World Poetry Day chungchang

• Lalremruati Ngente (Aremruati)
  (A ziaktu thu leh hla dang i chhiar duh chuan a hminga click rawh)

World Poetry Day hi UNESCO (the United Nations Educational, Scientific and Cultural Organization) chuan kum 1999-a an General Conference, Paris a neihah khan March ni 21 a hman hi  a lo titlu a. Hemi hma hian UK (United Kingdom) lamah te chuan kum 1994 atang khan National Poetry Day hman a lo ni tawh thin a. Kum 1999-ah chuan UNESCO-in ram bil chauh ni lo, khawvel pum huapa hnam hrang hrangte intawm theih tur ni a rawn duang chhuak leh ta a.  Chu chu World Poetry Day tih hming hrim hrim kan hriatna hmasa ber chu a lo ni ta a ni.

UNESCO-in World Poetry day a duan chhuah chhan ber chu  tawng hrang hrang boral mai thei dinhmuna ding te khawvel hriat theih tura pho chhuah anih nana hmalak te,  hla atanga/kal tlanga tawng hran hrang chawi kanna kawnga hmalak te hi a ni a. “Tun hma atang tawh khan ram hrang hrangah leh hnam hrang hrangah Poetry hian mihringten mihring mihrinna kan intawmah leh pawm dan leh ngaihdan kan intawmah thu a lo sawi tawh thin a. Poem holam bera kan ngaih te pawh hian mihring inlaichinnaah leh remna leh muanna siamna kawngah nasa takin kawngro a su a ni” tih hi Poetry chungchanga UNESCO ngaihdan, an website-a an tar chhuah a ni a.

Khawvel hnam hrang hrangte hian nun phung hrang hrang neiin, kan tawng te, kan incheina te danglam mah sela, mihring vek kan nih avangin chhungril lamah chuan inzawmna leh inlaichinna thûk tak kan nei a. Keimahnia bet tlat mihring mihrinna, hlim thei chunga lungngai thei, nui thei chunga tap thei, vanneihna leh vanduaina inkara nun thim leh êng paltlang vek kan nihna te, mihring nun leh a chhehvela thil thleng kan thlirna leh kan thinlunga zawhna awm chhanna kan zawnna leh zir chianna kawnga ngaihdan leh pawm dan inang, hnam hrang, ram hrang daiha cheng, inhmua inkawma titi dun phak reng reng loten ngaihtuahna inang kan neih te pawh Poetry hian min lo puan chhuahsak thin a ni, an tihna ni berin a lang a.

Chuvang chuan kan nuna kan thil tawn azira kan thil ngainat zawng leh kan mawi tih zawng te pawh a danglam thin angin Poetry tha kan tih zawng te, mawi kan tih zawng te, thuchah ril leh ropui tak pai nia kan hriat te pawh kan duh dan leh ngaihdan a inang vek kher lo ang. Mahse, Poetry holam ve deuha kan ngaih, hla dang nena kan han khaikhina kan dah san em em loh te thleng pawh khan, Poetry hrim hrim hian hlutna a lo pai vek mai a. Mihring inlaichinna siamthatna kawngah te, mihring nun hona atana thil pawimawh em em remna leh muanna siamna kawngah kawngro a su a, tangkaina lai an nei vek a ni. UNESCO-in Poetry nihna leh hlutna an sawi chhuah dan hi a ropui khawpin ka hria a. “Tui mal  far te tein tuifinriat a siam a” tih ang deuh khan, eng Poetry pawh hian hlutna  a neihzia leh mihring nunah a tha lam zawnga nghawng a neih theih dan an hmu chiang hle a ni.

