Mizo poetry than chhoh dan

• Lalremruati Ngente
  (A ziaktu thu leh hla dang i chhiar duh chuan a hmingah click rawh)

Kamkeuna : “Mizo Poetry than chhoh dan” han tih hian, Poetry kan hrilhfiah dan azirin Poetry history kan chhui dan pawh a danglam dawrh thei ang.  Mizo Poet hriat hlawh berte zinga mi leh Mizo Poetry-a Doctorate degree nei hmasa ber R. L. Thanmawia chuan “Poetry tih hian a thlûk nei huam thei tho mah se, a thlûk nei lo a ni tlangpui a…” (History of Mizo Literature, 67) tiin Poetry a hrilhfiah a. H. Laldinmawia chuan, “Hlahril (poetry) chu poetic quality nei hi a ni’ ti ila a dik mai awm e” (Literature Lamtluang, 32) tiin a hrilhfiah ve thung. A sawi lut duh tan chuan hla thluk nei pawh sawi luh theih a nihna lai awm dawn tho mah se, Mizo tawngah pawh “hla” leh “hlahril” sawina tawngkam hran kan lo neih ve tho avangin, tun tumah chuan hlahril behchhanin Mizo Poetry than chhoh dan ka rawn sawi dawn a ni.

• Hunpui hmasa :

Poetry kalhmanga hla phuah hmasa te chu Awithangpa, Thanga (Thangthura), Liangkhaia leh Hrawva te kha an ni a. An ni ho hi hla hlui leh tunlai hla kalhmang chawh pawlha phuah an ni deuh nawk hlawm a, hla dangah an thawhhlawk viau nangin, hla hril lamah erawh kut chhuak an ngah hman viau lo thung. Kum 1930 chho velah chuan Mizo Poetry pawh a rawn chhuah chhoh belh zel a, hetih hun laia langsar ber chu RL Kamlala kha a ni awm e. Kum 1940 chhoah chuan Liandala te, Lalmama te, Chhuana te, Damhauha te, Vankhama te, Kaphleia te, L. Biakliana te leh Rokunga te an rawn chhuak chho ta phuk phuk a, Kum 1950 chhoah Zikpuii Pa, KC Lalvunga, P.S Chawngthu leh Capt. LZ Sailo te an rawn lang ve leh a, kum 1960 hnu lamah James Dokhuma te, Ngurchhawna te, C. Lalkhawliana te, V. Thangzama ten Mizo Poetry huang an rawn zauh ve zel a, anni hnung deuhah hian Lalsangzuali Sailo te, R.L. Thanmawia te, Laltluangliana Khiangte te, C. Chhuanvawra leh Lalzuahlianaten Poetry lamah kutchhuak thahnem tak an rawn nei ve leh bawk. Kum 1990 atanga a hma lam zawng hi hi Mizo Poetry huang chhungah chuan hun hmasa anga dah theih a ni a. Poet-te hla phuah dan kalhmang leh an hla hawi zawng thlengin kum 2000 hnu lama chhuak Poet teah hi chuan a danglam nasa tawh hle a ni.

• Hunpui Pahnihna :

 Kum 2000 hnu lamah hian thangthar hla phuah thiam hla hril lama kutchhuak nei tha tak tak an rawn chhuak nasa hle a. Kum 2016-a din Mizo Poetry Society-a inziak lut chin ngawt pawh hi an hming mal mana sawi mai sen an ni tawh lo hial zawk a ni. Hun hmasa lama hmuh tur la awm ngai mang lo, hlahril bu a chhuak chho mawlh mawlh reng bawk a. Mimal hla bu mai bakah Mizo Poetry Society-in kum tina an tih chhuah Zaikungthar buah thangthar poet hrang hrangte kut chhuak hmuh tur a awm reng bawk. Zaikungthar bu hi volume 4 thleng a chhuak tawh a, chung hla buah chuan Poet 100 bawr vel kutchhuak hmuh tur a awm zel a ni. Kum 2000 hnu lamah hian mimal Poetry bu 30 chuang zet a chhuak tawh a, hriat theih chinah  RL Thanmawia hlabu “Zanlai Thlifim te”, Lalzuahliana ziak “Lungmawl Selin” leh “Saruak hlimthla” te, Lalnunpuia Hrahsel ziak “Ngaihrilvawn” te, Lalnunpuia Renthlei ziak “Hringnun” te,  Jacob Vanlalhumhima ziak “Damdiai” te,  C. Lalhruaitluanga ziak “Chhamhla” leh “Thinlung tui far” te, Laltlanthangi JH ziak “Leikapui Zaiva” te, TS Khupchong ziak “Mim Fang Khat” leh “Ani Ka Lo Ni” tih te, Anita VL Nunmawii kutchhuak “Aikaih“, “Rip” leh “Nihawi” te, Ramlawt Dinpuia ziak “Rawlthar Awrawl” leh “Thihna Thahrui” te, Ramngaihawma ziak “Suihlunglen” te, Loretta Khawlhring ziak “Thu tawi leh ril” te, F. Vanlalrochana ziak “Pathian zawnna” leh “Hun tiauvut chunga len lai hian” tih te, Lalrammuana Sailo ziak “Tidamtu Rimawi” te, Rochharzela ziak “Thinlung Chawlhhmun” te, Febry K. Zonunmawii ziak “Chawlhna Thingthiang” te, Lalropara Pachuau ziak “Ka Lunglai Luahtu” te, Gladys Lalhruaitluangi ziak “Thulovi Thu” te, Malsawmhriatzuali Jacob ziak “Chhamhla” te, Amos MS Dawngzuala ziak “Hringnun Keh Them” te, Lalremruati Ngente (Aremruati) ziak “Sêih” te, C. Januari ziak “Hrui Kim lo Rimawi” te, Thuamtea Khawlhring ziak “Hringnun Hlapui leh Zo Lunglen”tih te bakah hian thuziak hrang hrang dahkhawmna lehkhabuah Poetry eng emaw zat hmuh tur a awm bawk.  Nikum 2021 atanga tun thleng hian kum khat vel chhungin Poetry bu 10 chuang zet a chhuak tawh bawk a ni.

