Hmeichhe thu te lek lek
National Family Health Survey (NFHS)-in India rama kum 2019 aṭanga kum 2021-a hmeichhia kum 15 aṭanga kum 49 inkar, a zirchiannaah chuan nu, nau nei tur zingah za zela 15% chuan an nau neih turah mipa hrin an duh a, fa atana hmeichhia hrin duh zawk erawh chu za zela 3% chauh an ni. Hnam ṭhenkhat kalphunga thlir dan nghet leh sakhaw rin danin a ken tel pakhat chu mipa dah pawimawhna leh chungnunna ‘androcentric’ leh hmeichhiate dah hniamna hi a ni tiin a sawi theih bawk ang. Tin, Bible-a bu hmasa ber Genesis 2:22-23 ah chuan: “Tin, LALPA Pathian chuan Adama laka a lâk nâk ruh chu hmeichhiaah a siam a, Adama hnenah a hruai ta a. Tin, Adama chuan, “Hei zet chu ka ruh ang ruh neia, ka tisâ ang tisâ nei ngei chu a ni; mipa laka lâk chhuah a nih avângin ‘hmeichhia’ tih tur a ni ang,” a ti a. Hmeichhia chu mipa laka lâk chhuah an nih thu kan hmu a, hei hian eng emaw chenah mipa chu chungnung zawk leh mipa chu siam hmasak an ni tih a lantir a ni. Hmeichhia hi siam an nih danah leh hmeichhe nihna chungchangah hian ngaihdan inmung a awm reng a, Greek mi fing Aristotle-a (384-322 BC) pawhin, “hmeichhia chu hmeichhia an ni a, a chhan pawh thil tam tak tlakchham an neih vang a ni,” tiin a sawi a. Heng rinna leh ngaihdan hian hmeichhia chu hnuaihnung zawk leh chak lo zawk anga thlirna hrang hrangte a phawk chhuak thei bawk awm e.
Heng ngaihdan tam tak leh tehna tam tak phenah hian hmeichhiate hian theihna leh thiamna pianpui an nei a, hmeichhe tel lo chuan mipa pawh a famkim zo bik lo tih pawh a sawi theih awm e. Hmeichhiate theihna leh thiamna hi thu leh hla khawvelah hian a lang chiangin, zirchian tham a awm tiin a sawi theih ang. Hmeichhia chu hmeichhia a nihna angin puipun nikhua leh ngaihdan sawi a nih nikhuaah ngaihchan ve vek an ni lo va, mipate rorelna leh ngaihdan nghet phena nung tura ngaihna pawh a awm thei bawk a ni. Hetianga tehna leh ngaihdan nghet karah chuan hmeichhia chuan a ngaihtuahna chhungrila a vei leh duhdan te chu thu leh hla kaltlangin, ri chhuah lovin a thu leh hla puanchhuah te hmangin ring takin a tlangaupui ṭhin tiin sawi ila a sual tam awm lo ve.
Hmeichhia chu a pianpui nihnaah ngawichawi zawk leh nu hnep tura ngaihna lian tak avangin hmeichhe ziaktu ṭhenkhat chu an hlahril phuah chhuahah hian an biru ṭhin a, an thuziakah te chuan ‘anmahni’ a bet tel tlat ṭhin. Hmeichhe hlimthla, an sawi rik loh thu tam a hmuh theih ṭhin. Chawlhna Thingthiang ziaktu Febry K. Zonunmawii chuan amah leh hlahril chuan inzawmna thuk tak an neihzia hetiangin a ziak a, hlahril chu hlarua ‘poetic techniques’ tam takte tel lo pawha phuah chhuah a nih pawhin, midangin hlahril an ziah leh an chhiar hunah pawh amah chu hrechhuak ve zel se la a duh hle a: hetiangin a ziak a:
“Ih maw, Poetry i chhiar a Chhamhla i duan a Hla-in a luah hunah che Mi han hre chhuak ang che Ka nihna min ṭawmpuitu a ni si a.”
tiin. Hmeichhe ziaktu dangte pawhin an hlahril phuah phenah hian a taka an lantir zen zen loh an chak lohna leh hreawmna tam takte, an chhungril zamna leh tahna hial hlahrilin an lo chantir bawk a. An inthupna phenah hian an inpuanna hai chhuah tur a awm nawlh nawlh ṭhin a ni. Hrui Kim Lo Rimawi ziaktu C. Januari chuan a hlahril ‘Ka Ṭap Ṭhin” tihah chuan heti hian a nun thim chu a ṭahpui ṭhinzia a puang a:
“Thinlung sakhat a keh a,
Harsatna thlipui a tleh a,
Thirchakai a chah hunah,
Nuna nung a lo thim hian,
Ka ṭap ṭhin.”
