‘Seminar on Revisiting Mizo Poetry’ neih a ni
March 21, 2023, thawhlehni khan PUC Seminar Hall-ah World Poetry Day pualin ‘Seminar on Revisiting Mizo Poetry’ neih a ni a, Pu Robert Romawia Royte, Minister of State, Govt of Mizoram chu khuallian a ni a, Zaikung Thar Vol.5 a tlangzarh nghal. He seminar hi Mizo Poetry Society leh Department of Mizo, Pachhunga University College tangkawpin an huaihawt a ni.
He seminar hi hun thuma then a ni a, hun khatna hi Pu C. Vanhmingliana, Vice President, Mipoty-in a kaihruai a. Dr. H. Laldinmawia, Secretary-in report a pek hnuin Lalremruati Ngente, Editorial Board, Zaikungthar-in lehkhabu thlirlawkna tawi tê a hman hnuah khuallian chuan lehkhabu a tlangzarh a; khuallian hian Mizo tawng hmasawn nana a thahnemngaihna te sawiin, thu leh hla lama a lo tui ve zia te uar takin a sawi bawk.
Hemi hnu hian Mizo Poetry Society (MIPOTY) dinchhuaktu leh President ni lai Prof. RL Thanmawia chuan thu sawiin, pawl a inhman tawhna zawng zawngah MIPOTY tluka nuam leh zalen a awm loh thu te, ram chhunga issue hrang hrang a thlen chuan whatsapp group tinah chu chuan hmun a luah thu leh mipoty group erawh chu a ngai rengin, poetry chungchang bak tar lan a nih ngai loh thu te a sawi a; Pu HS Lalsangpuia, Vice Principal, PUC pawhin thu a sawi bawk. Pi C. Januari, Mipoty Treasurer chuan lawmthu sawiin hun khatna hi a khar a ni.
Hun hnihna hi seminar niin Pi Enid H. Lalrammuani chu Moderator a ni a; mi 9-in an paper an chhiar chhuak a. Pu Lalzarzova’n Mizo Lengkhawm Zai leh Thihna (Theme of Death in Mizo Lengkhawm Zai); Lalremruati Ngente-in Political Satire in Mizo Contemporary Poetry; Dr. Cherrie L. Chhangte-in Why Poetry? KC Lalthansanga’n Instapoetry: Chik Taka Zir Zauna; Dr. Lalbiakdiki’n A Discourse Analysis of Selected Mizo Women’s Poetry; H. Lalawmpuia’n Lalzuahliana ‘Pathian’ Laltlanmawia’n Rokunga Hlaa Personification; Dr. Lalrammuana Sailo-in RL Kamlala Inchhirna leh Inlamletna leh Dr. Lalnunsanga Ralte-in Biasphemous Lines for Mother – A Review of KS Nongkynrih’s Poem, Cultural Cringe and Writing from the Margins te an present a ni. Paper present kar lakah hian poetry chhiar ngaihthlak a ni a, Piani Hmar, Alef L. Fanai, Ruth Lalmalsawmi, Zothanmawia, Vanlalhmachhuana, Laltlanfela, Lalchhanchhuaha, Zirsangzela, Lalmuankima, Lalrampana leh Reuben Lalenkawla te’n poetry an chhiar a ni.
Hun thumnaah hian kum 2023-2025 chhunga MIPOTY hruaitu tur thlan a ni a, a hnuaia mite hian an inthlanpui a ni:
Returning Officer : Lalthlamuana Ralte, Asst. Professor, Department of Economics, PUC
Polling Officers: Dr. Vanlalremruata Tonson, Asst. Professor, Department of History, PUC
Dr. Vanlalvenpuia, Asst. Professor, Department of Philosophy, PUC
Heng a hnuaia mite hi hruaitu atan thlan chhuah an ni:
President : Dr. H. Laldinmawia
Vice President : Lalzarzova
Secretary : KC Lalthansanga
Asst. Secretary : H. Lalawmpuia
Treasurer : Lalremruati Ngente
Finance Secretary : Dr. Lalbiakdiki
