Tunlai Mizo poetry than chhoh dan

• H. Lalawmpuia (OP-a Hmar Vanbawih)
  (A ziaktu thu leh hla dang chhiar duh tan a hmingah click rawh)

Kan thupui hi ‘Tunlai Mizo Poetry Than Chhoh Dan’ tih a ni a, ‘tunlai’ kan tih hian eng chen nge kan huamtir ang a, ‘Contemporary Poetry’ kan tih hian eng chen nge a huam tih sawi dawt a har hle a. Eng pawh ni se, Sapho ‘contemporary’ leh Mizo ‘contemporary’ chu a inang chiah thei lo ang. Chu vang chuan kum 1990 chho, Mizo poetry a bua chhuah a nih tan vel atang khan sawi chho mai ila a tha âwm e. Tin, ‘poetry’ awmzia te, Mizo tawngin ‘hlahril’ kan ti dawn nge, ‘chhamhla’ nge, ‘hrilhla’ kan ti zawk dawn? Nge ni, ‘Poetry chu poetry ni mai rawh se’ kan ti ang… tih te bâkah, ‘Father of Mizo Poetry’ chu tu ber nge ni ta(?) tih leh ‘song’ leh ‘poem’ danglamna, a thliar hran leh thlei dan tih lampang, mi tam tak lo inhnial tawhna lam hi chu kan luhchilh ve rih lo ang a. Tunlaia Mizo poetry than chhoh dan kan sawi mai dawn a ni.

            Mizo Poetry tobul leh a intan dan bul taka kan chhut chuan A AW B kan neih tirh lam, ziak ngeia dah literature kan neih tan atang khan a sawi theih âwm e. Zosapthara’n bul a tan a, a hnuah Hrawva te, RL. Kamlala te, Durra Chawngthu, L. Biakliana, Kaphleia… a hnu deuhah ‘Serkawn Concert’ hla phuahtu ropui tak tak Chhuana, Liandala, Lalmama leh mi dang dang an rawn lang chho a. Tichuan, a khât tàwkin poetry han ziak chu an awm ve zauh zauh a; mahse, ‘thlûk nei lo hla’ bîk hi chuan mi nâwlpui ngaihven a hlawh ngai lem lo.

Ngaihven hlawh lo leh hralh tla lo Poetry:

Tun hma kha chuan Mizo zingah poetry hi hralh tla tak a nih loh avangin, a hrang a hraia, a hlanga lehkhabu meuha han chhuah ngam kha an tam lèm lo hle. A chhuah chhunte pawhin an hralh tha lèm lo.

Lalzuahliana poetry bu ‘Lungmawl Selin’ tih thuhmahruai ziaktu PL. Liandinga chuan Zuahliana poetry bu ‘hralh a tlak loh turzia leh a ziaktuin hlâwkna a hmuh dawn lohzia’ a hriatin a hnuk a ti-ulh hial a! (Lungmawl Selin iii) Mafaa Hauhnar pawhin a ‘Chawlhna Tuikam’ thuhmahruaiah Zofate zingah poetry-in hmun a chan chauhzia sawiin, “Thu-leh-hla ruihchilh intite zingah ngei ngei pawh hla thlûk nei lo chu êk zawrh tluk thawthânga hralh tla lo a ni,” (Lalrinfela 10) tiin a sawi a, a poetry bu ‘Chawlhna Tuikam’ chu a tlangtlak zawk theih nan a essay leh article a dah tel ta nual a ni.

Zikpuii Pa ‘meuh’ pawh kha a thawnthu bu te a hralh theih tehreng nen, a poetry bu ‘Zozam Par’ kha chu a hralh thei vak bik lo a ni ang, Mafaa Hauhnar chuan “… ‘a hre ngai lo hnena thipawl zawrh’ an sawi ang chauhin a tlangtla lo va. A bu neite pawhin kan hlut em em loin a lang,” (132) tiin ‘vawkpui hmaa tuikeplung paih’ ang deuhah a chan a ni.

R.L. Thanmawia pawhin a poetry bu hmasa ber ‘Senmei’ kha hralh tam a inrin loh avanga an chhut tam loh thu a sawi. “Sumdawnna zâwng chuan poetry bu hrim hrim hian hralh a tla lo hle a, hmuh let tur a awm lo tluk a ni,” (Tapchhak Theory 88) tiin C. Lalawmpuia Vanchiau chuan a lo sawi ve bawk.