• Mizo kutchhuak English Poetry:

Mizo poetry-in hma a sawn chhoh mup mup lai hian, Mizo kutchhuak English poetry lamah pawh hmasawnna a thang chak hle. Mizo kutchhuak English poetry bu hmuh tur a awm ve ta nual mai. Laldinkima Sailo ziak, “Sprectum” te, Lalremruata Sailo kutchhuak “Songs Of Camelia” te, John Laltluangliana ziak “Unsung Maudlin Monodies” te, Debbie Rinawmi kutchhuak “Purloined Emotions leh “Bellicose Warriors” te, Chami Chhakchhuak hlabu “Where Hearts Bleed and Memories Fade” te, rdp kutchhuak “Secondhand Scars” te, Malsawmi Jacob ziak “Four Gardens and Other Poems” tih te, Poet hrang hrang kutchhuak dah khawmna bu “Lockdown Literature In Mizoram” te, Candle leh Niji kutchhuak “Evermore” te, Solomon L ziah, “The Rambling” te, Anodynes (thianho) kutchhuak, “Restless Echoes” te, Cindy Felneihthiam kutchhuak “From C to you” te, Catherine Varte ziak “Chaos” te, Rinsangi kutchhuak “Crimson” te, ED Ralte ziak “Delightful Musing” te, Lalremruati Hrahsel kutchhuak, “Poems Under The Ever-Changing Sky”  te bakah hian thuziak hrang hrang dahkhawmna buah Mizo kutchhuak English poetry hmuh tur a tam tawh hle a ni.

• Mizo Poetry than chhoh dan :

Chutiang chuan kum 2000 hnu lamah phei chuan Mizo poetry hmasawnna hi a a thang chak leh zual em em a. Literature genre hrang hrang zingah pawh hmasawn chak ber pawl a ni tawh hial a ni. Mizo literature huang chhunga hlahril kan hmuh hmasak, kum 1900 bawr vel atanga han chhutin Mizo Poetry hi a tam lama a than nasat mai piah lamah hla phuahtute hla phuah dan kalhmangah leh an hla thu hawi zawngah te, an hlaa an ngaihtuahna puan chhuah leh an thu khel te thlengin a danglam nasa tawh em em a, Mizo hnam hmasawnna a than rualin poet te hla thu kalhmang a inher danglam a, chu chuan he hnam hi engti hawi zawngin nge a than tih pawh a tarlang thei awm e.

Kum 2000 hma lama Poetry chhuak hoah hian hla hlui ziarang leh Mizo hla thu hrang hrang hmuh tur a la tam em em a, khuarel leh a dintu fakna leh chawimawina te, ram hmangaihna kawnga infuihna leh nungcha humhalhna lam te, mihring nun thlirna leh Poet-ten an mimal nun an puanchhuahna leh an inbunruahna thlengin hmuh tur a awm mah se, a tlangpui thuin hla thu thu mawi tak tak hmanga tar lan an ni thin a. Poet-ten an mimal nun ram leh chhungrila an vei an puanchhuah dan pawh a la objective hlawm em em a ni. Kum 2000 hnu lama poetry chhuak tam zawkah chuan Mizo hla thu pangngai kha hmuh tur a tlem tain, poetry tam zawk hi tawngkam tluang pangngaia ziah a ni ta deuh vek mai. Poet-ten an ngaihtuahna an puan chhuah duh danah an lang tlang sawtin, pehhel leh thup mawi awm lovin an rilrua awm an hlaah an rawn bun chhuak deuh mawp mawp a ni ta ber mai.  Lengzem a ni emaw, lenglawng a ni emaw, sakhuana lam hawi hlaah pawh ni se, Mizo poet-te hi an frank tial tial a, thinrim inhrikthlakna ni awm tak tak leh mimal, khawtlang nun leh ram hruaitute duhkhawp lohna leh sawisel pawp pawpna thlengin hmuh tur a tam ta tial tial mai. Anita VL Nunmawii poem, “Ka hlau” tihah chuan,

