‘Rose Par Eng’ thlirlawkna
He lehkhabu ‘Rose Par Eng’-ah hian hla tam tak a awm a, engzat chiah nge awm erawh ka hre lo. A zat ka hriat loh chhan chu a lehkhabu-ah hian ‘zawnawlna’ (contents) a awm lova, chuvang chuan a hla awmzat chiah ka chhiar thlap ta lo. He lehkhabu chhuahtu Mizoram Publication Board aiawha thuhma ziaktu chuan hla 102 a awm tiin a sawi a, chu chu ka ring ve mai. Hla tam tak erawh chu a awm tih ka chiang. Hla tam tak a awm ka tih hian, a hla zat ka sawina a ni satliah lova, hawi lam hrang hrang nei, kalhmang hrang hrang neia phuah, hla mawi deuh deuh leh hla har deuh deuh, hla chi hrang tam tak a awm ka tihna a ni zawk mah!
He lehkhabu ziaktu hi mipa a ni a, a lehkhabu hming erawh chu ‘Rose Par Eng’ tih a ni thung. A bu hming hi no angreng viau!! A bu hming ang ngei hian a kawmah ‘Rose Par Eng’ lem a chuang a, a inhmeh viau. Mahse, a kawm hian mi a hip lutuk hran lo thung.
Rose par eng hla hi a kawm hnungah leh a chhungah (phek 71)-ah a awm a, he hla phuahtu leh ziaktu hian rose par-ah pawh a eng hi mawi a tiin a duh hle a nih ka ring deuh! A kawm hnungah hian rose par nihna a sawifiah a, rose par chu ‘vul tura duan mah ni se, chul tura siam an ni si” a ti a. Mihring nun nena khaikhinna tarlang lo mah se, ngaihtuah a ti thui a, rose par nihna a phochhuak thiam hle.
A chhungah ve thung hi chuan chu rose par eng chu a hmanna lam a sawi ve thung a. Rose par eng inhlan tawn chu inkungkaihna leh inhmangaih tawnna atana palai pawimawh tak angin a tarlang thung. ‘Seih mi ban la, rose par eng ka hlan nang che,’ a tih hnu lawkah ‘Rose par eng mi hlan la, i tan ka ding reng ang’ a ti hial. Heta rose par eng hi hmuh theih rose par a sawina nge, hmangaihna leh induhsak tawnna thu a sawichhuahna ‘symbol’ ni zawk ang. I chhiar hunah lo ngaihtuah chhunzawm ve mai r’u. Hei lo pawh hi phek 82 naah pawh ‘Rose’ tih hla dang a la awm leh bawk!!
Mihring hian ngaihsan zawng leh ngainat zawng kan nei thin a, chung mite awmdan leh an nunphungte, an chezia leh an thil tih dan thlengin kan hriat loh laiin kan lo entawn fo. Thenkhat chu hre renga kan ‘copy’ te a ni a, thenkhat erawh chu kan hriat loh laia kan ‘copy’ a lo ni. Masi-a pawh hian ngaihsan deuh a neiin ka hria a, ka hresual lovin ka ring bawk. Mahse chu a ngaihsan chu thangthar lehzualin an hriat vak tawh loh, a piang ve tih an hriat tawk te a nih ka ring. Chu pa hla ‘rua’ leh ‘style’ chu he lehkhabuah hian hmuh tur a awm.
‘A i emaw duangtu’n duatten’ tih te, ‘Ka lungzur ngawi hnem zo law’ tih te, ‘Min run e ka lungzur ngawi e’ tih te leh a dang pawh a awm. Heng hla thu hi mipakhat tih loh chuan a hmang meuh lova, amah Masi-a ngei pawh hian a ngaihsanna leh a dahsanna hi a zep lo, a hla pakhatah pawh ‘Nikhumpa iang lunglen ka bang thei lo’ a ti a. Nikhumpa chu tudang nilovin ‘Awithangpa’ a ni. Awithangpa te ngaisang pha tur chuan ‘a literary taste’ a hniam lutuk lovang tih a rin thiam theih.