Mizo poetry, a bua chhuak zinga MAL Book of the Year top 3 thleng awm chhun Nununa Renthlei ‘Hringnun’ te pawh kha, “Book of the Year Top 3-a a han lang ringawt mai pawh kha mi mak tih a tling a, zawhna a siam a, lo ngaithei lo tawk an awm nawk,” (Hringnun xviii) niin a ziaktu hian a sawi.

Hetiang hi tun hma lama kan dinhmun a nih avangin, hun rei fê chhung kha chu Mizote zingah chuan poetry hian mikhual chan a chang a ni.

Mizo Poetry a bu-a chhuakte:

Mizo poetry a bua chhuak hrang hrang han tar lang ila; bu thenkhatah hi chuan hla ni chiah lo te pawh zeh tel zauh zauh a ni tih erawh hre tel ila.

James Dokhuma’n kum 1989-a tihchhuah ‘Ka Hla-hrilte’ tih hi a bu mala Mizo poetry chhuak hmasa ber a ni maithei; ‘hlahril’ tih pawh hi ama chher chhuah (coin) niin an sawi. A hnuah ‘Chhamhla’ tih hi an rawn hmang leh a – hei hi Laltluangliana Khiangte chher (coin) a nih hmel. C. Lalkhawliana ‘Taitesena/Râlthatchhunga’ (1989) te, Lalzuahliana ‘Lungmawl Selin’ (1992) te, Zikpuii Pa ‘Zozam Par’ (1993) te, Lalsangzuali Sailo ‘Kulva’ (1993) te, James Dokhuma ‘Ka Thinlung Luangliam’ (1996) te, Capt LZ Sailo ‘Awmkhawhar Suihlunglen’ (1997) te, R.L. Thanmawia ‘Senmei’ (1997) leh Mafaa ‘Chawlhna Tuikam’ (1997) te, Ngurchhawna ‘Hnutiang Sûlah’ (1999) te, Lalthlamuana Hnamte ‘Ka Suangtuahna thu leh hlate’ (1999) te kha kum 2000 hma lama poetry a bu ngeia chhuak kan hmuh theih langsar zualte chu an ni mai âwm e.

            Kum 2001 khan Zoppen Club chuan Mizo poet hrang hrangte poetry dah khawmna ‘Thlifim’ (2001) tih chu an tichhuak a. Mi sawmin an hla an dah a, chhiar nuam leh zir tlak tak tak a ni hlawm. Laltluangliana Khiangte buatsaih ‘Mizo Hlahril Thlan Chhuahte’ (1999) leh ‘Mizo hla leh Chhamhlate’ (2009) tih pawh hi lam hmaih chi a ni lo ang. Chutih rual chuan he lehkhabua poetry kan hmuh zinga a tam zawk hi chu kum 2000 hma lam daiha chhuak te an ni hlawm.

            A hming mala kan sawi dawn chuan sawi tur an awm chho neuh neuh a. Capt. LZ Sailo ‘Suihlunglen Hlahril’ (2001) [châng 2279 a awm!] leh ‘Insuihkhawm leh Zai I Rel Ang U’ (2008) tih te, Malsawmi Jacob ‘Tinkim Dawn (Mizo and English Poems)’ (2003) te, R.C. Lalruatchhunga ‘Ka suangtuahna lêng vêl’ (2002) te, Buangi Sailo ‘Nghilhlohna Nuaithangpar’ (2003) te, C. Chhuanvawra ‘Zokung’ (2005) te, Laltluangliana Khiangte ‘Rochuam’ (2006) te, Lalnunpuia Hrahsel ‘Ngaihrilvawn’ (2006) te, Nununa Renthlei ‘Hringnun’ (2007) te hi sawi hmaih loh tur zinga mi an ni ang.

