Kum 2023 chhunga poetry bu tha ber ‘Thingthlavar’
Mizo Poetry Society (MIPOTY) chuan kum 2023 chhunga Mizo kutchhuak poetry bu zinga tha ber atan Nununa Renthlei poetry bu ‘Thingthlavar’ a thlang a, MIPOTY Book Award 2023 hlan a ni. Book Award hi World Poetry Day 2024 lawmna, I & PR Auditorium, Aizawla hmannaah Pi Carol VLMS Dawngkimi, Director, Art & Culture Department chuan a hlan a; he Award hian memento, tangkafai cheng singkhat leh certificate a keng tel a ni.
March 21, 2024 khan Mizo Poetry Society leh Department of Mizo, Pachhunga University College tangkawp chuan World Poetry Day 2024 lawmna leh, Poetry Workshop chu I & PR Auditorium-ah an hmang a, Pi Carol VLMS Dawngkimi, Director, Art & Culture Department chu khuallian a ni. Khuallian Pi Carol VLMS Dawngkimi chuan poetry lama Mizote kan ṭhan nasat dan a sawi a, Mizoram Publication Board-ah poetry bu chhuahsak tura dil an tam ṭhin thu te sawiin thu leh hla ziaktute chu kan ziah theih loh ziaktute an ni, tiin poet-ho ropuizia te a sawi bawk a, poetry lama hma sawn zel turin kal khawmte a chah a ni.
He hunah hian Dr. H. Laldinmawia, President, MIPOTY pawh thu a sawi bawk a. Prof. RL Thanmawia, Sr. Adviser & Founder President, MIPOTY chuan thangtharte poetry hrang hrang dah khawmna bu ‘ZAIKUNG THAR’ Vol – 6 a tlangzarh a, he lehkhabu hi lehkhabu dawr hrang hrangah lei theih a ni.
World Poetry Day lawmna hi KC Lalthansanga, Secretary-in a kaihruai a; H. Lalawmpuia, Asst. Secretary-in report pein Dr. H. Laldinmawia, President chuan lawmna thu leh thuchah tawi a sawi a. Lalremruati Ngente, Treasurer pawhin World Poetry Day thuchah a sawi bawk. Hemi hnu hian MIPOTY Book Award thlangtu atangin F. Vanlalrochana, EM chuan report pein Award dawngtu chu Thingthlavar a nih thu te, an thlan dan te a sawi a, hemi hnu hian Khuallianin Award hlanna neiin thu a sawi.
Zaikungthar Bu 6-na buaipuitu, Editorial Board atangin Laltlanmawia, EM chuan an buaipui dan te a sawi bakah, lehkhabu chungchang sawi hawnna a nei a, chu chu Prof. RL Thanmawia, Sr. Adviser & Founder President chuan tlangzarhin thu a sawi zui bawk. He hunah hian Lalrempuii, VI Sem BA, Mizoram Christian College chuan poetry a chhiar a ni.
Hun hnihnaah hian Poetry Workshop neih a ni a, Dr. Remlalthlamuanpuia, Asst. Professor, PUC chu Moderator a ni a, Pu Lalsangzuala, Asst. Professor, MZU chu Resource Person niin hun hlimawm tak hman a ni bawk.
Lawmthu sawina:
He hun kan hman theihna atan Art & Culture Department chuan min sponsor a, Pi Carol VLMS Dawngkimi, Director chungah lawmthu kan sawi a; tin, MIPOTY Book Award-in a ken tel, Rs. 10000 hi kan founder President Prof. RL Thanmawia’n a sponsor a ni bawk a, a chungah kan lawm em em a ni. Chutiang bawkin Award dawngtu Nununa Renthlei (Dr. Lalnunpuia Renthlei) chuan Award-in a ken tel, tangkaifai Rs. 10,000 atangin Rs. 5,000 chu MIPOTY tanpuina atan a hlan let leh a, a chungah MIPOTY chuan lawmthu a sawi a ni.
Programme hlawhtling tak kan neih theihna tura kan thawhpui, Mizo Department, Pachhunga University College chungah lawmthu kan sawi a, anni bakah Mizo Department, Mizoram Christian College chungah lawmthu kan sawi bawk.
