zel a, chutiang lama tui mite pawh pawl ah indinin, Mizoram hmun hrang hrangah leh zirna inah te, hla ngainatu pawl ṭhahnem tak an piang zel, chung zingah chuan ‘Mizo Poetry Society’ (MIPOTY) hi hmaih phal chi a ni hauh lovang. Mizo Poetry Society (MIPOTY) hi February ni 20, 2016 khan Prof. RL Thanmawia hova din niin, Mizo poetry ngainatu engemawzat telna a ni. He ni hi Mizoram State Day a nih mai bakah Poet of the Century-a puan, Pu Rokunga piancham vawi 100-na a ni a, amah hriatreng nan leh Mizo hla phuahmite inpawlkhawmna atana din a ni.  Kum tin Poetry Festival leh Poetry lam hawi programme hrang hrangte huaihawt ṭhin a ni. Tin, he pawl a din hma, kum 2016 hma lamah kha chuan hriat theih chinah poetry ziakna lehkhabu hi 33 vel chauh a chhuak a. Kum 2016 hnu lamah hian chhinchhiah theih chinah poetry bu 54 a chhuak tawh a, chung bu 54 phuahtu zingah mi 23 chu hmeichhe ziak an ni. Heng bakah hian Mizo Poetry Society hian ‘Zaikungthar’ tih hming vuahin poetry dahkhawmna lehkhabu panga (Zaikungthar Volume 1-5) lai a tichhuak tawh a ni.

Hla chu hlaphuah mite’n ṭawngkam bungraw hrang hrang hmanga an infiamna hmun a ni ti ila kan sawi sual awm love. Poetry ziah hian kum bithliah a nei lova, hausa leh rethei a thliar lem lo, mi tinin kan phuah theih leh hlut theih a ni a, mi thiamte thiamna belhchhahtu, mi naran pawhin ṭawng hmanga kan suangtuahna kan thai chhuah theihna, zirlaite tan lah thumal hriat belhna leh ṭawng zirna hmanraw ṭha tak a ni bawk. Poetry hian mi tin min phuarkhawm a, kan khawhawi leh rilru tizautu ṭha tak a ni mek zel. Mizote zingah pawh hla phuah lama tuimi kan pung zel a, ṭhangthar hla phuah mi ṭhahnem tak kan neih belh zel bawk. Hetianga poetry lama tuimi kan awm chhung chuan kan ṭawng leh kan hnam hian hma a sawn zel ang.

(He article hi February 20, 2024-ah khan ni tin chanchinbu The Zozam Times-ah tihchhuah a ni a, MiPOTY Foundation Day puala ziah a ni, A ziaktu hi MIPOTY Finance Secretary a ni e).