            Tun hnai lehzual kan en chuan F. Lalzuithanga ‘Thinlung Luangliam [Wing of Poesy]’ (2012) te, C. Lalhruaitluanga ‘Chhamhla’ (2012) leh ‘Thinlung Tuifar’ (2013) te, Lalnunpuia Hrahselin a chhuah High School zirlaite poetry dah khawmna ‘Tleirawlte nen Chhamhla’ (2013) leh ‘Ngaih-Lunghnem’ (2018) te, Thuamtea Khawlhring ‘Awmhar Hnemtu’ (2014) te, Laltlanthangi JH ‘Leikapui Zaiva’ (2015) te, Jacob Vanlalhumhima ‘Damdiai [Poems of a Teenager]’ (2015) te, Hr Chhangte ‘Lungtui’ (2015) te, RL Thanmawia ‘Zanlai Thlifim [Ka hla phuahte]’ (2016) te, Anita-i ‘Aikaih’ (2017) , ‘Rip’ (2019) leh ‘Ni hawi’ (2021) te, TS Khupchong-a ‘Mim Fang Khat’ (2017) te, Lalchhuanawma Sailo ziah ‘Chhawlbûk [A Contexualized Psalms and Proverbs]’ (2018) te, ‘Suihlunglen [Ka hla phuah leh  lehlinte]’ (2018) tih kum 15 mi lek Ramngaihawma ziah te, Ramlawt Dinpuia ‘Rawlthar Awrawl’ (2018) te, Loretta Khawlhring ‘Chicks Magnet [thu tawi leh ril]’ (2019) te, F. Vanlalrochana ‘Pathian Zawnna’ (2020) te, Lalrammuana Sailo ‘Tidamtu Rimawi’ (2020) te, Rochharzela ‘Thinlung Chawlh Hmun’ (2020) te, Febry K. Zonunmawii ‘Chawlhna Thingthiang’ (2020) te, Lalropara Pachuau ‘Ka Lunglai Luahtu’ (2020) te, Gladys Lalhruaitluangi ‘Thulovi Thu’ (2021) te, Ramlawt Dinpuia ‘Thihna Thahrui’ (2021) te, Aremruati Ngente ‘Seih’ (2021) te, Malsawmhriatzuali Jacob ‘Chhamhla’ (2021) te, TS Khupchong ‘Ani Ka Lo Ni’ (2021) te, Amos MS Dawngzuala ‘Hringnun Keh Them’ (2021) te, Hriatpuia Kion ‘Mi Tin Thawnthu’ (2021?) te, ‘Ka tap tawh dawn lo’ (2021?) tih Tetea  Royte ziah te, C. Januari ‘Hrui Kim Lo Rimawi’ (2021) te, F. Vanlalrochana ‘Hun Tiauvut Chunga Kan Len Lai Hian’ (2021) leh Thuamtea Khawlhring ‘Hringnun Hlapui & Zo Lunglen’ (2021) te hi a langsar zual a ni âwm e.

            Mizo zingah English-a poetry ziak an awm ve nual a. Laldinkima Sailo ‘Spectrum – A plethora of Rhapsody’ (2002) te, Dawngi Chawngthu ‘Of butterflies and Lullabies & Unfinished Coversations’ (2015) te, John Laltluangliana ‘Unsung Maudlin Monodies’ (2016) te, Malsawmi Jacob ‘Four Gardens and Other Poems’ (2017) te, Debbie Lalrinawmi ‘Purloined Emotions’ (2017) leh ‘Belicose Warriors’ (2021) te, Niji & Candle ‘Evermore’ (2018) te, rdp ‘secondhand scars’ (2019) te, Pricilla Lalnuntluangi ‘The Dearest Things’ (2020) te, Lalremruata Sailo ‘Songs of Camelia’ (2020) te, Somtea Pachuau ‘Wild Hearts’ (2020) te hi kan hmuh theih langsar zual a ni a, a dang pawh a awm âwm e.

