Kum 2016 chhunga hmalakna te
1. 1st Poetry festival for Young Mizo Poets:
Mizoram University-a School of Humanities and Education chuan March ni 15-16, 2016 chhung khan 1st Poetry festival for Young Mizo Poets an buatsaih a. He festival hi MiPOTY buatsaih ni lo mah se, he programme-a tel te hi MiPOTY member deuh vek an ni a, a hnu zelah phei chuan he programme hi MiPOTY in a keng chhunzawm ta a ni.
2. Radio Talk
MiPOTY a din tirha a ngaih pawimawh chu ‘World Poetry Day’ hman thin a ni a. A vawi khatna atan World Poetry Day, March ni 21, 2016 pual hian poetry chungchanga inkawm hona chu All India Radio, Aizawl-ah buatsaih a ni a. Hetah hian pawl aiawhin Pu C.Chhuanvawra (Adviser), Lalzarzova leh Lalnunthari (Thartei Siakeng) te an tel a ni.
3. Zonet TV Show:
World Poetry Day, March ni 21 denchhen hian Zonet Cable TV-ah Poetry Reading Session buatsaih a ni a. MiPOTY Finance Secretary Lalhlimpuiin kaihruaiin member 20-ten an hla an chham a ni.
4. Doordarshan Discussion:
World Poetry Day, March ni 21 denchhenin Doordarshan Kendra, Aizawl-ah poetry chungchang sawi ho a ni a, hemi rual hian member 10-in an poetry an chham bawk. He sawi honaa pawl aiawha tel te chu Prof. R.L. Thanmawia, H. Laldinmawia leh F. Lalzuithanga te an ni.
