Kum 2019 chhunga hmalakna te
1. DDK Discussion – Communal Unity
India Hnam Pa Mahatma Gandhi piancham kum 150-a puala Central sorkar theme siam chu MiPOTY member-ten a inchhawkin Doordarshan Kendra, Aizawl-ah an sawi ho va, January, 2019 theme chu Communal Unity tih a ni a, He thupui hi MiPOTY member pali — Rochharzela, F. Lalzuithanga, F. Vanlalrochana leh H. Laldinmawia ten an sawi a, January ni 30, 2019 khan tihchhuah a ni.
2. DDK Discussion – Removal of Untouchability
India Hnam Pa Mahatma Gandhi piancham kum 150-a puala Central sorkar theme siam chu MiPOTY member-ten a inchhawkin Doordarshan Kendra, Aizawl-ah an sawi ho va, February 2019 theme chu Removal of Untouchability tih a ni a, He thupui hi MiPOTY member pathum — Rochharzela, Malsawmpuia (Spa Bawitlung) leh H. Laldinmawia ten an sawi a ni.
3. DDK Discussion – Women Empowerment
India Hnam Pa Mahatma Gandhi piancham kum 150-a puala Central sorkar theme siam chu MiPOTY member-ten a inchhawkin Doordarshan Kendra, Aizawl-ah an sawi ho va, March 2019 theme chu Women Empowerment tih a ni a, He thupui hi MiPOTY member pali — C. January, Fela Ngente, Lalhlimpuii leh Enid H. Lalrammuani ten an sawi ho a ni.
4. World Poetry Day – Doordarshan
World Poetry Day, March ni 21 chu holiday a nih avangin pawl hminga hman a harsa a, chu vang chuan hemi ni denchhen hian Doordarshan Kendra Aizawl-ah poetry chungchang sawihona hun hman a ni a, pawl aiawhin heng mite hian poetry chungchang an sawi — H. Laldinmawia, F. Lalzuithanga leh Dorothy Zonunsangi. Pawl member mi 6-in poetry an chhiar bawk, chungte chu — Zonunthari, Lonely Pachuau, JH Hlupuii, C. Ramdintluangi, Spa Bawitlung leh Lalrinnunga Zote te an ni.
5. World Poetry Day – AIR
World Poetry Day, March ni 21, 2019 denchhenin All India Radio, Aizawl-ah poetry chungchanga inkawmna hun MiPOTY member 2-in pawl aiawhin an hmang a, chungte chu — Lalhlimpuii leh Lalrinkima (Seiji) te an ni.
6. 3rd Poetry Festival for Young Mizo Poets:
Sahitya Akademi bultumin Pachhunga University College Mizo Department leh MiPOTY tangkawp chuan Pachhunga University College Seminar Hallah ‘3rd Poetry Festival for Young Mizo Poets’ chu March 1-2, 2019 khan an buatsaih a, Higher and Technical Education Minister Dr. R. Lalthangliana chuan a hawng.
He festival-a keynote speaker, Prof. R.L. Thanmawia, Mizo Poetry Society President ni bawk chuan, khawvelah poetry harhtharna a thlen mek thu sawiin, Mizo thalai zingah pawh he harhtharna hian bu a khuar mek niin a sawi a. Poetry chu mahni nihna te, vei zawng te, fuihna te, ngaihdan te puanchhuahna ropui tak a nih thu sawiin “Tuna thalaite hla phuah hi nakinah research te la beiiin an la zirchiang dawn a ni,” a ti.
Hawnna inkhawmah hian Sahitya Akademi Regional Secretary, Dr. Devendra Kumar Devesh, Sahitya National Council Member Pu Darchuailova Renthlei leh Dr. Tawnenga, Principal, Pachhunga University College te chuan thu an sawi a. Inkhawm hi Dr. Zoramdinthara, Asst. Professor, Mizo Department, Pachhunga University College chuan a kaihruai a. Lalduhsaki leh Vanlalmalsawmi, VI Semester zirlai, Mizo Department, PUC te chuan zaiin kalkhawmte an awi bawk a ni.
He Festival coordinator, H. Laldinmawia, Asst Professor, Pachhunga University College leh MiPOTY Secretary ni bawkin report a pek dan chuan, he festivalah hian thalai kum 40 hnuai lam hla phuah thiam mi 30-ten an hla an chhiar dawn a ni.
7. 2nd Poetry Evening:
Aijal Club bultumin Rokunga Memorial Society leh Mizo Poetry Society tang dun chuan July ni 2 zan khan Aijal Club-ah ‘2nd Poetry Evening’ an buatsaih a. He programme-ah hian pawl aiawhin english poetry chu Hannah Lalhlanpuii, Folina Chawngthu leh Lalsangliani ten an chhiar a. Mizo Poetry chu Ramlawt Dinpuia, Lalrammuana Sailo leh H. Lalawmpuia ten an chhiar thung. He programme hi Zonet Cable TV-ah tihchhuah niin kum dang zelah pawh hetiang programme hi siam tum a nih thu Aijal Club hotute chuan an sawi.
8. Poetry Workshop:
Art & Culture Department bultumin Mizo Poetry Society chuan ‘Workshop on Poetry reading and Writing’ chu July ni 12-13 hian Archives Hall, Babutlangah an buatsaih a. Mi 50 tan workshop hi buatsaih tura tih ni mah se a taka kalkhawm erawh an thahnem hle. He programme hi Art & Culture Minister, Pu R.Lalzirliana chuan khuallian niin a hawng a ni.
9. Lehkhabu Tlangzarh:
Mizo Poetry Society member te hla phuah dahkhawmna lehkhabu ‘Zaikung Thar Vol-III’ chu Art & Culture Minister, Pu R. Lalzirliana chuan July ni 12, 2019 khan a tlangzarh.
