Tinatu Rokunga
Vawiin February 20, 2023 hi Rokunga pianchampha vawi 109-na a ni. Rokunga hi Poet of the Century atana thlan a ni a, a pianchampha pualin, Rokunga hriat rengna ni pah fawmin, kum 2016 vawiin angah khan poetry lama tuite intel khawmna Mizo Poetry Society (MIPOTY) chu Prof. RL Thanmawia hovin din a lo ni tawh a, MIPOTY kum 7-na a ni ta chiah bawk (www.mipoty.com lamah an pawl chanchin leh thu thar chhiar theih reng a ni).
Rokunga pianchampha puala MIPOTY din chhuaktu ber RL Thanmawia chuan Tidamtu Rokunga tih a ziakah chuan, “…Rokunga hian Chawimawina Nopui atan, Tidamtu Ropui Rokunga tia koh a phu hliah hliah…” tiin a ziak a,1 Mizote inlungrualna tur thu pawmawm tak leh nihna (title) sang tak a ni. He thu hnial leh kalh hauh lovin Tinatu Rokunga kan ti ve dawn a ni.
Ram Natna Thlentu
Pu Rokunga khan kum 30 chhungin hriat theih chinah hla hrang hrang 128 a phuah a, chung zinga hla 22 chu khuarel hla niin ram leh hnam hla hi 14 a awm bawk.2 Ram leh hnam hla a phuah hi Mizo leh Mizoram phuahna a ni deuh zel a, khuarel hla a phuah zingah pawh Mizoram mawina hmuh tur a tam hle. A hlaah Mizo leh Mizoram a chawi a, a fuih nasa bawk a, “Rokunga khan hla 128 a phuah a, heng a hla khaikhawmna chu thumal pali ‘MIZO’ tih hi a ni,” tiin RL Thanmawia chuan a ziak nghe nghe.3
Chuvangin Rokunga hi ram hmangaihtu diktak, India sal tanna ata zalenna duhtu niin a lang a, kum 1947-a a hla phuah pakhata “Tuma bawi atan ka phal lo che/Tho la i kein ding rawh” a han ti te hian ram zalenna a duhzia a tilang. Kum 1961-a a hla phuah Harh la harh la-ah phei chuan a ngial a nganin ram zalenna chungchang leh chumi kawnga thalaite fuihna a tar lang a, tlar thenkhatah “…zalenna dar a ri/Tho rawh hun tha a liam hma hian” a ti hial a ni. He hlain Mizo thalaitea hna a thawh nasazia chu C. Vanlallawma chuan, “Hla mal khaiah chuan he hla tluka suai nei nasa hi a awm kher lo vang. Hnam sipai atan, hnam zalenna sual turin thalaiho an inpe sung sung a, he hla hian vawilehkhatah thalai rualte kha hnam sipaiah a chawk tho phut…” a ti hial a ni.4
Rokunga ram hmangaihna hlate hian a hun laia ram zalenna thlipui (independence movement) kha nasa takin a vaw alh a, kha hla kha piang lo ta se, emaw, Rokunga kha awm lo ta se, independence movement khan khati tak khan Mizo thalaite a chiah hneh kher ang em, tih hi zawhna lian tak a ni. Chuvangin, Rokunga kha ram zalenna sualna kawngah khan a thawh hlawk a, a mei chhi kaitu pawimawh a ni tih loh rual a ni lo. Khati tak maia India ramin a ram bung khata a ngaih Mizoram thalai rualte India do tura an han pen chhuak khan India sorkar rilru a tina a, Home Minister Gulzarilal Nanda, Punjabi pa sehhel tak phei chuan, “Crush Them… An ram alawm kan duh, a mihringte chu sipai motor-in phur khawm vek ila, India state tinah sem darh vek ila, buaina chu a reh mai ang,” a ti hial a nih kha.5 Mizoram chu ram buaiah puan a ni a, Home Minister duh dan ngeiin Mizoram chu tihchimit tumin indo thlawhtheihna hmanga beih a ni a, khawkhawm leh hal te, buai mangan hrang hrangte a lo thleng ta a. India sorkar natna hrikthlak dan kha a rapthlak hle.
Zalenna sual avanga India natna thlentu zinga (a phena) thawh hlawk tak mai chu Rokunga kha a ni tih loh rual a ni ta lo va. Chumi avang erawh chuan hnamin ram hmangaih kawngah harh tharna a chang a, thangtharte tan history pawimawh min hnutchhiah a, “zalenna sual hnam” theuneu lo kan lo ni ta. Kan duh leh Rokunga duh ber hi tihhlawhtlin ni lo mah se, a hnathawh chuan hlet chhuahin kan la hlêp chhuak zel a ni.