            Tin, mi dang hla phuah a bua siam – ‘R.L. Kamlala Kut Chhuak’ (1980) edited by Siamkima & Revd. Chuauthuama te, R.L. Thanzawna leh R. Raltawna te buatsaih ‘Serkawn Concert Hlate’ (1981) te, Lalchuanga buatsaih ‘Leng Lal Saihnuna Hla Bu’ (1982) te, B. Lalthangliana buatsaih ‘Patea leh Damhauha Hnuhma’ (1985) te, R.Lalrawna leh R.K. Lalhluna te buatsaih ‘Fam Lalzova’ (1986) te, Darchuailova Renthlei buatsaih ‘Vankhama Hlate (A Critical Study)’ (1990) te, PS. Chawngthu ‘Nghilh Lohna Par’ (1999) te, ‘Rokunga Khiangte leh A Hlate’ (2002) te, Stephen Marcus Rualzakhuma tihchhuah ‘Zirsangzela Hnamte Hlate’ (2002) te, Rokunga buatsaih ‘Thalai Hla Bu’ (2012 5^th ed.) te, Laldinliana buatsaih ‘Lalsangzuali Sailo Hla-te’ (2007) te, Lalzuiliana buatsaih ‘Sialkhawpui leh Awmhar Champion Laltanpuia’ (2012) te, Eddy Zosangliana Colney buatsaih ‘Lallianmawia Pachuau (1963-1987)’ [2013] te, Laltlanmawia (Matlana) buatsaih ‘Hmangaih Laltanpuia Tochhawng (A chanchin leh a hlate zir chianna)’ (2018) te, F. Lalzuithanga leh Lalhmingthanga Colney te buatsaih ‘Serkawn Lalmama’ (2018) te, CFL Hmingthanga Memorial Society-in an tihchhuah ‘CFL Hmingthanga Hlate’ (2019) te, Lalramliana leh Lalrinfeli Khiangte te buatsaih ‘Hrawva (Father of Mizo Poetry) leh A Hlate’ (2019) te leh mi hla dah khawma zir chianna bu hi a chhuak nual bawk.

            Kan sawi hmaih hauh loh tur chu Mizo Poetry Society (MIPOTY)-in a tihchhuah, 21^st Century Mizo Poetry Series ‘Zaikung Thar’ bu hrang hrang [Vol – 1 (2017), Vol – 2 (2018), Vol – 3 (2019) leh Vol – 4 (2021)] te hi a ni. ‘Zaikung Thar’ hi kum 2017-a chhuah tan niin, kum tin an la tichhuak thin a. Covid-19 hripui lêng avangin a han khaihlak zauh na a, kum tin deuhthaw a la chhuak thei hi a lawmawm hle. ‘Zaikung Thar’-ah hian tunlaia Mizo poet hrang hrangten Mizo leh English-a an poem phuah kan hmu a, chhiar manhla tak tak an ni hlawm.

Mizo Poetry Than Dan:

            Tunlai Mizo poetry hmasawn chhoh dan than danglam dan hi hetiang hian a stage ang zawngin han dah ve chhin ta ila, a buk thelh chuan kan thelh bik lo turah ngai ang.

Stage 1: 1990 – 2005

            Hetih hun laia poetry chhuakte hi chuan hnam dang poetry phuah dan chu hla châng bithliah dan leh a kalphung hrang hrangah an zui nasa hle a. Mahni mûm mûma lo mùm tâwk chu awm mah se, a tlângpuiin hnam dang poetry ziah dan zûl zuia phuah a la tam viau. Hetih lai hi Imitation period tiin han dan chhin ila. Lalzuahliana, Mafaa Hauhnar, R.L Thanmawia, Laltluangliana Khiangte, Thuamtea Khawlhring, Malsawmi Jacob, James Dokhuma, etc. te hi poet langsar zual an ni âwm e.

Stage 2: 2006 – 2015

            Hetah hi chuan hnam dang tih dan entawn tho siin, phuah dan thar leh ilo han chîng chhuak te an awm ve ta a. Entirnan: F. Lalzuithanga Zo-Sonnet, Zo Verse, Zo Stanza, Paradise rhyme, etc,. tih ang chi te leh Nununa Renthleiin a chher chhuah Zo Stanza, Doble zig-zag, Zo Rhyme, etc., tih ang chi hi hmuh tur a awm a ni. Mi dangin an hman zuipui vak lèm lo erawh a pawi hle.

Stage 3: 2016 – till date

            Third stage-ah hi chuan social media a chak tawhin, mahni poetry han pho chhuah mai theihna platform kan nei tha tawh hle a. Facebook, Instagram leh WhatsApp bâkah, social media platform dang dangah poetry tuipuituten an poem an pho chhuak ur ur a, hetiang lama a tui deuhte inkâwm khawma inchawk phûr tawnin, an inchhêm alh tawn a. A bu ngeia chhuak Mizo poetry pawh a pun phah hle a ni. Tin, poetry lama tui miten an din Mizo Poetry Society (MIPOTY) a lo ding tawh a, thangtharten poetry an rawn tuipui nasa zual ta a. A phuah danah pawh free verse an uar chhoin, a theme pawh a kal darh ta hle a ni.