Ka huaisen a,
Hlauh reng ka nei lo,
Ngam loh ka nei lo a,
Ngamtu pawh ka nei lo

(Aikaih, 8) (1-4 )

tih kan hmu a, Hetiang hian Mizo Poetry than chhoh dan hi a subjective zawngin a inher kual a, mahni nun ram puanchhuahna (Confessional Poetry) a pung nasa hle a, chumi phenah chuan thalaite nuna thil thleng mek leh an tawrhna te, hnam leh khawtlang nuna thil thleng mek leh chung avanga an tawrhna thleng chuan hmuh tur a awm ta. Lalvensangi chawngthu poem-ah chuan,

Vartianah mangchhia a bo beiseiin,
Ni zungah damna ka zawng a,
Van dumpawl leh chhum dum,
Thli leh ruah inher vel karah,
Mittui bumin ka nui lui thin,
Mahse, thimna chuan mi nan a,
Hlauhnain mi man veleh,
Sulhnu hliam a thar leh a.

(Mizo Poetry Society Whatsapp Group)(1-8)

tih kan hmu a, Poetry chhuak hmasa lama kan hmuh ngai mang loh, contemporary poetry-ah hian poet te inbunruahna chi hrang hrang a tam ta em em mai a. Hei hian a hnam pum dinhmun pawh a tarlang thui hle awm e.

• Poetic form lamah:

Mizo poetry than chhohna kawnga thil langsar tak pakhat chu poetic form hrang hrang hmanga hla phuah hmuh tur a awm ta nual mai hi a ni. Contemporary poetry tam tak hi free verse hmanga phuah a ni a. Chutih rual chuan form neia hla phuah chi hrang hrang a rawn pung chho ve zel bawk. Poetry lama lo sang hmasa hnam dang hlaa kan hmuh fo thin Sonnet chi hrang hrang te, Pasaltha hla (Epic), hla khun (Ode), Sunna hla (Elegy), Thawnthu hla (Ballad) leh Inphuahelna (Satire) chi hrang hrang thlengin hmuh tur a awm ta nual mai. Japanese ho poetry phuah dan kalhmang haiku, haiga te thlengin hmuh tur a awm chho ve ta zel a, chu mai piah lamah chuan hnam lian zawk leh literature a lo tui hmasa zawk te hla phuah dan kalhmang zul zui a, mahni style a her danglam Pachuau sonnet, Zo stanza han tih ang chi te pawh hmuh tur a awm ta nawk mai.

• A theme lamah:

Poetic form lama hmasawnna bakah hian a theme lamah pawh danglamna nasa tak hmuh tur a awm a. Poet ten an hla thua an thil tarlan leh an thupui chai a zau tial tial a, ram leh hnam hmangaihna leh humhalhna kawnga inzirtirna mai piah lamah ram inrelbawlna thuk zawka chaina te, Mizo hnam chawimawina leh fakna mai piah lamah Mizo hnam nihna (Identity) thûk zawka chaina te, mahni mihring puite chunga that chhuah tura inzirtirna mai piah lamah rilru hriselna leh rilru lama harsatna chungchanga inzirtirna te, Pathian fakna leh chawimawina mai piah lamah Pathian nihna leh sakhuana chungchang fir zawka chainate pawh hmuh tur a awm ta nawk mai. Mizo Poetry hi a kum telin a philosophical tial tial tih theih a ni ta hial mai.  Poetry philosophical tak tak rawn chhuak chho mek karah hian Poet-ten an hlaa khawvel thar an dinna (escapism) hmuh tur a tam ta em em bawk. Hei hian thangtharten an khawsak mekna khawvela hlimna leh lungawina an hmuh lohzia a tarlang a tih theih awm e.

Ramlawt Dinpuia poem “Laiking leh Bak”-tihah chuan,

Laiking i hmu tawh em?
Bak i hre ngai em?
Dak chhuak la, hawi kual la,
Lalna puan ropui nena infam a,
Mipui rawka laitual lengte zingah khan,
Laiking leh bak chu i tawng mahna..