Ama Natna Thlentu
Rambuai thim pik chhah lai 1969-a a hla phuah pahnih — Ka Pianna Zawlkhawpui leh Sualin Bo Mah Ila tih hi ngun taka han thlir chuan inchhirna hla, pawi tihna hla niin a lang. A hmasa zawk hi ram leh hnam hmangaihna hla a ni a, a hnuhnung zawk hi Kristian hla a ni thung. Ka Pianna Zawlkhawpui-ah hian “Awi maw! A pawi em mai” tih te, “Aw! A pawi em mai!” tih te hmuh tur a awm a, pawi a ti mawlh mawlh mai. Tin, fuihna lampang “Tho leh ta che maw” tih leh “Felna silhpuan sinin tho leh la, hlimte’n leng zawk ang” tih te hmuh tur a awm bawk. Fuihna hla rau rauvah, rambuai hmaa thalaite a fuihna hlate nena khaikhin chuan dang tak a ni.
He hla chungchang hi Darchuailova Renthlei chuan, “… ‘Zawlkhawpui’ tih chu a ram pumpui leh mipui zawng zawng kawkin a hmang a, a chhunga chengte nun lo tlahniam ta lutuk chu pawi tiin nasa takin a tahpui a, a tlukna hmun ata tho chhuak turin a turin a tur tut tut mai,” tiin a ziak nghe nghe a.6 Ram a buai khan tharum hmanga chetna hrang hrang leh sualna chi hrang hrang a lo pung a, Mizo leh Mizo inchemharna te, Mizo leh hnam dang inchemharna te a lo piang a, chu chuan hnam dangte thiana siam tur min fuihtu Rokunga rilru a tina a, “Dikna a fam ta, felna a tlawm ta!” a ti hial a nih kha.
Tin, Sualin Bo Mah Ila pawh hi sual thupha chawina leh ngaihdam dilna hla tih theih tur khawpin tlar 4-ah ngawt ngaihdam dilna a awm. A hla thupui mai bakah “Ka dam chhan ber ka lo hre lo” tih te a awm bawk. Heng hla pahnih tlar thenkhat kan tarlan tak atang ringawt pawhin Rokunga kha a thil tih tawh eng emaw berah khan inchhirna a nei lian hle niin a lang.
Khati tak maia rambuai hmaa a hla phuah leh, rambuai hnua a hla phuah kalphung inang ta lo lutuk kha ngaihtuah tham tak a tling a. Zalenna sual turin Mizo thalaite a fuih phur tê tê a, thalaite’n zalenna an han sual ta cheng a, a beisei loh lutuk maia sualna dang a lo pung ta chiam mai leh, a hmangaih Mizo thang mawi ta lo chuan Rokunga rilru a tina ngawih ngawih niin a lang a, a thil tih chuan a inchhirna a thlen a, ama rilru a tina a ni a tih theih ang.
Nimahsela, heng a rilru natna thu luang chhuakte hi thangtharte tan malsawmna a lo ni leh zel a. A natna avanga hla khal tak lo luang chhuak Ka Pianna Zawlkhawpui hmangin Mizote darthlalang fiah leh fim tak min hûnsak a, a phuah atanga kum 50 chuang a ral hnuah pawh Mizote inenfiahna turin a la fiah tha tawk em em mai a ni. Sualin Bo Mah Ila tih pawh Pathian biak inkhawma sak hlawh, ringtute leh Pathian inlaichinna siam tha theitu hla tangkai a ni leh ta zel a. Rokunga natna thlente hian thangtharte malsawmna min thlen ta zel a ni.
Hmangaih tak maia hla hmanga a chawi thin he ram leh hnam fahrinte hian, Poet of the Century hlan let mai duhtawk lovin, hla hmanga nun mawi ropui nei tura thu min chah kha nunpui ila, felna silhpuan sinin tho leh ang u hmiang! Chu chu Rokunga dam rengna tur a ni ang.
Reference:
1Thanmawia, RL. Chuailo Bu 1-Na. 2nd ed., Author, 2011. pg.167
2Thanmawia, RL. “Tidamtu Rokunga.” Mizo Nih Tinuamtu Rokunga, edited by B Lalthangliana, Rokunga Memorial Society, Aizawl, Mizoram, 2008, pp. 323–330.
3Ralte, Lalhruaitluanga. “Rokunga 1914-1969.” Mizo Nih Tinuamtu Rokunga, edited by B. Lalthangliana, Rokunga Memorial Society, Aizawl, Mizora, 2008, pp. 11-16.
4Vanlallawma, C. Hringlang Tlang. Author, 2022. pg475
5Chakraborty, Dr. Anup Shekhar. “’Buai Kum Sernung’ (Living Scar of the Troubled Year): The Shelling of Aizawl 1966.” The Geopolitics, 1 Mar. 2020, https://thegeopolitics.com/buai-kum-sernung-living-scar-of-the-troubled-year-the-shelling-of-aizawl-1966/.
6Renthlei, Darchuailova. Rokunga Tehkhinthu Thiam. Fraser Media and Publication, 2022. pg. 31.
(He article hi February 20, 2023-ah khan ni tin chanchinbu The Zozam Times-ah tihchhuah a ni. MiPOTY Foundation Day leh Pu Rokunga pianchampha puala ziah a ni a, a ziaktute hi MiPOTY Executive Committee Member a ni).