Tunlai Mizo Poetry ziarâng:

            Zosâpten ziaka Mizo literature bul min tansak hnu lawk atang khan poetry lam hawi hmuh tur chu kan nei nghal thuai a. Kum tam em em liam hmain kawngkal fel zawk neia phuah poetry te pawh kan hmu zui. An hming kan lam dawn a nih chuan R.L. Kamlala, Hrawva, Durra Chawngthu, L. Biakliana leh Lalzuithanga te kha lam hmaih loh tur an ni ang.

            Hetiang hian poetry chu bul tan chhoh ni mah se, Zofate zingah poetry chu tuipui fa an awm meuh lo a, a thlûk nei lo phei chu tu ngaihven hlawh lohin a let vel mai mai thin niin a lang. Tichuan, a tawi zâwngin sawi ta mai ila, kum 1990 hnu lamah poetry tuipui zual an lo lang a. Lalzuahliana, Zikpuii Pa leh R.L. Thanmawia te hi lam hmaih loh tur an ni ang. Anni hian poetry awmzia leh phuah dan, hnam dang tih dan leh a kalphung te min hrilh a, Mizo poetry huanga mi dang kutchhuak te pawh min zir chianpui nual. Mahse, Zikpuii Pa meuh pawh hi a thawnthu bute hralh tla viau mah se, poetry lamah chuan mi dang a hneh zui vak lo niin a ngaih theih.

            A hnu deuah thangthar zawk an lo chhuak zel a, poetry tuipui tak tak an ni hlawm. Chûng zînga kan hmuh len ber pakhat chu H. Lalrinfela (Mafaa Hauhnar) kha a ni. Ani hian kum 1997-ah ‘Chawlhna Tuikam’ tih chu a tichhuak a, chutah chuan hnam hrang hrang poetry phuah dan sawi fiahin, Mizo tawng ngei paw’n a phuah ve theih a ni tih tihfiah nan a poem hrang hrang a pho lang a. Chu chuan thalaite a kaihruaiin a hneh zui hle tih a hnua mi dang poem hrang hrang kan chhiarin kan hmu chiang hle. Mafaa hian ‘Sabereka Khuangkaih’ chanchinbu a enkawl zui a, chutah chuan poetry huang ‘Zaituahrem’ tih a siam a. Chu huangah chuan thangthar Mizo poet hrang hrangten an poem an pho chhuak \hin a, Mafaa’n a kaihhruai thangthar poet-te tan a hlu hle.

            Hemi chungchang hi amah Mafaa ngei hian heti hian a ziak:

‘Sabereka Khuangkaih’ chanchinbu-a ‘Zaituahrem’ huang leh ka lehkhabu ‘Chawlhna Tuikam’ hmangin ka thalaipuite chu French, Japanese, Italian, English etc. poetry buhzêm atanga pûr chaw-in ka phâk ang tâwk tâwkin ka châwm ve a, hemi avang hian thangtharte zingah poetry chuan Zofate literature-ah chhungpui fa chan a rawn chang chho ve ta a; hei hi a hlu êm a, tangka suma lei mi rual a ni lo.

(Thlalêr Aurâwl 140)

tiin. Mizo poetry tana Mafaa hnathawh, thangtharten poetry an tuipui zui theih nana a kawng sah hi a hlu em em a, eng ti kawng mahin a sawi nêp theih loh.

            Mafaa kawng sah saa kal a, a sulhnu rawn chhui zui ta hi chhiar fê tham an awm àwm e. A rhyme te, a chei mawina leh wordplay lam an uar a, a rhyme scheme te pawh an ziak lang thlap thlap thin. Mafaa leh Thuamtea Khawlhring te hi chuan  rhyme nei lo (free verse)-a hla phuah te hi chu “A net zár lo va tennis khelh ang chauh a ni,” (90) an ti a, a theih chin chinah rhyme an ûm a, a metre te pawh an buan chho ve ta hial a ni. Chu chuan kum Zabi sawm hnih pakhatna hnu lama thangthar Mizo poet-te zingah hlet a chhuah chho ta zel a. Mafaa avanga poetry lama tui zui ta leh a sulhnu chhui hi hmuh tur an awm nual a ni.

