March 21, 2023 khan PUC Seminar Hall-ah World Poetry Day pualin ‘Seminar on Revisiting Mizo Poetry’ neih a ni a, he seminar hi Mizo Poetry Society leh Department of Mizo, Pachhunga University College ṭangkawpin an huaihawt a ni a, he seminar-ah hian mi 9-te’n Mizo poetry an zir chianna paper an chhiar a ni.
Heng paper-te hi dah khawmin, a bua siam a nih theih nan April ni 27, 2023 khan MIPOTY Executive Committee chuan Editorial Board a din a, chung mite chu — Lalremruati Ngente, F. Vanlalrochana, Dr. Lalrammuana Sailo leh Grace C. Malsawmi te an ni. Anni hmalakna azarah, seminar paper bakah paper rawn ziah belhte nen a vaiin he lehkhabu, a hminga Lentu an vuahah hian thuziak 15 a awm a; chungte chu Mizo hla thlirna thuziak 8 leh mi mal hla thlirna 7 a ni.
He lehkhabu kawm hi R. Lalmuanpuia, Lunglei Venglai-in a design a ni a, Fraser Media and Publication-in an tihchhuah leh print a ni a, cheng 350 man a ni. ISBN: 978-81-967433-6-9.
December 8, 2023 khan In Lehkha-a Poetry Nite neih rualin tlangzarh a ni a, Pu R. Lallianzuala, Chairman, Mizo Language Development Board chuan a tlangzarh a ni. Tlangzarhna hlimthla leh thute hetah hian chhiar tur a awm.
