Sailo Lal Fanu Laltheri: Hmangaihna, Tawrhna leh Huaisenna
Laltheri Chanchin Tlangpui
Laltheri hi a hming tak chu Lalchawngpuii a ni a, Sailo lal hmingthang Lalsavunga fa palina a ni. Nuta pathum leh laizâwn pahnih a nei. Ruallunga a pa lal laiin an khaw tlangval hmel ṭha, hnamchawm vâl satliah Chalthanga nen an inhmangaih êm êm mai a. Lal nula meuh hnamchawm vâl zûna a thêm ta reng mai chu mi ṭha tlangvâlten an ngaimawh ta hle mai a. Chalthanga thihna tur thu hial rêlin a leikuai thei ang berin lal hnenah an thlen ta a ni.
A chunga rorelna thu a hriat veleh Chalthanga chu a râltlan ta a. Chalthanga that tura lal mi tirh chuan a ûm zui ta nghal a, Chalthanga zu khâwn lai chu a hnung lam atangin hreipuiin a chêk hlum ta a ni. Chalthanga thih thu Laltherin a lo hiat chuan a tuar na em em a, mi a ang maiin a lo awm ta a. Silhfen inbel lovin a awm a, khawlaiah te a tlaivâr fo ṭhin.
A hmangaih Chalthanga fa a lo pai hman hlauh a, chu chuan a khawvel nun a rawn thlak danglam leh deuh a, a lunglên erawh a ngai reng tho a ni. A fa a lo pian chuan a hlimin a lawm êm êm a, mipa ni a, a ding thei tir te chu chempui humtirin, “Bawihte, i pa phuba i la thei tawh ang em?” tiin maitai te a sahtir a sahtir ṭhin. Chutiang chu Chalthanga thattute chuan an lo hriatin an hlauthawng a, khaw dangah an pêm bo ta hial a ni. Vanduaithlâk takin a fapa chu a thi ta mai a, a inhnem vena ber a awm loh tâkah chuan khawharna leh lunglênna ruamah Lalchawngpuii nun chu a inher lut leh ta a ni. Laltheri hla phuah hun chhung hi a rei lo va, 1840 – 1845 chhung vel niin a lang.
Laltheri Hla Thenkhat Thlir Zauna
Laltheri chhungte’n Chalthanga lu an laksak, Laltherin a han hmuh chuan a tuar thiam lo em em a, a kawr a pawt thler a, khawlaiah vaivut karah a ṭap ta chiam mai a. Laltheri nu chuan chutia a fanu awm chu a khawngaihin a lainat si a, a han koh chuan Laltheri chuan-
Sailo ngurpui suihlung in mawl lua e,
Kan sumtualah Thangdang thunglu
Hawihten in tar e.
a tihsan hmiah mai a, ban zai reng a rel thei lo a ni. A rilru natna leh a thinurna chu a zual zel a, kawr pawh ha lova chutia a awm chu a nu chuan hmu thei ngang lovin, “Puan tal hi sin teh,” tin puan chu a pe a, Laltheri chuan-
Ka nemte puan ka chawi lovang ka nu,
Ka di Thangdanga zalna mah, chhimhlei tualdaihah
a tihsan leh hmiah bawk. Chalthanga rapthlak taka thah a nih hnuah a ruang chu lei daiah a awm a. A hmangaih berin chutia amah avanga hrehawm a tuar laia nuamsa taka lo awm chu a tum lo bur a ni. Puan a sin duh loh va, a tah a ban theih bawk si loh avang chuan Laltheri nu chu a mangang tak zet tawh a, chutia a fanu riltama awm tur leh a hrehawm tuar reng reng chu Nu hmangaihna chuan hmu thei lovin ei tur a va kensak leh ta a, Laltherin a lo hmuh chuan,
Chhunrawl lovin thla ka fam lovang ka nu, Suihlunglengin Sailo ngurpui fam lo awl na e,
a tihsan leh mai a, eng mah chu a ei duh lo va, lunglenga thih mai pawh chu a duh tiin a sawi theih awm e. Chutia Chalthanga suna a rei tawk a tah hun chuan Chalthanga lu tar an lak thlak hnu, thla khat vel a liam tak meuh chuan in lamah chuan a haw ve ta hram a. A haw zan chuan a haw lawmna ni pah fawmin zu an zuk ho va, Laltheri chu an han pe a, a ni chuan, “Chalthanga in chhiah em?” a lo ti a, an chhiah lo tih an hrilh chuan, “Han chhiah rawn u kan lo in dun ang e,” a ti a. Chalthanga zu tur chu an laksak a, Laltheri chuan a va chhiah a, chu veleh chuan,
An rawn hung e, chawltui ningzu a laiah,
Chhuihthang, ka di, za te'n dawm dun i,
a ti zui leh mai a. A ruih lungpuam hnuah phei chuan pawisak leh zah pawh a nei lo tan a, a thinrim la kal zel nen,
Kei mi thattu thah thung loh Laldanga,
Ka fam erawh khuavel thansarah a zam tur chu,
a han ti ta a, chutah chuan Vanhnuailiana pawh a awm a nuam ta lo va, Laltheri lunglenzia a hre bawk si chu a kuta thih mai a hlau ta hial niin an sawi. Ni khua a lo rei hnu pawh chuan Chalthanga chu a theihnghilh thei mawlh lo. A hmel ṭhatna leh duhawmna te chu hmuh leh a châk a, a thlan te hial chu zu hawn a, en a chak a ni tih a hla atang hian a hmuh theih a-
Suihlunglengin piallei khar hawng ila,
A sakhmel leh a zungzatial engtin awm maw e.