            Hun a kal leh deuh a. Thangthar zingah hnam dang poetry chhiar leh zir an lo pung deuh deuh a, chûng zingah chuan a rhyme leh metre ringawt hi poetry mawina a ni lèm lo tih lam zawnga ngaih dan nei an lo chhuak ta zel a. A rhyme leh ilo ûma rem leh rem loa kan la phar buai ve hle lai hian, hnam dangho chuan ‘free verse’-in, eng dan leh ih mah inphuartir loin an duh dan danin an duh zawng zawng an phuah chhuak a ni tih hmuin, chu lam zâwng chuan an her ve ta hlawm a. Lalzuahliana te ang, rhyme leh metre lam ngaihtuah lo, hla thu mawi leh tluang tha tih vel ngaihtuah em em lote chuan ngaih san an lo hlawh chho leh ta viau a. Chutiang chuan Mizo poetry pawh a inher danglam chho ta a ni.

            Tun hma lama an lo hman uar em em hla thu (poetical word) mawi leh tha tak tak te khan hman zui an hlawh lo tial tial a, tuallai tawng, inbiakna tawngkam leh naupang chhe tawng thlengin an hlaah an seng lut ta a; hnam dang tawng te pawh a bak ta chek chuk mai a ni. Chutiang chuan Mizo poetry kalphung chu a inher danglam chho hret hret a, tlêma upa deuh leh duh fîr deuh tena ‘hetiang te chu hla pawh a nih niau loh hi’ an tih tur ang chi hi a chhuak chho ta mawlh mawlh a, a phuahtu duh dana ziah a nih miau avangin hnâwl ngawt theih chu a ni si lo.

            Chutih rual chuan, Mizo hla thu mawi leh ril tak tak, tun hma atanga an lo hman tawh thin vawng him a, inhmeh taka la hmang zui te pawh an awm ve reng tho a. Kum 2000 hnu lamah hian Mizo hla thu leh hlarua te kha vui liam a ni vek lem lo tih kan hmu a ni.

            A pêng hrang ang zawnga kan sawi dawn chuan kum 2000 hnu lamah hian sonnet, ode, satire, epic, elegy, ballad, haiku, etc. te kan hmu nual. Tih dan thar leh kalphung thar, mahni ngeiin din chawpa hmang zui tate pawh an awm. Kum 2000 hma lam aiin a hnu lamah hian poetry ngaihventu an tam a, a huang pawh a zauin a chi hrang hrang pawh kan hmu chho mawlh mawlh mai a ni.

            An hla thupui (theme) thlan chhuah pawh a inang lo hle a, point hnih khat leka khai khawm mai theih pawh a ni lo. Inngaihzawnna leh inhmangaihna, khuarêl (nature) leh a chhehvel, mihring mizia, nun dan, politics, sakhua, ram leh hnam, hnam chanchin, thil thleng thar, zirna, ei leh in, inkungkaihna hrang hrang te kan hmu a, sawi loh a hleih pawh an nei lo ni maiin a lang. Lunglênna nen tak taka hla phuah (ni-a lang) an awm laiin, tum luihna nen tak meuha phuah te, a tuka tuk-chawp tak meuh meuh te, hla thu mawi leh lam nuam lam aia a rem rem rem khawm ta mai te leh rilru bunruahna atana phuah ve hrim hrim te an ni nawk hlawm a. Mi dang tana han tuipui ve harsa tak tak te pawh a ni àwm e.

            Tunlai chângkannain thil thar min hmêlhriattir zel a, social media hrang hrang a lo chhuak a, chutah chuan awlsam takin mahni kutchhuak te a pho chhuah theih a, chu chuan poetry a tipungin, tunlai thalaite tan inbun ruahna hmun tha tak a lo ni ta.

            Tunlai thangthar Mizo poetry ziarâng leh a hawi zawng hi chai fê tham a awm a, a tawi zawngin heti hian i’n khai khâwm dâwn chhin teh ang:

            A hmasa berah chuan, mahni inbun ruahna, subjective poetry a ni tlangpui. Thangtharte hian an nuna thil thleng leh an thil tawn, a lawmna leh lungngaihna, an thinrimna leh an lungawi lohna, an suangtuahna chenin hlaah an chantir thin a ni.

