MIPOTY EC ṭhukhawm, Book Award kalphung thlak danglam
November ni 5, 2024 (Thawhlehni) zan dar 7 khan, MAL Office-ah Mizo Poetry Society (MIPOTY) Executive Committee meeting neih a ni a, Mizo kutchhuak poetry bu ṭha thlan chhuah, MIPOTY Book Award kalphung chu thlak danglam turin a rêl.
MIPOTY Book Award hi ṭum khat sem a ni tawh a, nikum lama poetry bu chhuak ṭha ber atan Nununa Renthlei poetry bu Thingthlavar chu thlan niin kumin March 21-a World Poetry Day lawmnaah hlan a lo ni tawh a ni. Kalphung thar turah chuan, kum khat chhunga poetry bu chhuak hi a tam loh avangin, kum khat dan (kum hnihnaah zel)-ah thlan ni se, kum 2026 aṭangin kalpui ṭan ni se tih a ni a, poetry ṭha thlan leh a lehpeka thlan inkara poetry bu chhuak a huam ang, tih a ni bawk. Kumin, 2024-ah hian hriat theih chinah Mizo tihchhuah poetry bu hi paruk a chhuak tawh a, kumina tihchhuah tur bu dang pali (hriat theih chinah) a la awm bawk a ni.
Hei bakah hian kum thar lama hmalakna tur hrang hrang sawi ho a ni a. World Poetry Day 2025-ah Mizo Department, Pachhunga University College nen ṭangkawpa Musical Poetry Nite neih tura rel a ni a, a mawhphur tur pawh ruat nghal an ni. Zaikungthar Vol-VI atana mawhphur turin — F. Vanlalrochana, Gladys Lalhruaitluangi leh Thang Sian Tluang te ruat an ni bawk.
