“thupui nei lo”
Zingṭian bawh-ar lo pau in,
Dawn ril a fan lunglen a tho;
Sawngka lerah ṭah zai sain,
Ṭuanṭul kallai kham a awl.
Ka chung tùrni vanzawlah,
A kai náunàwn rawl ngen ri’n;
Awmhar ti zual ṭahzai ka sa,
Lungleng nu mi chan tir e.
Lenbuang beltu ngirtling leh,
Berhva lunglen zai sa te’n;
Chul hnu kan nun min ngaih tira,
Her lo tur sul tam kan ban kha.
Zantiang siar leh chhawrthla te’n,
Khua rel mawina chian mah se;
Awmhar nu chan a ṭang chuan e,
Engkim mai hi lunglentu.
Siar di nghak Chawngpuii’n,
Riang van zawl a mawi lai hian;
Fimthli lengah biahnem chhiah i,
Kei ang lunglen tuar ve tan.
