World Poetry Day leh Mizote
World Poetry Day hi UNESCO (the United Nations Educational, Scientific and Cultural Organization) chuan kum 1999-a an General Conference, Paris a neihah March ni 21-a hman turin a lo rel a. UK (United Kingdom) lamah chuan kum 1994 atang khan National Poetry Day hman a lo ni tawh thin. Kum 1999-ah chuan UNESCO-in ram bil chauh ni lo, khawvel pum huapa hnam hrang hrangte intawm theih tur ni a rawn duang chhuak leh ta a, chu chu World Poetry Day tih hming hrim hrim kan hriatna hmasa ber chu a lo ni ta a ni. UNESCO-in World Poetry day a duan chhuah chhan ber chu tawng hrang hrang boral mai thei dinhmuna ding te khawvel hriat theih tura pho chhuah a nih nana hmalak te, poetry kal tlanga tawng hrang hrang chawi kanna kawnga hmalak te hi a ni a. “Tun hma atang tawh khan ram hrang hrangah leh hnam hrang hrangah poetry hian mihring ten mihring mihrinna kan intawmah leh pawm dan leh ngaih dan kan intawmah thu a lo sawi tawh thin a. Poem mawlmang bera kan ngaih te pawh hian mihring inlaichinnaah leh remna leh muanna siamna kawngah nasa takin kawngro a su a ni,” tiin poetry hi UNESCO website-ah tar chhuah a ni .
World Poetry Day-in a tum ber chu khawvel pumpui huapa poetry ziah leh chhiar te, mipui chhiar theih tura chhawp chhuah (published) te, poetry zirna leh zirtirna tih hmasawn te, poetry chham leh chhiar tihnun leh te mai bakah poetry-in khawvel ram hrang hrang, khawmualpui hrang hranga awmte a hui khawm ang a, poetry leh art dang lemchan, lam, rimawi leh lemziah thlenga kal kawptir kawnga hmalak te bakah media lama poetry chawi kan te hi a ni. UNESCO hian kum tin World Poetry Day pualin poetry hmasawnna leh chawikanna lam hawi thusawi media hmanga en theih turin an dah chhuak thin a ni.Nikuma Director General Audrey Auzolai thuchah tlangkawmnaah khan, “Tun huna chêng, kan thlahtute sulhnu rochun a, kan thlah lo la kal zel turte tana khawvel vawng himtu mipa leh hmeichhia kan nihna ang hian, kan thinlung chhungril berah poetry hian hmun a luah reng a. Vawiina poetry lawmna hun kan hman mek lai hian, khawvel mihring zawng zawng huap harsatna lungrual taka hmachhawn thei tur leh hmasawnna kawnga inthurual taka hma la ho tura kan inzawm khawmna kan lawm a ni,” tih kan ngaithla a, hei hian mihring mihrinna leh inlaichinna kawnga poetry pawimawhna leh thiltihtheihna a tarlang chiang hle a ni.
Mizoramah pawh kum 2016-a din Mizo Poetry Society (MiPOTY) huaihawtin kum 2017 atang khan World Poetry Day hi hman tan a ni a. Mizorama World Poetry Day hmanna hmasa ber nia lang chu kum 2017 khan Mizoram University-a Mizo Department zirlaite nen Govt. Hrangbana College, Golden Hall-ah hman a ni a. Kum 2018 khan MiPOTY leh Art & Culture Department tangkawpin Archives Hall, Babu tlangah hman a ni bawk. Kum 2019 kumah chuan World Poetry Day hi holiday a nih avangin MiPOTY member thenkhat ten Doordarshan leh All India Radio-ah poetry chungchang sawi hona hun an hmang a. 2020-ah chuan Covid-19 hripui leng avangin World Poetry Day hi hman theih a ni lo. Kum 2021-ah MiPOTY member thenkhat ten DDK, AIR leh ZONET-a hun an hman hnuah MZP Conference Hall-ah a huhova hman a ni a, kuminah hian zoom kaltlangin zanin (21st March) dar 8:30-ah hman a ni dawn a, thusawi leh poetry reading ngaihthlak tur a awm dawn a ni.
MIPOTY buatsaih World Poetry Day hman tawhnaah hian thupui thlan bik zirhona leh thusawi ngaihnawm leh hlawkthlak tak tak te, hlahril chhiar te ngaihthlak thin a ni a. Poet te leh poetry lama tui mite tan poetry hmanga mihring nun kawng hrang hranga hmasawnna tur kawng inkawhhmuhna leh inzirtirna chhawp chhuah a ni thin.
