MiPOTY member Masi-a Chhakchhuak hla bu tlangzarh
18/3/2022: Vawiin chawhnu dar 1-ah khan Mizo Poetry Society (MiPOTY) member tangkai tak Malsawmkima (Masi-a Chhakchhuak) lehkhabu hmasa ber Rose Par Eng chu Aizawl Press Club-ah Pu L. Thangmawia, Vice Chairman, Human Resources Development Board, Govt. of Mizoram chuan a duh apiang lei theih turin a tlangzarh.
Tlangzarhtu Pu L. Thangmawia chuan hla pawimawhzia sawiin, “Politician-te’n kum nga chhung inpumkhatna thu kan tlangaupui ai chuan hla phuahtuten zan khat leka hla an phuah hi a thawh hlawk zawk fo,” tih a sawi a. “Hnam movement a intan lai khan inbiak pawhna phone a la awm lo va, ni tina chanchinbu chhuak pawh a la awm mang lo. Petromax awm lohna khua tam tak a awm a, au rinna pawh a awm hek lo. Mahse, hnam thlipui khan Zoram kilkhawr thlengin a dap chhuak vek a. Chumi tura hmanraw pawimawh ber chu hla a ni,” a ti a, tun hnaia Mizo thu leh hla lama hmasawnna hmuh theiha a awm chu lawmawm a tih thu a sawi bawk.
Tlangzarh inkhawm hi Lalremruati Ngente (Aremruati), MiPOTY ECM chuan a kaihruai a; Pi Lalmalsawmi Renthlei, Associate Professor, Govt. Johnson College-in hunserh a hmang a; Dr. H. Laldinmawia, Secretary, MiPOTY chuan thlirlawkna hun hmangin Anita VL Nunmawia, MiPOTY member chuan hla a chhiar bawk a ni. He lehkhabu hi hla (poetry) dah khawmna bu a ni a; Rs. 90 man chauh niin lehkhabu dawr hrang hrangah lei theih a ni.
He hunah hian lehkhabu tlangzarhtu Pu L. Thangmawia chuan MiPOTY-ah Rs. 5000 lai mai chu thawhlawm a thawh a, Pu C. Vanhmingliana, Vice President chuan pawl aiawhin a dawng a; Mizo Poetry Society chuan Pu L. Thangmawia chungah lawm thu a sawi tak meuh meuh a ni.
