Ka lawmna
Mal sawm za tam ka dawn zing a,
Ka hmaih, chhiar kân ni fo thin chu;
Ni thar hmu thei dama min tho-in,
Thing tin vul, valeng zai ka chhiar.
Thlan fara thawh sa beitham te,
Tlawm mah se thahrui min pe a;
Dawngtu hmangaih nunna i hual,
Mal sawm hlu ber hei lo liam hi.
Zing fir chhima dai far thinte’n,
Hlimthla pel beisei thar mi chhawp;
Naktuk nun chhan tur mi siam a,
Zan ropùi muanga ka nghah chhan.
Pek sa ka laka i lak hran,
A vàng, fam zun ka tahpui lai;
Nunna rahbi dai hmasatu’n,
A chan, chan tha chu nghilhsakin.
Ná chu awm se mi thawi ang a,
Hliam pawh i tuam dam leh thin ang;
Vut aia pangpar thi-hrui châk,
I hnen chawlhna thlir rengtu hian.
Ro sum tam khawl lo mah ila,
Pek ka nih thil hlu tam tak te;
Khuarel mawina vang ngawt pawhin,
Lawm thu sawi tur mai ka lo ni.
Chauhni awm mah sela, ka dam leh thin;
I pek, i voh hmangaih changtu ka ni si a!