a ti ngawih ngawih mai a ni. Chu chu a thil hmuh chak ni mah se, a taksa leh a hmelthatna te chu a chuai tawh dawn a ni tih chu a hre chiangtu a ni bawk si, beidawng tak siin-
A zungzaṭial engtin awm lo ve,
Sakhmel sensiar khuafur hawktui ang a luang zo ta e.
a ti leh ta a, ni khat chu lungleng em ema leikapuia a din lai chuan khawimu a lo thlawk ri vu vu a, Laltheri chhaih ni awm tak chuan a awm vel a. Chalthanga thlarau a nih a ring tlat a, a riltamin chaw ei tur a rawn zawng nia ngaiin a nu chu a au va-
Rauthlalengin kan run khuai ang a vel
Fangfa lo chu ka nu, chunrawl a belin hun u.
a ti a, a nu chuan a tih tak vat hman si lovah chuan amah chuan an chaw bel chu a chawi chhuak a, a chhiah leh ta a. Laltheri hi hmangaihna hian a bual â a, engkim maiah chuan Chalthanga hi a tel ve zel niin a ngaih theih a ni. Tin, Laltheri hian Chalthanga thattu chu a deuna leh a tih elna a hlaah hian a chhak chhuak bawk a-
Bawmzo ral mah dar ang chhai ngam lo,
Belzu kungah ka di Chalthang, chawngsai ang sat e.
tiin a sawi a, hetah hi chuan zu an in dun laia an thah a ni tih a hriat a. Chawngsai ang tih hi ‘chawng sa ang’ tihna a ni. Ral pawh that ngam si lo khan Chalthanga inring lo lai chu an that a, chawng sa an sat darh niai nuai ang maiin an dim lo va, lainatna leh khawngaihna tel lovin an that tihna a nih rinawm. Laltheri zai hi tlem azawng tar lan loh a la awm nual a, chutah pawh chuan a tuarna bak hmuh tur a awm lo. A hla aṭanga thil lo langte thlir ila.
Laltheri, Finna leh Huaisenna
Laltheri hi hmeichhe huaisen tak a ni a. Tin, a huaisenna piah lamah hian hmeichhe fing tak a ni tih a chanchin kal zelah a hmuh theih a, hmangaihna hi chak loh nan a hmang ve lo, a tawrh dan natzia pawh tu mahin an hai lo va. Hla ṭha tak a chhuah phah zawk a, a thawnthu ṭhangtharten an hriat theih phah bawk a, nun hloh nan emaw intihhlum nan emaw a hmang lo va. Chu chu hmangaihna dik tak ni pawhin a lang reng a ni.
Laltheri leh Hmangaihna
Laltheri thawnthu laimu ber hi ‘hmangaihna’ a ni a, chu chu engti zawng pawhin hringnunah hian a lo thleng ṭhin. A tuarna hi a nasa em em a, chu chuan a thinlunga a huaisenna a pai tawh sa chu a rawn luan chhuahtir a, Laltheri hla aṭang hian hmangaihna thil tihtheihzia a hmuh theih a. Tin, dawngsawngtu azirin thu leh hla tha a chhuah theih a, thihna thlentu a ni bawk. Laltheri erawh hi chuan a tuarna rapthlak tak chu thu leh hla ṭhaah a chantir a, tawrh dan tawk a thiam a, a nun tihchhiat nana hmang lovin chak nan a hmang a, chu chu ṭhangtharte entawn atan a duhawm hle.
Tlangkawmna
Vawiin February ni 20 hi Mizo Poetry Society (MIPOTY) din champhaphak a nih angin, a pualin Mizo hmeichhiate zinga hla phuah thiam kut chhuak rawn thlur bing deuh bik a ni. MIPOTY hi February 20, 2016 Khan Prof. R.L. Thanmawia hovin poetry lama tuite leh thahnemngaiten an din a ni a, vawiin hi a kum 8-na chiah a ni. Kum tin Poetry Festival leh Poetry lam hawi programme hrang hrangte huaihawt ṭhin a nih bakah, MIPOTY hmingin Zaikung Thar lehkhabu chhuah ṭhin a ni a, Volume 5 chhuah tawh niin Volume 6-na buatsaih mek a ni. Mizote, hla lama tui leh a duh apiang tan MIPOTY member a nih theih reng a, hre chiang duh tan website (www.mipoty.com) -ah en theih reng a ni.
(He article hi February 21, 2024-ah khan ni tin chanchinbu Vanglaini-ah tihchhuah a ni a, MiPOTY Foundation Day puala ziah a ni, A ziaktu hi MIPOTY Executive Committee Member a ni e).