World Poetry Day-in a tum ber chu khawvel pumpuia Poetry (hlahril) ziah leh chhiar te, mipui chhiar theih tura chhawp chhuah (publish) te, chanchinbu leh lehkhabua chhuah te pawh a ni ang chu, leh Poetry zirna leh zirtirna tih hmasawn te, Poetry chham leh chhiar tihnun leh te mai bakah Poetry-in khawvel ram hrang hrang, khawmualpui hrang hranga awmte a hui khawm anga Poetry leh Art dang lemchan, lam, rimawi tum leh lemziah thlenga kalkawptir kawnga hmalak mai bakah media lama hlahril (poetry) chawi kan te hi a ni. UNESCO hian kum tin World Poetry Day pualin Poetry hmasawnna leh chawi kanna lam hawi thusawi chu media hmanga en theih turin an dah chhuak thin a,  youtube-ah te pawh hmuh tur a awm thin a. Nikuma Director General thuchah chu,

Mizo tawngin hetiang hian han dah ta ila,

Thumal rem khawm suangtuahna thla hmanga cheimawi, meter dik taka chhut/chhun hlahril hian tluk rual loh thiltihtheihna a nei a. He thiltihtheihna hi nitin nun pangngai atanga min sawi harhtu leh min hual veltu, mawina leh mihring thla feizia min hriat nawntirtu a ni.

Hetianga UNESCO-in kum 1999 atanga kum tin World Poetry Day pual thuchah a rawn tihchhuah hnu hian ram hrang hrangah World Poetry Day ngaih pawimawhna a lian chho zel a. Ram hrang hrangah a remchan dan angin School, College leh University-ah te hman a ni thin a.  Poetry lama tui/ Poet inhlawm khawm pawl hrang hrangte pawhin World Poetry Day pual hian hun an hmang thin bawk.

Mizoramah pawh kum 2016-a Poetry lama tui miten an din Mizo Poetry Society huaihawtin kum 2017 atang khan World Poetry Day hi hman tan a ni a. Mizorama World Poetry Day hmanna hmasa ber nia lang chu kum 2017 khan Mizoram University-a Mizo Department zirlaite nen Hrangbana College, Golden Hall-ah hman a ni a. Kum 2018 khan MIPOTY leh Art & Culture Department tangkawpin Archives Hall, Babutlangah hman a ni. Kum 2019 kumah chuan World Poetry Day hi holiday a nih avangin MIPOTY member thenkhatin Doodarshan leh All India Radio lamah Poetry chungchang sawi hona hun an hmang a.  Kum 2020-ah chuan Covid-19 hripui leng avangin World Poetry Day hi hman theih a ni lo a, kumin hi Mizorama World Poetry Day hman a nih atanga a kum ngana, a huhova hman a nih tum thumna a ni ta a ni.

MIPOTY buatsaih World Poetry Day hman tawhnaah hian Poetry reading mai bakah thusawi ngaihnawm leh bengvarthlak tak tak ngaihthlak tur a awm thin a. Hla phuahtute ngaihtuahna meisi chhem alh a, hla tha tak tak an phuah chhuahna kawnga tanpui thei tur fuihna thu leh anmahni leh an kut chhuak inenlet theihna tur darthlalang chhawp chhuahsak an nih mai bakah UNESCO-in World Poetry Day a hman chhan leh a tum ber Poetry ziah leh chhiar kawngah te,  mipui chhiar theih tura chhawpchhuahna kawngah te, ram leh hnam hmasawnna leh mihring mihrinna mawi tak vawn nun zelna atana Poetry tangkaina te ngaihthlak tur a awm thin a ni (Chutiang chu kum dangah pawh kan President leh mi dang hnen atang te pawn kan lo ngaithlak tawh thin kha).

UNESCO*in World Poetry Day a din chhan leh World Poetry Day in a tum ber hi a hlawhtling em? tih chungchangah hian, a hre chiang ber tur leh chhanna dik tak pe thei tur chu keiniho hi kan niin ka hria a. Vawiinah pawh ti hian World Poetry day hmang turin hmel, pianphung leh kum lama inang lo tak tak te kan lo kal khawm a, kan nunphung, kan khawsak phung, kan hnathawh thin leh eizawnna te, kan mizia leh kan rilru sukthlek thlengin a danglam hlawm viau mai thei a ni. Mahse, kan zavai hian inan vekna kan nei a, Poetry kan tui a, kan ziak thin a, kan ngaihtuahna khatliam bun ruah nan kan hmang a, keiniho hi chuan kan khawhar hnemah Poetry hi kan hmang mai a ni lo a, a chang chuan mipui punkhawmna hmun tlanchhiatsan a fianriala khawharpui atan pawh kan thlang zawk hial thin a nih kha.

