World Poetry Day
Kum 1999-a Paris-a UNESCO General Conference neih chuan March ni 21 hi ‘World Poetry Day’ ah a puang a. Kum tinin khawvel hmun hrang hrangah hemi ni hi lawm thin a ni. Mizoramah pawh Mizo Poetry Society (MIPOTY) huaihawtin, a remchan ang anga lawm thin a ni a, hlahril (poetry) chhiar hmang tea in-awiin, thupui pawimawh tak tak zir hona hun an buatsaih thin.
World Poetry Day hian hlahril (poetry) leh hla phuahtu (poet) te chawi san a tum mai a ni lo va, a ken tel thil tam tak a awm, tlem azawng han tar lang ila.
Pakhatnaah chuan, hlahrilah chuan tawng tih bik a awm lo. Kan nun dan han thlir ila, tawng avanga inthliar hranna leh intihbikna hi a va’n tam em! Tawng hi kan nun honaah a pawimawh em avangin inteh nan tak kan hmang fo va, Sap tawng kan tih te pawh hi thil tam takah inteh nan kan hmang a, indiriam nan leh inhmuhsit nan kan hmang thin a nih hi. Han sawr zim deuh ila, ‘linguistic variation’ avanga tawng thluk hran avang pawha kan inpawh lohna hi a va tam ta em! Hlahril (poetry)-ah chuan heng harsatna leh buaina te hian hmun an chang lo va, eng tawng pawh ni se, hlahril an nihna a bo chuang hauh lo va, an thiltihtheihna pawh tawng azirin a nepin a sang chuang hauh lo. Hlahrilah hian inpumkhatna, inremna leh tawng zawng zawng intluktlanna a awm hi a hahdamthlakin a mawi hle a ni.
Pahnihnaah chuan, hlahril hian thiltihtheihna mak leh thuk zet a nei a. Bible kan en chuan hun pawimawh tam takah Pathianin a mi hmante leh zawlneite kaah thu ni lovin hla a dah thin tih ka hmu a. Tunlai khawvelah rilru lam harsatna tawk tam tak an awm a, a enkawltu psychological counselor leh psychiatrist te chuan an rilru a vei zawng te ziak chhuak turin an ti thin a, chumi hmanrua atan chuan hlahril hi hmanraw tangkai leh hman lar tak a tling a ni.
Muriel Rukeyser chuan kum 1949-a a lehkhabu ziah ‘Life of Poetry’-ah chuan indonain a nghawng ram leh hnam hnuaihnung zawk te tan hlahril a pawimawh thu a sawi a. Kum 2003-a a lehkhabu ziah ‘Poets Against the War’-a hlahril phuahtu thenkhat Forche, Celan, James Wright, Blake, Yeats, Oppen leh Levertov te hla hmangin Alice Templeton chuan hlahril behchhana indona hla phuah te hian indona ina a thlen leh tawnhriat te’n chakna an pe a ti tlat a ni. He lehkhabuah hian Morton Marcus, Korean war veteran chuan chung a tawnhriat a hriat rengna chuan a tilungngai em em thin a, chu a lungngaihna chuan a chhungril atangin hlahril a hring chhuak niin a sawi.
Thuziak rau rauah pawh hlahril hi inbunruahna atan a that bakah mi hneh theihna leh chhungril nghawng theihna a neih tlat vang a ni ang. USA President lakluhnaah pawh vawi 6 lai chu hlahril chham chhuahna hun hman a ni tawh a. Kum 1961 khan Robert Frost chuan John F. Kennedy lak luhnaah ‘The Gift Outright’ a chhiar a, kum 1993 khan Maya Angelou-in Bill Clinton lak luhnaah ‘On the Pulse of Morning’ tih a chhiar bawk a; Miller Williams-in kum 1997-a Bill Clinton lak luhnaa ‘Of History and Hope’ a chhiar te, kum 2009 leh 2013-a Barack Obama lak luhnaa Elizabeth Alexander leh Richard Blanco te’n ‘Praise Song for the Day’ leh ‘One Today’ an chhiar te kha ngaihnawm tak a ni. Kum 2021-a Joe Biden lak luhnaa kum 23 mi Amanda Gorman-in ‘The Hill We Climb’ a chhiar phei kha chu mi a hnehin mi tam tak thinlung a khawih a nih kha.
Hetiang hian hnampuiho zingah chuan poetry hian hmun lailum a changin, ngaih hlut a hlawh em em thin.
Tun hma deuh kha chuan Mizote zingah poetry kan tih zinga a thlûk nei lo hlate hian ngaihven leh ngaih hlut a hlawh tâwk lo hle thin a. A pawimawhna kan hre tâwk lo a, a phuah thin (poet)-te ngaih hluta ngaih san nachang pawh kan hre tâwk lo fo. A bu-a chhuah a nih pawhin hralh a tla lo hle thin a, mipuiin a hlutna kan la pawh tak tak lo niin a lang.
Vanneithlak takin, tlem lai deuh atang khan thalaite zingah poetry lama harh tharna leh tui tharna kan hmu a, hei hi thil lawmawm tak a va ni em! Hetianga poetry lama tui thar thalaite hui khawm a, awmze neia kalpui a, poetry puala intawh khawm huaihawt a, a bu hiala thalaite hlahril chhuahsak thintu Mizo Poetry Society (MIPOTY) a lo ding hi a lawmawm tak zet bawk.
Poetry pawimawhna leh tihhmasawn zel a tulna kawng hnih khat lek han tar lang ila.
Pakhatnaah chuan, poetry hi a phuahtute tana inbun ruahna a nih rual hian, a lo chhiartu leh ngaithlatute tan pawh hlutna tam tak a nei a. An rilrua an lo vei leh an lo pai rauh rauh, an sawi chhuah thiam si loh an chhar chhuahna a nih thin avangin a hlu hle. Poetry hi mihring nun chau leh chak lo tan chawlhna, hlimna leh hahdamna pe thei a ni a, chuvang chuan kan ngaihthah ngawt thiang lo a, kan chawi larin kan tihmasawn zel tur a ni.
Pahnihnah chuan, ‘Mihring hi chhang chauhin an nung lo’ tih ang khan mihring hi khawvel hausakna, thuneihna leh hming thatna ringawt hian hlimna min thlen lo a, kan lunglenna leh kan suangtuahna zalen taka kan puan chhuah a, inhrikthlak kan mamawh thin. Chutianga kan vei zawng kan bun ruah theihna poetry hi mihring tan a pawimawh em em a, tihhmasawn a, awmze neia kan kalpui zel hi a tul a ni. Poetry mawina te, a hlutna leh a tangkaina te, mihringte tana chawlhna leh hahdamna a nih theih dan te hi sawi chiama fiah chi a ni chiah lo a, thinlung lam atanga hriat thiam ve a ngai thin. Vawiin ‘World Poetry Day’-ah hian poetry hlutna chhar thar theuh thei ila a duhawm hle.
(He article hi March 21, 2022-ah khan ni tin chanchinbu The Aizawl Post — Vol. XXI No. 66 March 20&21, 2022-ah tihchhuah a ni. World Poetry Day 2022 puala Mizo Poetry Society hmalakna pakhat a ni a, a ziaktute hi MiPOTY Executive Committee Member an ni).