A hlaah te hian nula tlangval inkara hmangaihna kan hmu a, hmangaihna hrim hrim chungchang kan hmu a, mihring nuna harsatna kan hmu a, lusunna hla kan hmu a, hla zangkhai leh nuihzatthlak kan hmu a, hla ho angreng tak kan hmu a, lungchhiatthlak leh hla khun tak mai te kan hmu. Hla thu rem dan mawi tak te, hla chang rem dan mumal tak te a awm laiin, hla chang rem dan mumal lo zet te, hla tlar inseihleih tak te, a then hla tawi te, a then sei tak te a ni a, sonnet te pawh kan hmu bawk.
Heng a hlate hi a chi hrang tamin darhsarh viau mah se, hlawm hnih lian takin a khaikhawm theihin ka hria, pakhatna chu sunna leh lungngaihna a ni a, pahnihna chu mihring nun chhungril puanchhuahna a ni. Chuvang chuan a hla hi a par viau lovin ka hria a, par tur erawh chuan kawng a kawhhmuh thung!
Sunna hla zingah hian mimal sunna te, nausen thi (hlamzuih) sunna te, ram tana sipai thi ta sunna te, mihring nun vuiliamna te a ni nawk hlawm. Heng sunna hla ngialngan bakah hian mahni inthihtir derna te, hripui chungchang te, a thim zawng leh a ipik zawnga thlirna pawh a ni hlawm. Hetih rual hian mihring nun thlirna leh fuihna lam hla a awm nual thung. Mihring nun kawng inkawhhmuhna te, mihring nun thlirna te a awm a, heng bakah hian hmangaihna chungchanga thil nihna chungchang tarlanna te a ni. Hmangaihna semzai te hi natna mai a nih dan te a sawi a –
‘Hmangaihtu hmangaihna hai der a ni a, Hmangaihna hmangaih let loh avangin a tuar a, Hmangaihna vangin a na si Hmangaihna ngah hi thil tha a ni lo Mahni natna mai a ni,
tih te. Hmangaihna chu engkim bul leh awm chhan a nih dan te a tarlang bawk a,
Hmangaihna avangin kan piang a
Hmangaihna avangin kan nung a,
Hmangaihna avangin kan hlim a,
Hmangaihna avangin kan tap leh thin.
Hmangaihna avangin kan tuar a,
Hmangaihna avangin kan na a,
Hmangaihna avangin kan thi a,
Hmangaihna avang bawkin kan nung leh ang’
han tih te hian hringnun pumpui hi a khehchhuak viau.
Sunna leh mihring nun thlirna bakah hian nuih pui vur vur theih tur hla zangkhai leh nuihzatthlak te, indeu sawhna leh in phuahelna (satire) hla hnaisailo zet zet te pawh a awm. A pumpuia thlirin he lehkhabu-ah hian thil chi hrang hrang a beng hnem viau. Chhiar tham a ni!
A hla thenkhat hi ka han chhiar thuak a mawi ka tih deuh te, ka rilru hneh deuh te, mawi ka tih deuh te a awm rualin, thenkhat erawh hi chu ka hriatthiam hleitheih miah loh leh a hla thu hman thenkhat phei chu ka hriat hmabak te a awm. ‘Suihvaleng ten’ tih te ‘Dar an chhaina vanlai’ tih te, lam lai tih te, lung ngir tih te, Fam loh khawp rawl a chhar tih te leh a dangte pawh awm nual. ‘bawrhsawm’ sawina tur ni awm taka ‘bawrh’ han hman maite hi a remchang viau mai a, hriatthiam mai erawh a la har deuh!
Ka lawm e.
(He thu hi Masi-a Chhakchhuak lehkhabu ‘Rose Par Eng’ tih tlangzarhna, March ni 18, 2022-a Aizawl Press Club-a Dr. H. Laldinmawia thlirlawkna a ni. Lehkhabu hi Pu L.Thangmawia, MLA, Vice Chairman, Human Resource Development Board chuan a tlangzarh a ni).
