Rokunga Natna
Mizo hla phuah thiam zinga ropui leh ngaihsanawm ber zinga mi Rokunga khan mihring rilru la pu se zawng Mizote hi hma kan sawn leh sawn loh te, Zo nun mawi kan nunpui zel leh nunpui zel loh dante ngaihvenin, a chenna hmun van atangin min la rawn thlirin min la rawn thlithlai rengin a rinawm.
Rokunga khan a damlaiin Mizote tan hmathlir thui tak min neihpuiin Mizote chu kan chak lohna zawn apiangah min fuihin min chhem harh thin a. RL Thanmawia pawhin ‘Tidamtu Rokunga’ a ti hial reng a. Zofate rilruah Mizona thinlung a tuh a, a hla phuah thiamna hmangin Mizo hnam lung nona a chhem alh a, zalenna sual tura a hunlaia Mizote rilru buatsaihna kawnga sulsutu pawimawh ber zinga mi a ni. Rokunga hian “Harh la, Harh la” tih hla hmanga Mizote zalenna sual tura a fuih sauh sauh hnuah, a beisei ang zalenna ram ni lo, sual tamna rama luta Mizoram a buai chho ta kha a tuar na em a. “Ka pianna Zawlkhawpui” tih hla a phuahah te kha chuan lungngai takin Mizoram a thlir a, chutih rualin ding chhuak leh turin beiseina a la nei a, tho leh turin a ngen hram hram a. Mahse a beisei ang khawvel a thlen chhoh tak lohah chuan taksa leh rilru lam thlenga tuarin a boral hma phah niin a chanchin leh a thu leh hla zirtu thenkhat chuan an sawi bawk. Mizo hla phuahtu zinga ropui ber nihna mai ni lo, Mizo hnam tana thawhhlawk ber nih pawh Rokunga hian a phu hial awm e.
Saphoin Mizote zingah zirna bul min gtansak zet a, zirna sang zawk min dinsak leh duh si lo a. Mizote hi a fing var lutuk lo, an thupek hre thiam tawk leh enkawl nuam tawka min siam an tum emaw tih turin High sikul neih min phalsak pawh zirna bul kan tan atanga kum 50 hnuah chauh a ni a. Mizorama High sikul din a nih hma hian Rokunga hian Zo fate chu zirna sang zira, hriatna, thiamna leh finna nei turin min duh a, chu lam chu um turin “Raltiang i kai ve ang” a ti a. Chung hunlai atanga teh chuan kum 80 dawn a lo vei ta a, Zo fate pawhin kawng tam takah hma kan sawnin zirna kawngah pawh a vawr tawp (Ph.D) thlengin kan ramah ngei kan zir thei tawh a. Mual hrang hrangah mi thiam tak tak kan ngah ve ta. Mahse, hma sawn ve hleih theih lohna mual kan nei a, chu chu politics thilah, ram hruaitute nungchangah a ni.
Ram hmasawn zawk leh changkang zawkte ruala thang ve turin Mizote hian hriatna leh thiamna kan nei ngei a. A fawng vuantu kan politician te pawhin hriatna leh thiamna chu an nei teh meuh mai. Mahse ‘finna’, finnaah pawh Pathian atanga chhuak finna an neih tawk loh avangin ram rethei, intodelh lo, dan lova thil tawlh ruk tamna ram leh sual en liamna ramah kan lut mek a ni si. Kan hriatna te chu insawi fihlim dan zawnna atan chauh kan hmang a, kan thiamna te chu sum siamnan chauh kan hmang bawk a. Rin Sanga (IAS Rtd) pawhin “kan ramah hian chunglam finna leh theihnaa hruai ni lo, ‘lalthutthleng’ an ral tam ta malh malh hle; chu ‘finna’ a hruai ni lo ‘lalthutthleng’ luahtu nazawngte chuan ‘raltiang ram’ min thlen pui thei si lo a nih hi! ‘Raltiang ram saw’ kan tikumkhua mai dawn em ni ang?” (Thu leh hla, June 2016) a lo ti a. Tuna kan thlen chin hi chu hmana lungngai taka Rokungan a lo auhpui tawh tho kha niin a hriat.
Dar ang lenna khawpui,
Tlangkimah mawi la,
I nun a mawi lo;
I chhungah sualna doral ang a lian,
Dikna a fam ta, felna a tlawm ta,
Nun suar ang a chim;
Tham leh bawlhhlawhnaten tual an leng,
Awi maw a pawi em mai!
Kan ram enkawltu, thuneihna fawng chelhtuten kan ram an enkawl danah ziak mite lung a awi zo lo a. Sawrkar hrang hrang kan hrawn tawh a, ring lo mite aia changkang zawk awm tak hi ring lo mite chawmin kan la awm reng si. ‘Pathian leh kan ram tan’ te kan ti, ei rukna leh dik lo taka thil tih duhna lak ata kan fihlim chuang si lo; Pathian leh kan ram tan kan ti a, hla phuahtute hla en chuan Pathian kan hre lo a, ram kan hmangaih lo a. Pathian leh kan ram tan kan tih a Pathian hi eng Pathian nge? Mi lem Pathian em ni? Kan va hlau si lo ve tih mai a awl a; Pathian awm rin lohna te pawh a tihluar thei a ni. Chuvangin, Zo fate kuah khawmtu, chung lamin hriatna, thiamna leh finnaa a thuam ram hruaitu kan mamawh tak zet tih hria ila. Chung ni lo thlen hun chu Rokunga leh hla phuahtute leh, Zo fate thatna duhtu apiang chuan an nghakhlel tak a. Vawiin, Ram tuk thla tahrik ni 20, Rokunga piancham leh Mizo Poetry Society (MIPOTY) din cham ni bawkah hian Rokunga duhthusam ram chu hmu phak ngei turin ka duhsak che u a ni.
(He article hi February 20, 2023-ah khan ni tin chanchinbu Vanglaini-ah tihchhuah a ni. MiPOTY Foundation Day leh Pu Rokunga pianchampha puala ziah a ni a, a ziaktute hi MiPOTY Executive Committee Member a ni).
