MIPOTY-in lehkhabu rotling tichhuak dawn
April 27, 2023 (Ningani) zan dar 7 khan kum 2023-25 term thar atan MIPOTY Executive Committee thut khawm hmasa ber chu Senior Adviser Prof. RL Thanmawia In, Ramhlun South-ah neih a ni a, thil pawimawh hrang hrang rel niin, heng zingah hian lehkhabu rotling tak tihchhuah chungchang te rel a ni.
He thutkhawm hi Dr. H. Lalrinmawia, President-in a kaihruai a, thu pawimawh hrang hrang rel zingah, Zaikungthar Vol. 6 tihchhuah chungchang te, MIPOTY leh PUC Mizo Department-te huaihawt seminar-a paper-te a bua tihchhuah chungchangte rel a ni a, a mawhphurtu tur editorial board ruat fel nghal a ni bawk. Zaikungthar Vol. 6 Editorial Board turte hi,
- H. Lalawmpuia, Asst. Secretary
- Laltlanmawia, EC
- Zirtei Mangpa, EC
- Masi-a Chhakchhuak, EC
te an ni a, Zaikungthar Vol. 6-a poetry thawh duh tan anni hnenah thehluh theih reng a ni.
Lehkhabu chhuah chungchang bakah hian kumin chhunga Poetry Workshop neih chungchang te, PUC nena Poetry Festival huaihawt chungchang te, Mizo poetry bu chhuak tawhte khawn khawma catalogue-a dah khawm chungchang te rêl a ni a; member thahnem tak an tel a ni.