Poetry hi khawvel huap pawha ngaih san leh ngaihhlut hlawh a ni a, hnampui leh thiamna kawnga sang apiang mai hian a ropuina an hmu chiangin, an ngaihlu thiam emaw tih mai tur a ni. Khawvelin a ngaihven thin, America President lak luhnaah hian poet paruk (6) laiin an poem an lo chhiar tawh a. A hmasa ber chu Robert Frost a ni a, kum 1961-a President John F Kennedy lak luhnaah khan “The Gift Outright” tih hla a chhiar a, a hnuhnung ber chu kum 2021-a President Joe Biden lawmluhnaa chhiartu Amanda Gorman poem “The Hill We Climb” kha a ni. Khawvel chawimawina ngaih san leh ngaih hlut Nobel Prize dawngtu zingah pawh poet hrang hrang Rudyard Kipling (1907), Rabindranath Tagore (1913), Romain Rolland (1915), W.B. Yeats (1923), Gabriela Mistral(1945), T.S. Eliot (1948), Pablo Neruda (1971), Czeslaw Milosz (1980), Octavia Paz (1990), Seamus Heaney (1995), Wislawa Szymborska (1996) te an lo tel tawh bawk. Poetry in thu leh hla khawvela hmun a chan dan te, khawvel hmasawnna leh mimal, ram leh khawtlang nun a nghawng dan chungchangah hian sawi tur tam tak a awm a, indona chawk chhuaktu anih theih ruala remna siam a, thinlung hliamte tuamdam theitu a nihna hian, a tha zawng leh a tha lo zawnga a thiltihtheihna pawh a tarlang chiang hle awm e.
Mizo mi thiam leh ropui tak tak zingah pawh poetry hian hmun thuk tak a chang pha a. India rama chawimawina sang Padma Bhushan dawng thei Capt. L.Z. Sailo (2007) khan Awmkhawhar Suihlunglen (1997) te, Suihlunglen Hlahril (2001) te, Insuihkhawm Leh Zai I Rel Ang U (2008) te a tichhuak a. Padma Shri dawng zingah pawh James Dokhuma (1985) chuan, ‘Ka Hla-hrilte’ tih 1989-ah a tichhuak a. Dr Laltluangliana Khiangte (2006) chuan Rochuam (2006) a ti chhuak a, MIPOTY President ni mek Prof. RL Thanmawia (2012) pawn Senmei (1997) te, Zanlai Thlifim (2016) te a lo buatsaih tawh. Mizo te hi hla hian min chim hmain, a neih pawh kan nei tha hle a. Run lui kan hma AD 1300-1450 bawrah khan Thantlang Upa Hla nei tawha sawi an ni. Thiamna leh finna a than rualin Mizo hla pawhin hma a sawn zel a. Chanchin thain min chim hma zawng khan hla thahnem fe an nei hman a ni. Hetih karah hian a thluk nei kan tih hian ram a la zauin mi rilru a luah hle a. Poetry/hlahril kan tih bik hi a kilah a lo thaw ve dep dep a ni ber e. Kum 1989-a James Dokhuma buatsaih ‘Ka Hla-hrilte’ tih kha Poetry bu hmasa ber ni a hriat a ni a. Kum 2000 hma lam zawng khan bu sawm tha awrh a chhuak ve a hriat a ni bawk.
Social media-in Mizote a chim ve hnu hian mahni remchan ang anga hla phuah lo buaipuia tuipui an kat ta nuk mai. Facebook-ah group te siamin a tui mite an inhawr khawm a. Whatsapp te hman a nih hnu pawh hian hlahril hian parna tur kung a la zawng reng tih ngam a ni. Chu chuan rah tha a chhuah a, Mizo Poetry Society a din (2016) hnu phei chuan pawl member zingah poetry bu 30 tha zet tichhuak an lo awm tawh a ni. Thangtharte khawvelah hetianga poetry uar zawka buaipui a ni leh hi a lawmawm hle. Tuna thangthar hlahril a bua chhuakte ngawt pawh hi zirna sang zawka zir zau a, zir chian tlak leh zir tham a ni ta hial mai.
Poetry hian a phuahtu rilru a puan chhuah laiin, a chhehvela thil thleng chhinchhiahna a keng tel a, a phuahtu ngaihtuahnaa hlimna leh tuarna lo lang chuan, chu thil thlentirtu leh a kaihhnawih thil dang zawng zawng a fun tel nghal miau avangin, mimal, khawtlang leh hnam darthlalang pawimawh a ni. He hnam nunah hiaan eng nge inphum a? he hnam hian eng thil te nge a lo hmachhawn tawh a? Engtin nge a paltlang? tih tarlangtu anih tlat avangin chung thil rawn zir chiang nawn leh zeltu tur te tan pawha hmanraw pawimawh ber te zing ami, a la ni chho zelin a rinawm.
(He article hi March 21, 2022-ah khan ni tin chanchinbu The Zozam Times — Vol. XVI No. 047 March 20-21, 2022-ah tihchhuah a ni. World Poetry Day 2022 puala Mizo Poetry Society hmalakna pakhat a ni a, a ziaktute hi MiPOTY Executive Committee Member an ni).
