World Poetry Day 2024 President thuchah

• H. Laldinmawia
  President, Mizo Poetry Society

Vawiina lo pungkhawm te hi mi chi hrang hrang, thiamna leh theihna in ang lo em em, eizawnna leh khawsak phung danglam tak tak kan ni. Kan chenna leh khawsakna hmun a inhlat ang bawkin kan mihring kum pawh a inthlau hlawm. A ṭhen chu tu leh fate nena khawsa tawh, lu a kelsam ṭo hial tawh te an nih laiin, ṭhenkhat erawh chu zan mutnaah pawh nu leh pa ten an la laitat hial awm mang e tih tur te an ni thung. Chutiang tehnuai chu ni mah ila, ‘thil pakhatin’ min phuar khawm tlat a, ‘thil pakhatin’ min ko khawm a, ‘thil pakhatin’ zaikhatah min luantir bawk. Chu ‘thil pakhat’ chu ‘hla’ (poetry) a ni.

He thil pakhat hnuaiah hi chuan kan kumin kawngro a su lo va, kan nihna in min daidan hek lo. Kan hmel leh hmingin min thliar hrang lo va, kan eizawnna leh kan dinhmunin min ṭhenhrang hek lo. He thil avang hian hmel inhmu ngai lo pawh kan inhmelhriat a, mize inang lo tak tak pawh kan inlungrual ṭhin. Chu chu a ni hla thiltihtheihna chu.

Mizo Poetry Society kan dintirha kan thupui pakhat chu, “Hla hmanga inphuarkhawm kan ni a, chu chu a tawk mai. Chetvelna (activities) ngah lutuk loh tur” tih a ni. Mahse, min phuarkhawmtu tha hi a chak lutuk a, kan tuina leh phurna hi kan dang zo lo. Kan che reng a, kan nung em em a, ruahpui vanawn sur hnuaiah, zan dar 10 hnu lama ‘committee meeting’ koh ṭhulh chuang lo pawl kan ni. Kan thu relah kan inhnial ngai lo va, kan inkhak ngai hek lo. A reltute thu rel ang ang kan pawm a, kan inphut ngai lo va, kan insel hek lo va, a awm chhun chhun hi kan lungawi em em reng mai. Pawl chungchangah kan thikthu a chhe lo em em a, mahse chu pawl chuan min phuar nghet em em lawi si! Pawl mak tak kan ni!
Buaina tham sum leh pai kan nei lo va, mahse buaipui tham hla erawh kan thinlungah a awm reng thung. Kan thinlunga kan thil vei leh kan tawnhriat, hla hmanga kan duh ang anga kan puanchhuahte chu a buin kan khawrpum zel a, chu chu ‘Zaikung Thar’ kan ti a, vawiinah a bu 6-na kan tichhuak leh dawn.

Pathian hian kan pian tirh aṭangin hnam tinte hi hla min pe vek mai a. Kan hla kalhmang leh a thluk erawh a inpersan hle hlawm. Hla leh mihring chu pumkhat an ni a, an inṭhen hrang thei tak tak lo. Hla hmangin hringnun kan fuih a, kan hringnun hian hla a cho chhuak ṭhin bawk. Hremhmun hi khawiah nge a awm tih min zawt thut se, hla tel lo hringnun chu hremhmun a ni mai, tiin chhang ta ila, chhang fuh ka inti viau ang. Hla tel lo hringnun hi a hrehawm satliah ngawt lo vang, a khawhar thlak a, a famkim lo ngawt ang. Mahse, eng ang taka hrehawm nge tih hre turin hla tel lo hringnun hi ka la tem chhin lo.

Hla hi chu a hla zaih mai a, thu nem te hian mi thinlung sak tak hi a su hawng thei bik tlat ṭhin, chu chu a ni a danglamna chu. World Poetry Day chibai vek ule.