tiin. Hmeichhiate hlahril phuah tam zawkte chu tarlan kim sen rual ni lo mah se la, an thu leh hla tuipuina hian Mizo thu leh hla huang hi a zauh zel tiin a sawi theih awm e. Hmeichhe thu leh kamchhuakte hian ngaihchan hlawh lovin, kam tam nihna leh zak thei lo nihna hlawhchhuak hma viau mah se la; hmeichhiate nep lohzia te, khawvel leh leilung din tirh lai ata tawha hmun pawimawh leh lai lum luahtu an nihna pawh chu hmeichhe ziaktu Lalremruati Ngente chuan “Hmeichhia” tih hlahril Seih (2021) lehkhabu a tihchhuaha a ziakah chuan:
“Nang chu,
Leilung din tirh aṭang rêng khan,
Khawngaihna leh lainatna vawng tur leh,
Huatna karah pawh hmangaihna lantir thei turin,
Rilru no leh nêm taka duan i ni si a.”
tiin a ziak a. Hmeichhiate tan hmeichhe nihna chungchangah te, nunin hreawmna leh manganna a ken tel puanchhuahna leh mihring nuna an thlirna leh vei tam takte puanchhuahna atan hian tan thu leh hla huang hi a ṭha hle a. Hlahril hi hmeichhia, thu leh hlain thuk taka a fan te tan hian belh a nuam a, an tan chawlhna leh hahdamna a tling takmeuh a ni.
Nun an puanchhuahna piah lamah hian hmeichhiate hi thu leh hla huangah hmasawnna banpui an nihna chen a awm a. Kum tinin, hmeichhe kutchhuak lehkhabu, hlahril dahkhawmna pawh chhiar tham fe a chhuak ṭhahnem hle a. Hetiang taka thu leh hla tihausa tura hmeichhe thuziaktute fuih a, a phena nawr kaltu pawl pawimawh tak tak an awm a. Chung zinga chuan hlahril dinhmun chawisan tumtu pawl kum 2016-a din Mizo Poetry Society (MiPoTy) hmalakna leh ṭhahnem ngaihna hi sawi lan loh theih a ni lo a ni. He pawl hmalakna leh insuihkhawmna zarah hian Social Media platform a bikin Whatsapp, Facebook, leh Instagram lamah hlahril ṭha leh ril nun leh khawtlang dinhmun bakah hlahril thuken hrang hrang nei phuah chhuah ni tina chhiar tur a pung nasa hle a ni. A bika tarlan he pawl Mizo Poetry Society (MiPoTy) hmalakna hian lehkhabu Zaikung Thar (21st Century Mizo Poetry Series) chu Volume 1-5 thlenga tihchhuah a ni tawh a. He lehkhabu tarlanah hian hmeichhia hlahril phuah thiam 30 chuang hial an awm a. heng mite hian an hlahril phuah ṭhahnem takte chu he lehkhabu kaltlang hian an pho chhuak a ni. Mizo hmeichhiate kutchhuak lehkhabu hmuh tur a tam ta hle mai a, mipa thuziaktute kutchhuak chu chhiar tham awm ve bawk mah se, hmeichhe kutchhuak tam takte avangin Mizote thu leh hla pawhin hma a sawn nasa hle tiin a sawi theih ang. Mizo hmeichhe ziaktute hian Mizo ṭawng chauhin an veizawngte chu an puangchhuak lo va, Sap ṭawng pawhin an ziak thiam a, hnam dang ṭawng mah ni se, an kutchhuakte chu a theuneu lo hle a ni. Mizo hmeichhia, Sap ṭawnga hlahril ‘poetry’ tichhuak zingah chuan Purloined Emotions (2017) tih lehkhabuziaktu Debbie Rinawmi, Evermore (2018) tih lehkhabu tichhuaktu Candle Vanrempuii leh Niji-te, Handprints on the Clay (2023)tih lehkhabu ziaktu Laltlankimi bakah Secondhand Scars leh Guest of Eden (2022) ziaktu Rodingpuii te hi a sulsutu pawimawh tak an ni tiin a sawi theih awm e.
Hmeichhiate hi hnam hrang hrangah dinhmun hnuaihnung zawk chantirin, an ngaihdan leh thlirna te, an thinlunga an veite puanchhuah vek rem ve lo mah se, thu leh hla hmanga an inpuanchhuahna te chuan chhiar a hlawhin, ngaihnawm tih a hlawh hle a. An tuichilh tawh lam tui chilh a, an thu leh hla ngaihventu an awm phawt chuan a ṭha zawngin hmasawnna hi an kalpui thui thei hle a ni. Mizo hmeichhe kutchhuak te hian bengkhawn a hlawh zel theih nan, an lehkhabu te phochhuahna tur ṭha buatsaih hi Mizo thu leh hlaa pawl liantham tak tak bakah sawi lan tak Mizo Poetry Society (MiPoTy) vawiin, ni 20.2.2024-a Foundation Day hmangtu pawl thiltum a ni pakhat a. He pawl hian tun aia dinhmun sanga thu leh hla ṭha kaltlanga hmeichhiate aw hian ngaihpawimawh a hlawh zel theih nan hmalakna tur pawh an chhawp chhuak a, Mizo thu leh hla tihhausak leh a thlen chin huang pawh a zauh zel theih nan hna an thawk mek zel bawk a ni.
(He article hi February 21, 2024-ah khan ni tin chanchinbu The Aizawl Post-ah tihchhuah a ni a, MiPOTY Foundation Day puala ziah a ni, A ziaktu hi MIPOTY Executive Committee Member a ni e).
