Poetry Nite hlawhtling taka neih a ni
Hun eng emaw chen kal ta aṭanga Mizo Poetry Society (MIPOTY)-in ruahman lawkna a lo neih angin, December ni 8, 2023 (Zirtawpni) zan dar 6:30 khan, In Lehkha Cafeteria, Chaltlang Dawrkawnah Poetry Nite cum Book Release neih a ni a, Pu R. Lallianzuala, Chairman, Mizo Language Development Board, Mizo Writers Association President ni bawk chu khuallian a ni a, lehkhabu a tlangzarh nghal a ni.
Hun khatna hi lehkhabu tlangzarhna hun atana hman niin Dr. Lalrinkima (Seiji) chuan a kaihruai a, Dr. Lalrammuana Sailo, Editorial Board member-in lehkhabu sawi hawnna neiin Pu F. Vanlalrochana, Editorial Board member-in thu a sawi bawk a. Hemi hnu hian khuallian Pu R. Lallianzuala chuan lehkhabu Lentu tih chu a tlangzarh ta a ni.
Lentu hi MIPOTY-in Mizo poetry chungchang seminar a neih ṭuma paper hrang hrangte dah khawmna a ni a, mi thiam hrang hrangten mi mal poetry zir chianna te, poetry kalphung chi hrang hrang an zir chiannate a te. Mizoramah chuan Mizo poetry zir chianna lehkhabu chhuak hmasa ber a nih a rinawm. Rs. 350-a zawrh niin lehkhabu dawr hrang hrangah lei theih a ni.
Hun hnihna hi Dr. Lalrinkima (Seiji) chuan kaihruai tlangin, poetry chhiarna hun thawl leh zalen tak neih a ni a. Mi 20 velin an poetry chhiarin zawhna leh chhanna te, sawi hona leh inkawm hona te neih nghal zel a niin kal khawmten an hlawkpui tlang hle.
