Prof. RL Thanmawia hnenah Pu Buanga Award hlan a ni
Mizo Academy of Letters Joint Hqrs, Lunglei-in kum 3 dana a hlan thin, Pu Buanga Award chu October 12, 2022 khan Prof. RL Thanmawia, President, Mizo Poetry Scociety (MiPOTY) hnenah a hlan. Hlanna inkhawm hi Art & Culture Auditorium, Lunglei-ah neih niin Pu C. Lalrinsanga, Agriculture Department chuan a hlan a ni.
He huna khuallian Pu C. Lalrinsanga, Minister chuan, thuziak hmanga Mizo hnam dinchhuahna tur ngaihtuah a ngaih thu sawiin kan thalaite a tha zawnga kalpui a ngaih thu a sawi a, kan ram leh hnam humhalh nan ziaka thil dah a pawimawh thu sawiin, thuziaktute hi an te lo va, an pawimawhna tihlana a sulsutu ni zel tur te, khawvelin chhiat lam a pan zel laia kawng hrang hranga siam thatu ni turin thu ziak mite a chah a ni.
Pu Buanga Award hlanna inkhawm hi Pu C. Hrangdula, President , MAL, Jt. Hqrs Lunglei chuan a kaihruai a, Pu V. Rokhawlkima, Secretary, Pu Buanga Award Committee-in report a pe a, Pu TC Zonunsanga, Secretary, MAL Jt. Hqrs Lunglei chuan Pu Buanga Awardee Prof. RL Thanmawia chanchin tlangpui a sawi a ni. He hunah hian Award dawngtu Prof. R.L. Thanmawia bakah Pu Thansanga Chongthu, Adviser, MAL Aizawl leh Pu Thanghmingliana Renthlei, Vice President, MJA, Lunglei te pawhin thu an sawi bawk.
Pu Buanga Award hi kum 2000 atang khan Mizo thu leh hla lama thawh hlawkte chawimawina atan hlan thin a ni a, kum 5 danah hlan niin kum 2015 hnu lam khan kum 3 danah hlan a ni a; Pi Lalsangzuali Sailo, Pu B. Lalthangliana, Prof. Laltluangliana Khiangte, Pu Lalthangfala Sailo leh Pu R.K. Lalhluna te hnenah hlan tawh niin tangkapui (trophy), thuchei (certificate) leh Rs. 10000/- a hlan a ni.
Kumina he chawimawina dawngtu Prof. RL Thanmawia hi kum 1954 khan Darlak-ah a piang a; NEHU atanga MA zir zovin kum 1989-ah doctorate degree neiin zirna in hrang hrang — Govt. Aizawl College, Pachhunga University College leh Mizoram University-ah te a thawk a, kumin 2022 August thla khan Department of Mizo, Mizoram University atangin Senior Professor niin a pension a ni. Thu leh hla lamah sulhnu a ngah hle a, essay leh article 400 chuang a ziak a, lehkhabu 31 ziakin a kutchhuak chi hrang hrang 29 zet chu Primary School atanga University thlengin zirlaibuah seng luh a ni; kum 2012 khan thu leh hla lama a thawhhlawk avangin India rama civil mite chawimawina sang Padma Shri Award hlan a lo ni tawh a, kum 2016 khan MAL-in a hlan thin Academy Award a lo dawng tawh bawk.
Prof. RL Thanmawia hi Mizo Poetry Society (MiPOTY) dintu niin kum 2016 khan poetry lama tuite kal khawmte chuan a hovin an din a, tunah hian President a ni mek a. Mizo Academy of Letters (MAL)-ah President a ni mek bawk. Kan President-in hetiang Award ropui tak mai a dawng hi Mizo Poetry Society (MiPOTY) chuan kan lawmpui hle a ni.
