‘Zo Zêm’ thlirlawkna
1. He lehkhabu Zo Zêm, Pi Malsawmi Jacob ziak hi a lehkhabu 10-na a ni a, chhamhla chungchang a ziak lehkhabu pathumna a ni bawk.
2. Zo Zem hi a bu hming tepen (sub title)-a tarlan a nih angin Chham hla leh Chham hla chungchang khelna lehkhabu a ni a. Chhamhla thar 40 a awm bakah a lehkhabu hmasa ber Tinkim Dawn tih-a a chhuah tawh chhamhla 16 a awm bawk a, a vaiin chhamhla 56 a awm a ni.
3. He lehkhabu hi phek 133 bakah a phek hma phek 17 nen, a vaiin phek 150 a ni a. A lehkhabu hi hlawm thum-ah then a ni a, hlawm khatnaah ‘Chhamhla chungchang’ tarlan a ni a, hlawm hnihnaah ‘Chhamhlate’ tih awmin hlawm thumnaah ‘Tinkim dawn atanga lakte’ tia then a ni. He lehkhabu hi Serkawn hla phuah thiam Lalmama hriatrengna atana hlan (dedicate) a ni a, a lehkhabu hi a tihlu ve sawtin ka hria.
4. A lehkhabu hmelhmang a mawi a, a kawmah hian darkhuang lm leh Mizo puan ni awm tak a awm a, a simple rualin a hmel a mawihmang hle. A paper pawh a tha hle bawk. Brilliant Printers, Bengaluru chhut niin a cover hi Khos Hmar design niin a layout design hi Joshua Sikhamani khawih a ni thung a ni. Mizo zinga hla lama Ph.D nei hmasa ber leh Mizo Poetry Society, President Prof. R.L Thanmawia chuan thuhma a ziak bawk a, a thuhma ringawt pawh hi ngaihnawm tham a ni.
5. He lehkhabu hi creative works leh criticism inkawp tiin a sawi theih ang a, chutih rualin chhamhla zirchianna, critical writings tia sawi theih hi a creative em em thung mai. ‘Chham Hla Chungchang’ a sawifiahna hi a ngaihnawmin a bengvarthlak a, mawlmang te, pawm nuam leh awlsam takin a ziak thiam a. Chhamhla chungchang hi hlawm 11-ah a then a, Chham Hla chu eng nge? Mizo Hla Hlui thenkhat, Mizo Hlahril bul tanna, Mizo chhamhla, Tunhnai leh tunlai, Hlahril ziakmite tan, Ka chhamhla tha tihzawng, engnge kan sawi duh? Kan sawi dan, Hlahril ziakmite hmanrua, ennawn fo a ngai, tlipna te a ni a.
6. He lehkhabua chhamhla chungchang a sawi hi zirchik tham a ni a, ka chhamhla tha tihzawng tiha, tha a tih zawng hla a tarlante hi zir ngun tham a ni
(a) Ka chhamhla tha tih zawng chu nem hliai lo, ruhkawl chang leh tihrawl khauh a ni
(b) Thlitfim leh kaih tawi hi chu a chiang saah ngai ila, bengmuk tih hi thil pakhat chauh sawina a ni lo.
(c) Mimal lunglenna emaw, lunghnurna emaw a ngai ngaia chham chhuah hi chhiar tui a har
(d) Chham duah, bawl phawn vak aiin a chhiartu suangtuahna kaitho tawk chauha ziah hi a ngainatawm zawk
(e) Sermon ngial ngan, min hrilh leh zirtir tum run mai hi phuahtu thiam chungchuang tak kutchhuak a nih loh chuan a mawi har.
7. Chhamhla chungchanga a duhkhawplohna hi ngaihtuah zui ngai tak a ni a, tunlai thangthar hla phuahtute tan pawh ngaihtuah chian zui ngai niin ka hria.
- Chham hla hi mimal feeling hrilthlakna ringawt a ni lo
- Chham hlain a phuahtu lam ringawt a hawi tumtla a nih chuan thu leh hla tha a tling har
- Ziakmite leh hlahril phuahtute hi zawlnei dinhmuna ding an nihna lai a awm
A chhunga chhamhla 40 te hi a mal te te pawha zir chian tham hla mawi leh tha tak tak a ni a, he thlirlawknaah erawh chuan a hla mal hi kan umzui thui lo mai ang. In lei a, in chhiar hunah eng ang taka lehkhabu hlu nge a nih ang tih chu in kutah a awm e.
(He thu hi Pi Malsawmi Jacob lehkhabu ‘Zo Zem’ tih online-a tlangzarhna, June ni 20, 2022 zan dar 8:30-a buatsaiha sawi a ni)