            Pahnihnaah chuan, sawi leh serh em em an nei lo a, tunlai tawng takin an ‘frank’ hle. Hmangaihna chungchangah pawh thu khuh leh pehhel an nei lo a, sex leh a kaihhnawih lam pawh a ruh lang ruak ruakin a sawi bawl bawl ngam tawh a ni.

            Pathumnaah chuan, a hla thu mawina lam aiin, an duh dan leh an ngaih dan puan chhuah hrim hrim duhna khan a kaihruai a. Hla thu mawi tak hmang chu awm bawk mah se, a tam zawk chuan tawng tuallêng hi hlaah an chantir mai thin. Tin, hnam dang tawng leh ‘tawng lerh’ (slang word) han rawlh tel mai pawh an pawisa lem lo.

            Palinaah chuan, rhyme leh metre-in a phuar loh (free verse) lam hian a a tam zawk a hîp hle niin a lang. A rhyme, metre leh stanza rem dan inphuartir ai chuan, an duh dan dana rem chhuah mai kha an thlang zawk thin a. Punctuation leh grammar dan pawh an ngai pawimawh lem lo hle.

            Panganaah chuan, an chen mêkna khawvel laka lungawi lohna, leng lo leh chuang riau nia inhriatna, rilru hahna leh nun ipik, nun beidawnna leh rilru buaina râwl te kan hmu thin a. A then chuan tlan chhiatna tur hmun an din chawp a, chutah chuan an suangtuahnain a chêng (escape) a. A then erawh chuan a nih ang anga hmachhawnin, an rilru tawt leh ipik tak chu an hrithla phiar phiar mai thin a ni.

            Paruknaah chuan, khuarel (nature) lam hawi phuah chu awm ve nual mah se, a tam zawk chuan an pindan ril atangin khawvel an thlîr a, ‘romei zâm, khuangruah sûr leh thereng hram ri’ tih vel chuan an lung a lên ve ta meuh lo tih a lang a. Khuarela inhnemna leh chawlh hahdamna lam chu an hawi ta meuh lo.

            Pasarihnaah chuan, mi dang demna, deuhna leh duh khawp lohna kan hmu hnem hle. Ram kalphung leh sawrkar inrelbawlna kawngah te, kohhran leh khawtlang inkaihhruaina leh nun danah duh khawp an hmu lo fo a, an lungawi loin, a tidik lotute dem mai pawh an sam em em a. An tawng pawh an sumkàr lem lo hle.

            Pariatnaah chuan, tun lai poetry tam tak hi thu mawl leh awl te te rem khawm ni mah se, hla thenkhat chu hriat thiam har tak tak, han chhiar nawn fê hnu pawha hriat thiam hleih theih loh, ril leh thûk tak tak hmuh tur a awm a. A chîka chîk chet chet ngai hla a chhuak ve nual tho mai.

            Pakuanaah chuan, hla thenkhat a rem rem rem khawm ni bawk mah se, poet thenkhat chuan a chei mawina leh poetic techniques zâwnga teh pawha teh tling tur zawngin an rem lui hram hram thin a. Simile, metaphor, symbol, allusion, imagery, alliteration, hyperbole, paradox, oxymoron, personification, apostrophe leh rhyme mawi tak tak an phûm thiam em em thin a, thu han chinzân leh bâwl kual vel (wordplay) lamah pawh an duai lo hlawm hle a ni.

            Sawmnaah chuan, tunlai poet thenkhat hian an lai ah hnan hming leh an nihna ang anga lan chhuah hi an hreh thin a, hming lem inphuahin, chu chu hmaikâwra hmangin an inphên fo a. An hming lem phènah chuan an biru thin a ni.

            Kan sawi tâk bâkah hian tunlai Mizo poetry ziarâng leh kalphung, an thupui (theme) thlan hrang hrang leh a hawi zawng hi sawi fê tham a la awm a. Hetiang lama tui leh chhui zui peih tan chuan research mumal tak neia chhui tham a chhuak tawh a ni.

Tunlaia poetry-in ngaihven a hlawh zualna chhan:

            Kan thu hmâwr kan bâwk fel hmain, tunlai thalaiten poetry kan tuipuia kan ngaihven zualna chhan nia lang point thenkhat hi chhiartute ngaihtuah zui atan han tar lang leh lawk ila.