Tichuan, hmun hrang hranga cheng, hmun hrang hranga selian, mi inang lo tak takte kha Poetry-in min hui khawm a, Poetry Festival hmang tur te, Workshop chhim tur te, Poetry bu tlangzarh tur te, Poetry chungchang leh Poetry kaltlanga mihring nun leh a chhehvel sawi ho tur te, World Poetry Day hmang turtein veng hrang hrang atangin, khaw hrang hrang atangin kan lo kal khawm a. He lai dawhsanah Poet tu emawin a hla a rawn chhiar a, kan lo ngaithla a. “Chu hla chu ka inhmeh hle mai, ka nun ram a pho chhuak,…” te kan lo ti a. Awmhmunah kan hnuk te a lo ulh a, a hlimawm lam chi a nih pawn kan lo hlimpui veng veng a, kan lo feel veng veng a. A hma zawnga inhre ngai reng reng lo, khawlaiah pawh inhmelhriat loh pelh vawk vawk thinte thinlungah inngainatna a lo piang a.

Kan lungngaihna te hi min vai kiansak thei nghal kher lo mah se, chhungril taka min hrethiamtu, min pawmtu kan mihringpuite hnena sawichhuahna tur kan neih chuan mahni chauha tawrh ai chuan a nuam a, lungngaihna leh tawrhna meuh pawh hi kan nuna mi pawimawh deuhte kan tawnna a lo nih hlauh phei chuan a lungngaihthlak dan kha a hlu veng veng tawh zawk mai thei a ni. Chutah tak chuan mihring mihrinna hlutzia a lo lang a, kan kutzia thlengin a danglam vek kan ti chungin, mi dante ang thoa danglam bik riauna nei vek mihringte kan inanna a lo lang chhuak a. Chu chuan inlaichinna tha a rawn hring chhuak leh a, chu tak chu atir lama kan sawi World Poetry Day-in a tum kha a ni.

Chu mai bakah chhuan tun laiah chuan Social Media a chak tawh a. Youtube channel neih te pawh thalaite phei chuan kan intihhmuh nasa tawh a. Facebook, Instagram, Twitter thlengin kan Poetry ziah leh chhiar pho chhuah nan kan hmang tangkai a, naktukah pawh YouTube-ah Poetry reading, tawng hrang hrangin, hnam hrang hrang kut chhuak ngaihthlak tur a awm leh nual ka ring a. Keini pawn DDK lamah te, Zonet lamah te…tikhan, Mizo leh English Poetry Reading tawng chi hnihin mipui ngaihthlak theih turin kan han chhawpchhuak ve ta phawt a, khangte pawh kha UNESCO leh World Poetry Day thil tum hlawhtlinna zel a ni. World Poetry Day leh Poetry Society te hi lo piang ta lo sela, khawhar taka mal taka ngaihtuahna khatliam bun ruaka, mahnia lo tei rak rak tur te kha ti hian kan han inhmu khawm a, in lama kan tih tur tul kalsanin, kan ngaihtuahnaa kan vei hrang hrangte dah thain, kan tui ang tui ve, kan ngaihtuah ang ngaihtuah ve thin te nen hun kan han hmang ho a. Keini mihring mihrinna ngaihlu em emte thlirna atang phei chuan, a aia hlu awm chuang hian ka hre lo a. Chu chu, kan zavai hian a hrilhfiahna paitu leh a hlutna tem hretu kan ni mek bawkin ka hria. Chuvang chuan vawiin World Poetry Day hi hlim taka hmang theuh turin duhsakna kan hlan nawn leh che u a ni. Ka lawm e.

(He thu hi World Poetry Day, March ni 21, 2021-a MZP Conference Hall-a hman tumin a ziaktu hian a sawi a ni).