(Thihna Thahrui, 42)(14-19)

tiin ram inrelbawlna chungchang thlirna kan hmu a, John Laltluangliana Chhakchhuak poem-ah hetiang hian mi beidawng leh lungngaite fuihna kan hmu bawk.

Rimawi leh tawngkam tha ten huatthu an sawi hun a la thleng ang a,
Zing nichhuaka beiseina nei tawh lo khan,
Zan lamah anchhia lawh tur zawngin
I phur i tihrit belh thin si,
Mahse,
Kei chuan tawpna zawnga i kun lai khan,
Ka dem lo che,
Zan khat mittui nena i sual chhuak pawh kha i chak tawk ka ti asin,
Tang fan fan rawh aw.

(mizodigest.blogspot.com) (9-17)

Rochharzela poem “Tu nge Mizo?” tihah chuan Mizo hnam nihna tarlanna, ngaihtuahna tithui tak hetiang hian kan hmu,

Tu nge Mizo tiin ka au a,
Tuman min chhang lo va.
‘Khawiah nge ka ram?’ tiin ka au leh a,
An la ngawi thiap a.
Ka tawng hman ka han thlak a,
Ka mite vek an lo ni ta.

(Thinlung Chawlh Hmun,47) (1-6)

TS Khupchong poem “Lalpa chu a tar ngai lo” tihah chuan Pathian leh mihring nihna hetiang hian kan hmu a,

Pathian thilsiam mihring chu,
A kum a lo tam a,
A tha a thum a,
A lo tar thin,
Lalpa chu a tar ngai lo.

(Ani Ka Lo Ni, 18) (16-20)

Muantea Fanai Pakhup poem-ah chuan mihring leh Pathian inlaichinna hetiang hian kan hmu bawk,

Duhsam Pathian zawn chu beidawnna,
Mahni suihlung bumna mai,
Pathian tak erawh chu,
Awm lo ata awma min dintu,
A duhsama nung tur zawk kan ni e.

(Chawia, 104)(6-10)

Debbie Rinawmi poem-ah chuan hetiang hian poet te chawlhna khawvel kan hmu bawk.

Duhamna, Itsikna, hleilenna,
Lak ata ka tawm bona,
Chenna ropui leh nihna sang ten,
Zahawmna a hum telna khawvelah leh,
Thawhrimna aia rem hriatnain hlut a hlawhna khawvelah hian,
Ka inphen thin-
Thu-ah, ralmuangin.

(Mizo Poetry Society Whatsapp Group) (1-7)

• Tlangkawmna :

Kan sawi tak ang khan Mizo poetry hi a tam zawnga a than mai piah lamah, a hawl zau sawt em em a. Tun hnaia poetry chhuak tharah phei chuan hian hun bik nei hla chi hrang hrang a pung nasa hle a. Mihring nun thlirna hla chi hrang hrang karah mipat hmeichhiatna lam hawi (erotic poem) te, neih inang inkawpte thlavang hauhna thlengin hmuh tur a awm ta.Chutiang chuan kum 100 bawr vel chhungin Mizo Poetry hi kawng hrang hrangin a thang a, Mizo literature hmasawnna atana kut a thawhna mai piah lamah, hawi zawng leh kawh inang lo tak tak poetry chi hrang hrang lo chhuak chho zelte hi a lo chhuahna nun thawnthu paitu anih miau avangin, Mizo hnam inenna darthlalang leh ram leh hnam hmasawnna leh siamthatna kawngah pawh hmanraw pawimawh berte zing ami a la ni chho zel ang tih a rinawm.

Works Cited :-

• Chhakchhuak, Laltluangliana, John, Nakinah chuan, Mizo Digest, Accessed 18 February, 2022
• Chawngthu, Lalvensangi, Chhungril Ruak,Mizo Poetry Society Whatsapp Group, Accessed 18 February, 2022
• https://mizodigest.blogspot.com/2020/09/mizo-poetry-suicideprevention.html
• Department Of Mizo, Mizoram University, History Of Mizo Literature, Gilzom Offset, 2014.
• Dinpuia, Ramlawt, thihna thahrui, TM Offset Printing Press, 2021.
• Laldinmawia, H. Literature Lamtluang. KL Offset Printers, 2020.
• Nunmawii, VL, Anita, Aikaih, TM Offset Printing Press.
• Rinawmi, Debbie,Inphenna, Mizo Poetry Society Whatsapp Group, Accessed 18 February, 2022
• Rochharzela, Thinlung Chawlh Hmun, Mizoram Images, 2020
• Pakhup. Fanai, Muantea, Chawia (A Verse Novel), Zorin Compugraphics, 2021.

(He thu hi Mizo Poetry Society (MIPOTY) din champha vawi 6-na, February ni 20, 2022 pualin All India Radio, Aizawl Station-ah a ziaktu hian pawl aiawhin a sawi a ni).