Poetry bu ‘Fardawn’ tlangzarh
19.06.2022: Nimin, June ni 18, 2022 (Inrinni) chawhnu dar 1:30 khan Zirtei Mangpa poetry hrang hrang 79 dah khawmna, Fardawn chu Prof. RL Thanmawia, President, Mizo Poetry Society (MiPOTY) chuan Aizawl Press Club-ah a tlangzarh.
He lehkhabu tlangzarhna hun hi Dr. H. Laldinmawia, Asst. Professor, Pachhunga University College (& Secretary, MiPOTY)-in a kaihruai a; Dr. Lalchhuanawma Tochhawng-in hunserh hmangin TS Khupchong, ECM, MiPOTY-in thlirlawkna hun a hmang bawk. He hunah hian Prof. RL Thanmawia chuan poetry nihphung leh thiltihtheihna te, a ropuina te leh Mizote zinga poetry lo thang zel chu lawmawm a tih thu a sawi a ni. Hemi hnu hian PC Lalrinliani, September Zunzam novel ziaktu te leh Pu Lalzarzova, Asst. Professor, Mizoram University (& Asst. Secretary, MiPOTY) leh mi dang eng emaw zatin thu an sawi bawk.
Fardawn lehkhabu ziaktu Zirtei Mangpa hi MiPOTY member a ni a, kum 2013 khan a lehkhabu hmasa ber Dithlifarfem a lo tichhuak tawh a, tuna a lehkhabu tihchhuah hi a pahnihna a ni. Phek 110-a chhah, cheng 120 man a ni.