1. Phuah mai a awl. Literature thuang dang ngaihtuahin, poetry tluka phuah awl leh inbuh ruahna tha a awm lo (Phuah a awl kan tih hian, tute tan pawh phuah mai a awlsam kan tihna chu a ni lo).
2. Social media hrang hrangah duh hun hunah a pho chhuah theih a ni (Online Megazine –‘Thlaler Thlifim’ te pawh an siam).
3. Ziah emaw, chhiar emaw nan hun a heh lo. Rilru lama a thawh fuh tum chuan poem hi hun rei lo te chhungin a ziah zawh mai theih a; chutin a chhiar nan pawh hun rei tak a mamawh lèm lo.
4. College leh University lamah literature zir an tam zel avangin…
5. Mi rilru hneh a awl. Hlain mihring rilru a hneh theih dan hi sawi fê tham a awm.

Aw le, tun tum atan chuan duhtâwk dâwn mai ila. A chhui leh zir peih fate tan chuan Mizo poetry than chhoh dan leh inher danglam dan hi zir chian tham fê a ni ngei ang. Chu lam chu mi thiam zawkte kutah dah rih ila. Kan thu khâr nan duhtak châwl ta Mafaa thuziak hi i’n hmang teh ang:

“Mahni thinlung chhungril bera kan vei leh ngaihtuahna vâk vêl poetry hmanga han phawrh chhuah hi ruih lungpuama tah ang deuh hi a ni a, a zahthlak viau nâ a, a nuam ve tlat.” – Mafaa Hauhnar (Thlaler Aurawl 11)

Works Cited:

• Hauhnar, Mafaa. Thlaler Aurawl (A miscellany). 1^st ed. Gilzom Offset, 2008.
• Lalrinfela, H (Mafaa). Chawlhna Tuikam. 2^nd ed. Gilbert & Raymond Publication, 2002.
• Liandinga, P.L. “Thuhmahruai.” Lungmawl Selin by Lalzuahliana. Lalhruaitluanga Ralte, 1992.
• Renthlei, Nûnuna. Hringnun. 2^nd ed. K.L. Offset Printers, 2018.
• Vanchiau, C. Lalawmpuia. Tapchhak Theory. 1^st ed. Sabereka Khuangkaih Publication, 2011.

Bibliography:

• Khiangte, Laltluangliana. Mizo Hla leh Chhamhlate. L.T.L. Publications. 2009.
• – -. editor. Thlifim. 1^st ed. Zoppen Club, 2001.
• Khupchong, T.S. Mim Fang Khat. 1^st ed. Daifim Print & Publication, 2017.
• Laldinmawia, H. Literature Lamtluang. 1^st ed. CreatiVentures, 2015.
• Laldinmawia, H. et al., editors. Zaikùng Thar Volume – 4 (21^st Century Mizo Poetry Series). Mizo Poetry Society (MIPOTY), 2021.
• Lalzuithanga, F. Thinlung Luangliam (Wings of Poesy). 1^st ed. Mizoram Publication Board, 2012.
• Lalzuithanga, F. et al., editors. Zaikung Thar (21^st Century Mizo Poetry Series Volume 1). Mizo Poetry Society. 2017.
• Lalzarzova and Lalhlimpuii. editors. Zaikung Thar (Bu 2-na). Mizo Poetry Society 2018.
• Thanmawia, R.L. et al., editors. Zaikung Thar (Volume 3). Mizo Poetry Society. 2019.
• Thanmawia, R.L. Chuailo Bu 3-na. 1^st ed. Din Din Heaven, 2015.
• – -. Zanlai Thlifim (Ka Hla Phuahte). 1^st ed. Din Din Publication, 2016.
• Vanlalhrilha. “Tunlai Mizo Poetry Thlirna (A Critical Analysis of Modern Poetry in Mizo).” Lawilèn (Essay on Literary Criticism): 27-49. 1^st ed. Ecrivains 1719, 2018.
• Zaithanmawia, V.L. “History of Mizo Hla.” Hranghluite Sulhnu : 118-66. 1^st ed. R.T.M. Press, 1996.

(He thu hi Mizo Poetry Society-in World Poetry Day, 2021 MZP Conference Hall-a a hman tumah a ziaktu hian pawl aiawhin a sawi a ni).